သျှမ်းပြည် မြောက်ပိုင်း မူဆယ်မြို့တွင် ပြီးခဲ့သည့် ဇွန် (၁၉) ရက်တွင် ဓားပြတိုက်ခံရပြီး အသတ်ခံရသည့် အမျိုးသမီးအလောင်းကို ယနေ့ထိ မတွေ့ရသေးကြောင်းသိရသည်။
ပိုက်ဆံနှစ်သိန်း လက်ဝယ်ထားရှိတဲ့ အမည်နေရပ်လိပ်စာမသိရတဲ့ အမျိုးသမီးတစ်ဦးကို ဓါးပြတိုက် သတ်ဖြတ် သူများ သည် အမျိုးသား သုံးဦးဖြစ်ကြပြီး တရားခံတစ်ဦးကိုတော့ ဒေသဆိုင်ရာ အဖွဲ့အစည်းများက ဖမ်းဆီး ထားရမိကြောင်းသိရသည်။
“ပိုက်ဆံ(၂)သိန်း ရဖို့ ဓားပြတိုက်လုယူရင်းနဲ့ အဲ့အမျိုးသမီးကို သတ်ပစ်တာတဲ့၊ ဓားပြတိုက်တဲ့သူတွေက (၃)ယောက်ရှိတာ တစ်ယောက် ဖမ်းမိထားပြီ၊ (၂)ယောက်က အလောင်းဖျောက်ဖို့တာဝန်ယူရင်းနဲ့နမ့်ခမ်းဖက်ထွက် ပြေးသွား တယ်လို့ သိရတယ်၊ အဲ့ကြောင့် အလောင်းက အခုထိ ရှာမရသေးဘူး” ဟု မူဆယ်မြို့မှ ဒေသခံပြည်သူတစ်ဦးက သျှမ်းသံတော်ဆင့် ကို ပြောသည်။
ဓားပြတိုက်ခံရသည့် အမျိုးသမီးသည် အမည်နေရပ်လိပ်စာ မသိရသေးပေ။
လက်ရှိ ဖမ်းဆီးထားသည့် တရားခံတစ်ဦးကို ၎င်းအမျိုးသမီးကို သတ်ပြီးနောက် ၂ ရက်အကြာ တွင် အမည်မသိ လက်နက်ကိုင်တစ်ဖွဲ့က ဖမ်းဆီးပေးခဲ့သည်ဟု ကြားသိရသည်။
မြန်မာ-တရုတ် နယ်စပ်မြို့ဖြစ်သည့် မူဆယ်မြို့တွင် ဓားပြတိုက် လူသတ်မှုများ မကြာခဏ ဖြစ်ပွားသည့် နေရာဒေသ တစ်ခု ဖြစ်ပြီး၊ စစ်တပ်မှ နိုင်ငံတော် အာဏာသိမ်းပြီးနောက် ခိုးဆိုးလုယက် ဓါးပြတိုက်မှုနှင့် အကြောင်းရင်း မသိ တရားခံမပေါ်သည့် ပစ်ခတ်သတ်ဖြတ်မှုများက ပိုမို များပြားလာကြောင်းသိရသည်။
Leave a Comments