သျှမ်းပြည်မြောက်ပိုင်း သီပေါမြို့ မြန်မာရပ်ကွက် ရှိ နာရေးအိမ်တွင် ယနေ့ (ဇွန် ၂၅)ရက် ညနေ ၆ နာရီခွဲကျော်၌ အမျိုးသမီးတစ်ဦး သေနတ် ပစ်သတ်ခံရကြောင်း သတင်းရရှိသည်။
ယနေ့ ညနေ (၆)နာရီခွဲကျော်တွင် သေနတ်ပစ်ခံရသည့် မဇာဇာမျိုးအောင်သည် အသက် (၄၃)နှစ် အရွယ်ရှိပြီး၊ သူမ သည် ဇွန် (၂၃)ရက် ည (၉ )နာရီတွင် စစ်ကောင်စီမှ သေနတ်ပစ်သတ်လိုက်သည့် ကိုအောင်မင်းသူ ၏ နာရေးအိမ်ကို ရောက်ရှိနေစဉ် ပစ်သတ်ခံရခြင်းဖြစ်ကြောင်း သီပေါမြို့ဒေသခံတစ်ဦး ပြောပြချက် အရသိရသည်။
“ ဒီည သေနတ်ပစ်သတ်ခံရတဲ့ အမျိုးသမီး က ဇွန် (၂၃)ရက် ည (၉ )နာရီ မှာ သေနတ်ပစ်ခံရပြီး သေဆုံးသွားတဲ့နာရေး အိမ်မှာ ဖြစ်သွားတာ။ သေနတ်သမားက နောက်စေ့ကို ပစ်သွားတာ” ဟု သီပေါမြို့ဒေသခံ က ဆိုသည်။
အဆိုပါ သေနတ်ပစ်ခံရသူ၏ ဖခင်သည် စစ်တပ်မှ အငြိမ်းစားသူတစ်ဦးဖြစ်ပြီး၊ သူမသည် ဒလန်ဖြစ်သည်ဟု သတင်းထွက်ပေမှုကြောင့် ပစ်သတ်လိုက်သည် ဟု လည်း သီပေါဒေသခံများက ပြောဆိုကြသော်လည်း သျှမ်းသံတော်ဆင့် အနေဖြင့် အတည်ပြုချက် မရရှိပေ။
ဖေဖော်ဝါရီ ၁ ရက်နေ့မှ စစ်အာဏာသိမ်းပြီး သီပေါမြို့တွင် စစ်ကောင်စီမှ ပစ်သတ်ခဲ့သူ စုစုပေါင်း (၂) ဦးရှိခဲ့ပြီး (၁၇) ဦးဖမ်းဆီးခံထားရကြောင်း သိရသည်။ ထိုပစ်သတ်ခံရသူ (၂) ဦးလုံးသည် မွေးကင်းစ ကလေးများရှိနေကြောင်းသိရသည်။
Leave a Comments