သျှမ်းပြည်မြောက်ပိုင်း နမ္မတူမြို့နယ် ပင်လုံကျေးရွာ အုပ်စုအတွင်း နားခိုလျံ ရွာသား ( ၃) ဦးကို တအာင်း(ပလောင်) အမျိုးသားလွတ်မြောက် ရေး တပ်မတော် (TNLA) တပ်ဖွဲ့မှ ရိုက်နှက်ကာ ဖမ်းဆီးခေါ်ဆောင်သွားကြောင်းသတင်းရရှိသည်။
ယမန်နေ့ (ဇွန် ၂၃ )ရက် ည (၉ )နာရီ အချိန်တွင် နားခိုလျံ ကျေးရွာနေ စိုင်းမုန့်၊စိုင်းကျော်လူ၊ စိုင်းလူး ဆိုသည့် ရွာသား သုံးယောက်ကို TNLA မှ ရိုက်နှက် ဖမ်းဆီး ခေါ်ဆောင်သွားကြောင်း ဒေသခံများ ပြောပြချက် အရသိရသည်။
“မနေ့ည က သူတို့ (၃)ယောက်ကို ပါးတွေရိုက်တယ်။ သေနတ်နဲ့ချိန်ပြီး လက်သီးနဲ့ထိုးတယ်။ ခြေထောက်နဲ့ ကန်တယ်။ ပြီးတော့ ဖမ်းခေါ်သွားတာ။ ဘာကြောင့် ဖမ်းလဲ ဆိုတာ မသိရဘူး” ဟု ဒေသခံတစ်ဦးမှ သျှမ်းသံတော်ဆင့်ကို ပြောသည်။
TNLA မှ ဖမ်းဆီးသွားသူများမှာ စိုင်းလူး သည် နားခိုလျံ ကျေးရွာ၏ ရွာသူကြီးဟောင်း ဖြစ်ခဲ့သူ ဖြစ်ပြီ၊ ကျန်နှစ်ယောက်သည် ရွာသားများဖြစ်ကြောင်း သိရသည်။
” တစ်ယောက်က ရွာသူကြီးဟောင်းပါ၊။ဒါပေမဲ့ သူတို့က ဘယ်လက်နက်ကိုင်အဖွဲ့အစည်းနဲ့မှ မပက်သက်ပါဘူး၊ရိုးရိုးသားသားနဲ့ တောင်သူလယ်သမားတွေပဲဖြစ်တယ်” ဟု ပင်လုံကျေးရွာမှ ဒေသခံတစ်ဦးက သျှမ်းသံတော်ဆင့်ကိုပြောသည်။
အထက်ပါကိစ္စများနှင့်ပက်သက်ပြီး TNLA ဘက်မှ ပြောရေးဆိုခွင့်ရှိသူ ဗိုလ်မှူးမိုင်းအိုက် ကျော်ကို ဆက်သွယ်မေးမြန်းရာ အဆိုပါအကြောင်းအရာအား မသိရသေးကြောင်း သျှမ်းသံတော်ဆင့်ကို ပြောသည်။
“ဒီကိစ္စကို ကျနော် မသိရသေးပါဘူး၊ ကျနော်တို့က အပစ်မရှိတဲ့ပြည်သူကို မဖမ်းပါဘူး၊ နိုင်ငံရေးသဘောတရားအရ တပ်ဖွဲ့နဲ့ မငြိစွန်းနေဘူး ဆိုရင်မဖမ်းပါဘူး။ ဖမ်းရင်လည်း အကြောင်းကိစ္စ ခိုင်လုံမှပါ” ဟု TNLA ၏ပြောရေးဆိုခွင့်ရှိသူ မိုင်းအိုက်ကျော်က ပြောသည်။
နမ္မတူမြို့နယ် ပင်လုံကျေးရွာအုပ်စုအတွင်း တိုင်းရင်းသားလက်နက်ကိုင်အချင်းချင်း တိုက်ပွဲဖြစ်ပွားခြင်း၊ အပြန်အလှန်ဖမ်းဆီးခြင်းများ မကြာခဏ ဖြစ်ပွားသည့်နေရာတခုဖြစ်ကြောင်းသိရသည်။
