သျှမ်းပြည်တောင်ပိုင်း ကျေးသီးမြို့ နောင်ဆွမ်းဘုန်းကြီးကျောင်းတွင် စစ်ရှောင် (၄၈၀) ကျော် အတွက် အိပ်ယာခင်း၊ စောင်များ လိုအပ်ကြောင်း စုံစမ်းသိရှိရသည်။
သျှမ်းလက်နက်ကိုင် တပ်ဖွဲ့ (၂) ဖွဲ့ အချင်းချင်း ပစ်ခတ်မှုကြောင့် နောင်ဆွမ်းစစ်ရှောင် (၄၈၇) ဦးသည် စစ်ရှောင်နေရပြီး အိပ်ယာခင်း၊ စောင်များ လိုအပ်ကြောင်း စစ်ဘေးရှောင်ကော်တီဝင် တစ်ဦးက သျှမ်းသံတော်ဆင့် ကိုပြောသည်။
“နောင်ဆွမ်းမှာက စောင်တွေ အခင်းတွေ အရမ်းလိုအပ်နေတယ်။ သူတို့ထွက်ပြေးလာတော့ အိပ်ယာခင်းတွေ စောင်တွေ မပါလာကြဘူး။ မိုးရွာတော့အေးတယ်။ ပြီးတော့ အသက်ကြီးတဲ့သူတွေ ၊ကလေးတွေများတော့ လိုအပ်တယ်။ ဘယ်အလှူရှင်မှ လာလှူတာမရှိသေးဘူး”ဟု စစ်ဘေးရှောင် ကူညီပေးသည့် ကော်မတီဝင် တစ်ဦးကပြောသည်။
လက်ရှိတွင် နှစ်ဖက် စစ်ရေးတင်းမာမှုရှိနေပြီး စစ်အင်အားများလည်း ဆက်လက်ဖြည့်တင်းနေသဖြင့် ပြည်သူများလည်း တိုက်ပွဲဖြစ်ပွားမည်ကို စိုးရိမ်ကြကြောင်း ဒေသခံများက ပြောဆိုကြသည်။
“တိုက်ပွဲနား နီးတဲ့ ရွာတွေတော့ ပြေးနေတုန်းပဲ ခုထက်ထိတော့။ ၂ ရက် ၃ ရက်လောက်တော့ ဘာအသံမှ မကြားသေးဘူး။ သူတို့ နှစ်ဖက် စစ်အင်အားဖြည့်နေတာတွေ တိုက်ပွဲတော့ မဖြစ်သေးဘူး။ တိုက်ပွဲထပ်ဖြစ်ရင် ဒေသခံတွေ ထပ်ပြေးဖို့ရှိသေးတယ်။ ဒီထက်ပိုများလာနိုင်တယ်” ဟု အသက် (၄၀) အရွယ် စစ်ရှောင် အမျိုးသားတစ်ဦး ကပြောသည်။
ကျေးသီးမြို့တွင် စစ်ရှောင် စခန်း(၄) ခုထားရှိပြီး စစ်ဘေးရှောင် ပြည်သူ (၈၀၀) ကျော်ရှိသည့်အနက် နောင်ဆွမ်းကျေးရွာရှိ စစ်ရှောင်စခန်းသည် တိုက်ပွဲဖြစ်ပွားသည့်နေရာနှင့် အနီးဆုံးနေထိုင်သည့် ဒေသခံများဖြစ်ကြသည်။
ယခုတွင် စိုက်ပျိုးရာသီဖြစ်သည့်အတွက် စိုက်ပျိုးရေး လုပ်ကိုင်ရမည့် အချိန်ဖြစ်သဖြင့် သျှမ်းတပ် (၂) တပ် တိုက်ပွဲမဖြစ်ရန် တောင်းဆိုချင်ကြောင်း စစ်ရှောင်များက ပြောဆိုကြသည်။
ဇွန် (၁) ရက်နေ့မှ စတင်ပြီး သျှမ်းတပ် (၂) တပ် တိုက်ပွဲဖြစ်ပွားသဖြင့် စစ်ပွဲကြောင့် အနီးပတ်ဝန်းကျင်ရှိ မတ်ဝေါင်းရွာ၊ ဝမ်လတ်းရွာ၊ ဟိုနားရွာ၊ ဝမ်ဟိုဖိုင်ရွာ၊ ဖိုင်မုန်ရွာ၊ နားဟျိုးရွာ စသည့် ကျေးရွာတွေက ရွာသားတွေ ရွာလုံးကျွတ်နီးပါး ထွက်ပြေးတိမ်းရှောင်နေရကြောင်း သိရသည်။
သျှမ်းလက်နက်ကိုင် (၂) ဖွဲ့ အပြန်အလှန် နယ်မြေကျူးလွန်မှုဟု ပြောဆိုကာ တိုက်ပွဲဖြစ်ပွားခဲ့ရကြောင်း ပြောဆိုထားကြသည်။
Leave a Comments