သျှမ်းပြည်မြောက်ပိုင်း နမ့်ခမ်းမြို့နယ် မန်ဆွမ်းကျေးရွာဒေသခံတစ်ဦးကို သျှမ်းပြည်တိုးတက်ရေးပါတီ ( SSPP/SSA) မှ ဖမ်းဆီးခေါ်ဆောင်ပြီး သေဆုံးသွားသည့် မန်ဆွမ်းရွာသား အလောင်းကို မိသားစုဝင်များက ပြန်လိုချင်ကြောင်း စုံစမ်းသိရသည်။

ဖမ်းဆီးခံရသည့် စိုင်းစံခမ်းအိုက် (၅၀)နှစ်သည် မေလ (၃၁) ရက် တွင် SSPP/SSA မှ နေအိမ်တွင် လာရောက် ဖမ်းဆီးခေါ်ဆောင် သွားခဲ့ပြီး ဇွန်( ၂၆) ရက်တွင် သွေးတိုးရောဂါကြောင့် သေဆုံးသွားကြောင်း (SSPP/SSA) မှ စိုင်းစံခမ်းအိုက်၏ မိသားစုဝင်ကို အကြောင်းကြားခဲ့ကြောင်း ၎င်းမိသားစုဝင်က သျှမ်းသံတော်ဆင့်ကိုပြောသည်။

စိုင်းစံခမ်းအိုက်သည် သျှမ်းလူငယ်အဖွဲ့စည့် (TYO) အဖွဲ့ဝင်တစ်ဦးလည်းဖြစ်ကြောင်းသိရသည်။

“ သူတို့(SSPP/SSA) က ကျမကိုပြောလာတယ်။ သူ (စိုင်းစံခမ်းအိုက်) က သွေးတိုးလို့ဆိုပြီးဆုံးသွားပြီးလို့ပြောလာတယ်။ အလောင်းကိုပြန်မပို့ပေးတော့ ကျမတို့လည်း သွေးတိုးလို့ ဆုံးသွားပြီးဆိုတာကို မယုံဘူး။ ကျမတို့လိုက်တောင်းတယ်။” ဟု စိုင်းစံခမ်းအိုက်၏ ဇနီး နန်းစံပွင့် က သျှမ်းသံတော်ဆင့် ကို ပြောသည်။

စိုင်းစံခမ်းအိုက်သည် နဂိုးကတည်းက သွေးတိုးရောဂါရှိထားကြောင်း၊ သွေးကျဆေးသောက်နေရသူဖြစ်ပြီး၊ SSPP /SSA ကဖမ်းဆီးသွားချိန်တွင် သောက်ဆေးများမပါသွားကြောင်း၊ စိုင်းစံအိုက်ခမ်း၏ သောက်ဆေးများကို မိသားစုဝင်များက သွားပို့ခဲ့သော SSPP/SSAက လက်မခံခဲ့ကြောင်း နန်းစံပွင့် ကပြောသည်။

“ သူသွေးတိုးရောဂါရှိထားတယ်။ သူကိုဖမ်းသွားကတည်းက ဆေးတွေဘာမှမယူသွားရဘူး။ ပြန်လွှတ်ပေးဖို့ (၃)(၄) ခါလောက်သွားတောင်းတယ်။ ဆေးတွေ၊ အဝတ်တွေသွားပို့ပေးလို့လည်းမရဘူး” ဟု ၎င်း၏ ဇနီးဖြစ်သူ နန်းစံပွင့် က ဆိုသည်။

နမ့်ခမ်းမြို့ နယ် မန်ဆွမ်းကျေးရွာ ဒေသခံများက သေဆုံးသွားသည့် စိုင်းစံခမ်းအိုက်၏ အလောင်းကို ပြန်ပေးရန်အတွက် ယမန်နေ့ (ဇွန် ၂၇)ရက် ည ၈နာရီကျော်တွင် SSPP/SSA ရုံးရှေ့တွင် သွားရောက်ဆန္ဒထုတ်ဖော်ပြီး တောင်းဆို ခဲ့သော်လည်း အလောင်းပြန်ရလာခြင်းမရှိကြောင်း သိရသည်။

