သျှမ်းပြည်မြောက်ပိုင်း နမ့်ခမ်းမြို့ရှိ မူးယစ်ဆေးရောင်းချနေသည့်ဆိုင်တန်းများကို သျှမ်းပြည်တိုးတက်ရေးပါတီ (SSPP/SSA) က ဝင်ရောက် မီးရှို့ဖျက်ဆီးခဲ့ကြောင်း သိရသည်။
ယနေ့ (ဇွန်လ ၂၀)ရက် မနက် (၁၀) နာရီခွဲ ဝန်းကျင်တွင် နမ့်ခမ်းမြို့ နေဝင်းရီစစ်ဘေးရှောင်စခန်း အနီးရှိ အကာအရံ အပြည့်ဖြင့် တည်ဆောက်ထားသည့် မူးယစ်ဆေးဝါး ရောင်းချနေသည့် နေရာကို (SSPP/SSA) တပ်ဖွဲ့က ဝင်ရောက်ပစ်ခတ် စီးနင်းကာ မီးရှို့ဖျက်ဆီးလိုက်ပြီး၊၎င်း စခန်းတွင်းမှ လူဦးရေ (၂၀) ထက်မနည်း ဖမ်းဆီးရမိကြောင်း စုံစမ်းသိရှိရသည်။
“SSPP အဖွဲ့ ကား(၄)စီးနဲ့လာတယ်။ ဘိန်းရောင်းတဲ့သူနဲ့ ဘိန်းစားတဲ့သူ စုစုပေါင်း ၂၀ဦးလောက်ဖမ်းခံရတယ်။ အများစု ဖမ်းခံရတာကတော့ ဘိန်းရောင်းတဲ့သူပါ” ဟု နမ့်ခမ်ဒေသခံ တစ်ဦးက သျှမ်းသံတော်ဆင့်ကို ပြောသည်။
မူးယစ်ဆေးဝါးရောင်းချသည့် ပွဲဈေးတန်းကဲ့သို့ ထင်ရလောက်အောင် ဆိုင်ခန်းများ တည်ဆောက် ကာ ခင်းကျင်းထားကြောင်း၊ ထိုမူးယစ်ဆေးဝါးရောင်းချသူများသည် ရဲများဖြင့် ပူးပေါင်းပြီး ရောင်းချနေသည် ဟုလည်း ဒေသခံများ ပြောပြချက် အရသိရသည်။
“ ဒီနေရာတော့ ရှင်းပြီးပြီ ဘယ်နေရာ ထပ်ပြီးပြောင်းရောင်းမလဲဆိုတာ မသိသေးဘူး။ ဘိန်းရောင်းတဲ့သူတွေ အမြစ်ပြတ် ဖမ်းနိုင်မှ မူးယစ်ဆေးဝါးကင်းစင်မယ်” ဟု လည်း နမ့်ခမ်းဒေသခတစ်ဦးက ပြောသည်။
နမ့်ခမ်းမြို့ ပတ်ပတ်လည်ရှိ မူးယစ်ဆးဝါး ရောင်းချသည့် စခန်းများကို ယခင်ကတည်းက ရဲတပ်ဖွဲ့ နှင့် အခြား သောတိုင်းရင်းသားလက်နက်ကိုင်အဖွဲ့အစည်းများမှ ဖမ်းဆီးနှိမ်နင်းမှုများ ရှိနေသော်လည်း မူးယစ်ဆေးဝါး ဈေးကွက်များက မြို့အနီးထိ ဆက်လက်ကျင်လည် နေသေးကြောင်း နမ့်ခမ်း ဒေသခံများက ပြောသည်။
သျှမ်းမြောက် ရွှေလီမြစ်ဝှမ်း ဒေသ( ထုန့်မောဝ်း) တွင် မူးယစ်ဆေးဝါးရောင်းဝယ်ဖောက်ကားမှု၊သုံးစွဲမှုများလာသဖြင့် ယခုလဆန်းပိုင်းတွင် ထုန်မောဝ်း ဒေသခံများက မူးယစ်ဆေးဝါးများကို ရှင်းလင်းပေးရန် SSPP/SSA ကို စာရေး တင်ပြခဲ့ကြောင်းသိရသည်။
