သျှမ်းပြည်မြောက်ပိုင်း သိန္နီမြို့နယ် နမ့်စလပ်ကျေးရွာ ကျေးရွာအုပ်ချုပ်ရေးမှူးတစ်ဦး သေနတ်ပစ်ခတ်ခံရပြီးနောက် ပြည်သူ များက စိုးရိမ်ထိတ်လန့်နေကြောင်း သိရသည်။

ပြီးခဲ့သည့် ဇွန် (၁၉ )ရက် မနက် (၈ )နာရီဝန်းကျင်တွင် နမ့်စလပ် ကျေးရွာအုပ်ချုပ်ရေးမှူး ဦးရွှေပ သည် ၎င်း၏ ကလေးများကို ကျောင်းပို့ပြီး၊ အိမ်ပြန်လာချိန်သည့် လမ်းတွင် အမည်မသိလက်နက်ကိုင် လူတစ်စုကသေနတ်ဖြင့် လာရောက်ပစ်ခတ်မှုဖြစ်ပွား သွားကြောင်း၊ လက်ရှိမှာ ပြင်ဦးလွင်မြို့ ဆေးရုံတွင်ဆေးကုသခံယူနေကြောင်း နမ့်စလပ်ကျေးရွာ ဒေသခံများ ပြောပြချက် အရသိရသည်။

“ဒီလို သေနတ်နဲ့လုပ်ကြံသတ်ဖြတ်မှုက ကျနော်တို့ဒေသမှာဒါက ပထမဆုံးအကြိမ်ပါပဲ။ သေနတ်ဒဏ်ရာက နဖူးရှပ်ထိ တချက် နဲ့ နောက်ဂုတ်ထိမှန်တချက်ပါ။ အစက လားရှိုးဆေးရုံပို့တယ်။ အခု ပြင်ဦးလွင်ဆေးရုံကိုလွှဲပြောင်းပေးလိုက်ပြီ” ဟု နမ့်စလပ်ဒေသခံတစ်ဦး က သျှမ်းသံတော်ဆင့်ကိုပြောသည်။

အဆိုပါ လုပ်ကြံပစ်ခတ်ခံရသည့် ဦးရွှေပသည် အသက် ၄၀ ဝန်းကျင်ရှိပြီး၊ လူထုကရွေးချယ်ခန့်အပ်ထားသော ကျေးရွာအုပ်ချုပ်ရေးမှူးတစ်ဦးဖြစ်ကာ၊ ကျေးရွာအုပ်ချုပ်ရေးမှူး သက်တမ်း ၅ နှစ်ကျော် လုပ်ဆောင်နေသူတစ်ဦးလည်း ဖြစ်သည်။

“ ဦးရွှေပ က သွက်လက်တယ်။ အခု ပြည်သူတွေ တင်မြှောက်ထားတဲ့ ကျေးရွာအုပ်ချုပ်ရေးမှူးတောင် လုပ်ကြံခံရတာ၊ မြို့တက် အသွား၊အလာလုပ်နေတဲ့ ကျနော်တို့ ဘဝတွေ က မလုံခြုံတော့ဘူး” ဟု အမည်မဖော်လိုသည့် နမ့်စလပ်ကျေးရွာ ဒေသခံ အမျိုးသားတစ်ဦးက ပြောသည်။

ကျေးရွာအုပ်ချုပ်ရေးမှူး ဦးရွှေပသည် စက်သုံးဆီပန့်ဆိုင် နှင့် ထမင်းဆိုင် ဖွင့်လှစ်ထားသည့် သူတစ်ဦးဖြစ်သည့်အတွက် အမည်မသိ လက်နက်ကိုင်တပ်ဖွဲ့က ၎င်းအား မည်သည့်အကြောင်းကြောင့် လာရောက်ပစ်ခတ်သည့်ကို မသိရှိကြောင်း လည်း နမ့်စလပ်ဒေသခံများက ပြောသည်။

“ သူ့ကို ဘာကြောင့် ပစ်လည်းဆိုတာ စဉ်းစားစရာပဲ။ ဆီဆိုင်၊ ထမင်းဆိုင်တွေလည်းပိုင်တဲ့သူတစ်ယောက်ဆိုတော့ အုပ်ချုပ်ရေးနဲ့ မဆက်နွယ်ရင် စီးပွားရေးနဲ့ ဆက်နွယ်နေလားမသိဘူး” ဟု နမ့်စလပ်ဒေသခံ တစ်ဦး ကပြောသည်။

ကျေးရွာအုပ်ချုပ်ရေးမှူး သေနတ်ပစ်ခတ်ခံရပြီးနောက် သိန္နီမြို့နယ် အတွင်းနေထိုင်သည့် ပြည်သူများသည် စိုးရိမ်ထိတ်လန့်မှုဖြစ်နေကြောင်း၊ သိန္နီမြို့နယ်အတွင်း လက်နက်ကိုင် ပေါင်းစုံ လှုပ်ရှားသည့်နေရာဖြစ်သည့်အတွက် ပြည်သူများအနေဖြင့် စိတ်မလုံခြုံကြောင်း လည်း ၎င်း က ပြောသည်။

စစ်တပ်မှ အာဏာသိမ်းပြီးနောက် တရားခံမပေါ်သည့် လုပ်ကြံပစ်ခတ်သတ်ဖြတ်မှုများသည် တစ်နေ့ထက်တစ်နေ့ များပြားလာသည့် အပြင် နမ့်စလပ်ဒေသအတွင်းမှာလည်း စစ်ကောင်စီ တပ်သားများ သွားလာလှုပ်ရှားနေသည့်အတွက် ပြည်သူများက စိုးရိမ်ထိတ်လန့်နေကြကြောင်း သိရသည်။