ထိုသို့ ဆန္ဒပြ အလောင်းပြန်သွားတောင်းရာတွင် SSPP/SSA မှ သေနတ်ပစ်ဖောက်ပြီး လူစုခွဲခဲ့ကြောင်း ဒေသခံတစ်ဦး ကပြောသည်။

“ ကျနော်တို့ သူအလောင်းပြန်ရဖို့ သွားတောင်းတယ်။ ညအချိန်ထိ ဆန္ဒပြတောင်းဆိုတာ။ သူတို့က သေနတ်ပစ်ဖောက်တယ်။ သူအလောင်းကိုမတွေ့ရသေးဘူး။ ပြန်မပေးလာသေးဘူး။ ဒီနေ့ထိမရသေးဘူး” ဟု ဒေသခံတစ်ဦးက ပြောသည်။

စိုင်းစံခမ်းအိုက်သေဆုံးသွားသည့်နှင့်ပတ်သက်ပြီး ထုန့်မောဝ်းဒေသ (ရွှေလီမြစ်ဝှမ်း) SSPP/SSA ပြောခွင့်ရ ဗိုလ်ကြီး ဆိုင်ငါးမိန်း က “ သူသွေးတိုးနဲ့သေသွားတာ။ သူဆေးတွေသောက်နေရတယ်။ အလောင်းတော့ဘယ်နားရှိလည်း ကျနော်မသိဘူး။ ပစ်သတ်လိုက်တာတော့မဟုတ်ဘူး” ဟု သျှမ်းသံတော်ဆင့်ကိုပြောသည်။

စိုင်းစံခမ်းအိုက်သည် RCSS/SSA ၏ ထုန့်မောဝ်း (ရွှေလီမြစ်ဝှမ်း) ဒေသတွင်း အတိုင်ပင်ခံ ဖြစ်ကြောင်းလည်း ဗိုလ်ကြီး ဆိုင်ငါးမိန်း က ပြောသည်။

ဆက်လက်ပြီး စိုင်းစံခမ်းအိုက်၏ ဇနီးဖြစ်သူက “ သူက ဘာမှမလုပ်ဘူး။ ပြည်သူရိုးရိုးပဲ။ လယ်ယာတွေပဲလုပ်တယ်။” ဟု သျှမ်းသံတော်ဆင့်ကို ပြောသည်။

RCSS/SSA ပြောခွင့်ရ ဗိုလ်မှူးကြီး စိုင်းခမ်းစံကလည်း “ သူက (စိုင်းစံအိုက်ခမ်း) က စစ်ဘက် က မဟုတ်ပါဘူး။ ပြည်သူပဲ။ ပြည်သူအမှားမရှိပဲ သူတို့သတ်နေတယ်။ တစ်ချို့ပြည်သူတွေက RCSS လုပ်တဲ့ပွဲလည်းသွားတယ်။ SSPP လုပ်တဲ့ပွဲလည်းသွားတယ်။” ဟု ပြောသည်။

စိုင်းစံခမ်းအိုက်သေဆုံးသွားပါက ရုပ်အလောင်းကို ပြန်လိုချင်ကြောင်း မိသားစုဝင်များက တောင်းဆိုလိုက်သည်။

မေလ ၃၁ ရက်နေ့တွင် သျှမ်းပြည်တိုးတက်ရေးပါတီ SSPP/SSA မှ ထုန်မောဝ်ဒေသ (၁၉) ရွာရှိပြည်သူ ၄ ဦးကို ဖမ်းဆီးသွားပြီး ဇွန်လ (၃) ရက်နေ့တွင် ၃ ဦးကိုပြန်လွှတ်လာပြီး စိုင်းစံခမ်းအိုက်ကို ပြန်မလွှတ်လာပေးခဲ့ကြောင်းသိရသည်။