သျှမ်းပြည်တောင်ပိုင်း မိုင်းကိုင်မြို့တွင် မြေစာရင်းဦးစီးအရာရှိ တစ်ဦး သေနတ်ပစ်ခံရပြီးနောက် ဒေသခံများ လုံခြုံရေး စိုးရိမ်နေရကြောင်း စုံစမ်းသိရှိရသည်။
ဇွန် (၂၇) ရက်ည (၇) နာရီချိန်တွင် မိုင်းကိုင်မြို့ရှိ မြေစာရင်းရုံးရှေ့တွင် ဆိုင်ကယ်ဖြင့် လူ(၂)ဦး လာရောက် ပစ်ခတ်သွားကာ သေနတ်ဒဏ်ရာ (၄) ချက်မိသွားပြီး၊ လက်ရှိမှာ မိုင်းကိုင်ဆေးရုံတွင် ဆေးကုသခံယူနေကြောင်း သိရသည်။
“၄ ချက်ထိသွားတယ်။ သူက အနေအေးတယ်။ လူမှားပြီးတော့ ပစ်သွားတာလဲ ဖြစ်နိုင်တယ်။ အခုနောက်ပိုင်းတော့ ကလေးတွေ အတွက် လုံခြုံရေး စိုးရိမ်ရတယ်။ ရုံးက ကျောင်းနဲ့ နီးတော့ ဘယ်ချိန် ထပ်ဖြစ်မလဲမသိဘူး” ဟု မိုင်းကိုင်ဒေသခံ ကျောင်းသားမိဘ တစ်ဦးက သျှမ်းသံတော်ဆင့် ကို ပြောသည်။
အဆိုပါ မြေစာရင်းဦးစီးအရာရှိသည် မိုင်းကိုင်မြို့တွင် (၁) နှစ်ခန့်သာ ရောက်ရှိလာသေးသည့် သူဖြစ်ပြီး၊ မြေစာရင်းရုံးရှေ့တွင် တခြားသူများနှင့် ရပ်ပြီး စကားပြောနေစဉ် သေနတ်ပစ်ခံရကြောင်းသိရသည်။
“သူတို့ ရုံးရှေ့မှာ စကားပြောနေတုန်း လူ (၂) ယောက် လာပစ်သွားတယ်။ သူ့ကိုပဲ တမြင်လာပစ်ချင်တာထင်တယ်။ ခြေထောက်၊ လက် နဲ့ ရင်ဘတ် ထိသွားတယ်” ဟု မိုင်းကိုင်ဒေသခံ တစ်ဦးကပြောသည်။
မြေစာရင်းရုံး အရာရှိတစ်ဦး ပစ်ခတ်ခံရပြီးနောက် ဒေသခံများစိုးရိမ်ထိတလန့်မှု ရှိနေသည့်အပြင် ဌာနဆိုင်ရာများလည်း ပိုပြီးစိုးရိမ်နေကြကြောင်း စုံစမ်းသိရသည်။
လွန်ခဲ့သည့် ဆယ်စုနှစ်ခန့်က မိုင်းကိုင်မြို့ လဝက ဦးစီးအရာ ရှိတစ်ဦးသည် သေနတ်ဖြင့် ပစ်ခံရပြီး သေဆုံးသွားကြောင်း သိရသည်။
