သျှမ်းပြည်မြောက်ပိုင်း လားရှိုးမြို့နယ် မိုင်းယော်တိုက်နယ် ဒေသခံ (၂ )ဦးကို သျှမ်းပြည်တိုးတက်ရေးပါတီ၊ သျှမ်းပြည်တပ်မတော် ( SSPP/SSA) မှ တပ်သားလုပ်ရန်အတွက် လာရောက်ဖမ်းဆီးခေါ်ဆောင်သွားကြောင်း ဒေသခံများသတင်းပေးပို့ချက်အရသိရသည်။
မိုင်းယော်တိုက်နယ် တွင် ယမန့်နေ့( ဇွန် ၂၀)ရက် ည( ၉) နာရီဝန်းကျင်တွင်( SSPP/SSA) တပ်သားမှ လူအင်အား ၅ ယောက်ဖြင့် မိုင်းယော်ဒေသခံ (၂)ဦးကို လာရောက်ဖမ်းဆီးခေါ်ဆောင်သွားကြောင်းသိရသည်။
“ ညအချိန်မှာ လာရောက်ဖမ်းသွားတာ။ စစ်သားလုပ်ဖို့ဆိုပြီးလာဖမ်းသွားတယ်။ ဖမ်းခံရတဲ့ (၂) ယောက်က အသက်ကြီးပြီး။ သူတို့မှာအိမ်ထောင်ရှိကြတယ်။ ကလေးတွေက တစ်ချို့က ငယ်သေးတယ်။ သူတို့ မိသားစုအတွက် အခက်ခဲတွေ ဖြစ်နေတယ်” ဟု မိုင်းယော်ဒေသခံတစ်ဦး က သျှမ်းသံတော်ဆင့် ကို ပြောသည်။
SSPP/SSA မှ ဖမ်းဆီးသွားသည့် အရပ်သား (၂) ဦးသည် အသက် (၅၀) ဝန်းကျင်ရှိကြောင်း ဒေသခံများပြောပြချက်အရ သိရသည်။
အဆိုပါ ဒေသခံ (၂ )ဦး ကို ဖမ်းသွားသည့် ကိစ္စနှင့်ပတ်သတ်ပြီး (SSPP/SSA) ပြောရေးဆိုခွင့်ရှိသူ ဗိုလ်မှူးကြီး စိုင်းဖုန်းဟန်ကို သျှမ်းသံတော်ဆင့်မှ ဖုန်းဆက်သွယ်ရာတွင် ဖုန်းလက်ခံဖြေဆိုခြင်းမရှိပေ။
“ အရင်ကတော့ တပ်သားစုဆောင်းဖို့က သူတို့တောင်းတယ်။ လာဖမ်းယူသွားတာတော့ မရှိဘူး။ နောက်ကျရင်တော့ ဘယ်လိုရှိလာမလဲမသိဘူး” ဟု မိုင်ယော်ဒေသခံတစ်ဦးကပြောသည်။
မိုင်းယော်ဒေသသည် လာရှိုးမြို့နယ်တွင်တည်ရှိပြီး ကျေးရွာအုပ်စု ၃၁ ခုရှိပြီး၊ မိုင်းယော်ဒေသတွင် SSPP/SSA အပြင် TNLA၊ MNDAA၊ KIA နှင့် မန်ပန်ပြည်သူ့စစ်တို့လှုပ်ရှားသည့်ဒေသဖြစ်သည်။