သျှမ်းပြည် မြောက်ပိုင်း လားရှိုးမြို့ရှိ နာမည်ဆိုးနှင့် ကျော်ကြားနေသည့် ဒေသ အခေါ် ရေကန်တောင် တွင် ယနေ့ (ဇွန် ၃၀) ရက် မွန်းလွဲပိုင်း၌ ဓါးပြတိုက် လုယက်မှု ဖြစ်ပွားခဲ့ကြောင်း သိရသည်။
ဖြစ်စဉ်မှာ ကားတစ်စီးနှင့် ရေကန်တောင် အနီးတွင် ကားဖြင့် လာပြီး မျက်နှာဖုံးစွတ်ထားသည့် လူငယ်(၁၀) ဦးခန့် က အမျိုးသမီး (၃)ဦးကို ဓားပြခြိမ်ခြောက်ကာ ပါလာသည့် ငွေများကို လုယက်သွားကြောင်း ဓားပြတိုက်ခံရသည့် အမျိုးသမီး တစ်ဦး က သျှမ်းသံတော်ဆင့် ကိုပြောသည်။
” အမျိုးသား(၁၀)ယောက်က မျက်နှာဖုံးစွတ်ပြီး ကျမတို့ကို ဓားပြပြီး ပါလာတဲ့ငွေ ပေးဆိုပြီး ခြိမ်းခြောက်တယ်။ ဖုန်းတွေတော့ မပါသွားဘူး။ ပိုက်ဆံ ပါသမျှ (၇) သောင်းကျော်လောက်တော့ ပေးလိုက်ရတယ်။ လုယက်တဲ့သူတွေ က လူငယ်ပိုင်းပဲ ” ဟု အထက်ပါ အမျိုးသမီးက ပြောပြသည်။
အဆိုပါ လားရှိုးမြို့ ရေကန်တောင်သည် မူးယစ်ဆေးဝါးသမားများကျင်လည်ကျက်စားရာ နေရာတစ်ခု လို ဖြစ်ပြီး မကြာခဏ ရန်ပွဲများ၊ ခိုးမှုလုယက်မှုများ မကြာခဏ ဖြစ်ပွားသည့် လားရှိုးမြို့တွင် နာမည်ဆိုးနှင့် ကျော်ကြားသော နေရာတစ်ခုလည်းဖြစ်သည်။
လက်ရှိကာလတွင် လားရှိုးမြို့တွင် ကိုဗစ်-၁၉ ပိုးတွေ့လူနာမြင့်တက်မှု၊ နိုင်ငံရေး အခြေအနေ မတည်ငြိမ်မှုကြောင့် မကြာခဏ လုယက်မှု၊ ခိုးမှုများဖြစ်ပွားလျက်ရှိကြောင်း သိရသည်။
