သျှမ်းပြည်အရှေ့ပိုင်း ကျိုင်းတုံမြို့ ကုန်ကျောင်းကျေးရွာ ရပ်ကွက်(၁) နေ အမျိုးသမီးတစ်ဦးသည် ယနေ့(ဇွန် ၃၀)ရက် မနက်ပိုင်းတွင် ဓားမြတိုက်ခံရပြီး အသတ်ခံရကြောင်း စုံစမ်းသိရသည်။
ယနေ့ မနက်အစောပိုင်းအချိန်၊ မိုးရွာသွန်းနေချိန်တွင် အသက် (၂၉ )နှစ်အရွယ်ရှိ အမျိုးသမီး တစ်ဦးသည် ဈေးသွားရန် ပြင်ဆင်နေစဉ် ဓားပြမှ နေအိမ်ထဲသို့ဝင်ကာ ဓားပြတိုက်ခဲ့ပြီး၊ ၎င်းအမျိုးသမီးကိုလည်း လည်ပင်ကြိုးဆွဲကာသတ်ခဲ့ကြောင်း ကျိုင်းတုံမြို့နယ် ကုန်ကျောင်းကျေးရွာ ဒေသခံ တစ်ဦးက သျှမ်းသံတော်ဆင့်ကို ပြောသည်။
“ သူကတစ်ယောက်ထဲနေတာ။ မနက် ဈေးသွားမဲ့အချိန်မှာ ဓားပြဝင်တိုက်ပြီး၊ သတ်သွားတယ်” ဟု ကုန်ကျောင်းကျေးရွာ ဒေသခံတစ်ဦးက သျှမ်းသံတော်ဆင့်ကို ပြောသည်။
ဓားပြတိုက်သူသည် အမျိုးသမီး ကို ရိုက်နှက်ထားပြီး၊ လည်ပင်းတွင်လည်း ကြိုးဆွဲသတ်ထားသည့် ပုံစံ မြင်ရကြောင်း လည်း ကျေးရွာဒေသခံများက ပြောသည်။
“ သူဆိုင်ကယ်တစ်စီးနဲ့ လက်ကိုင်ဖုန်းတစ်လုံးပါသွားတယ်။ ပိုက်ဆံတော့မပါသွားဘူး။ သူပိုက်ဆံတွေက ဆွေမျိုးတွေ မှာ ပဲထားတယ်။ ရိုက်နှက်ထားတဲ့ ဒဏ်ရာတွေကတော့ မျက်နှာတွေအကုန်ညိုကုန်တယ်။ ပြီးတော့ သူလည်ပင်းမှာ ကြိုးတုတ်ပြီး သတ်လိုက်တဲ့ အရာကြီးထင်ထားတယ်။” ဟု ဒေသခံတစ်ဦးက ပြောသည်။
ထိုအမျိုးသမီးကို မည်သည်အဖွဲ့က လာရောက်သတ်သွားသည်ကို မသိရှိရသေးကြောင်း၊ လက်ရှိသေဆုံးသွားသည့် အမျိုသမီးကို ကျိုင်းတုံမြို့ဆေးရုံးတွင် ခေါ်ဆောင်စစ်ဆေးနေကြောင်းသိရသည်။
Leave a Comments