သျှမ်းပြည် မြောက်ပိုင်း နမ့်ခမ်းမြို့တွင်နေထိုင်သည့် သျှမ်းအမျိုးသမီးတစ်ဦးကို တအောင်း(ပလောင်း) အမျိုးသား လွတ်မြောက်ရေး တပ်မတော် (TNLA) က ဖမ်းဆီးသွားပြီး၊ ယနေ့ထိ မလွှတ်သေးကြောင်း စုံစမ်းသိရှိရသည်။
ဇွန် (၁၅) ရက် ည (၈ )နာရီ ဝန်းကျင်တွင် နမ့်ခမ်းမြို့ ပေါက်တိုက်ရပ်ကွက် တွင် နေထိုင်သည့် ဈေးသည် နန်းခမ်းအီကို ဆက်ကြေးမပေးပို့သည်ဆိုသည့် အကြောင်းပြချက်ဖြင့် လူအင်းအား (၉) ဦးသည် လက်နက်ကိုင်ဆောင်ပြီး လာရောက်ဖမ်းဆီးသွားကြောင်း၊ ထိုလာရောက်ဖမ်းသည့် သူများသည် ပလောင်(တအာင်း) ဘာသာစကားပြောဆိုကြ ကြောင်း သိရသည်။
“ သူနေအိမ်မှာလာဖမ်းသွားတာ။ ဆိုင်ကယ် (၄) စီးနဲ့ လူအင်းအားကတော့ (၉) ယောက်လောက်ရှိတယ်။ သူကို ဖမ်းပြီးဆိုင်ကယ်ပေါ်တင်သွားသေးတယ်။ ဆိုင်ကယ်က ခုန်းချပြီးအိမ်ထဲပြေးဝင်တာ အိမ်ထဲထိပြန်ဖမ်းသွားတယ်။ ပလောင်စကားတွေ ပြောကြတယ်” ဟု နမ့်ခမ်းမြို့ ဒေသခံတစ်ဦးက ပြောသည်။
ထိုဖမ်းဆီးခေါ်ဆောင်ခံရသည့် အမျိုသမီးသည် TNLA ကို အခွန်မဆောင်ခဲ့သည့် အတွက် ဖမ်းဆီးသွားခြင်းဖြစ်ကြောင်း စုံစမ်းသိရသည်။
“ သူက အခွန်မဆောင်တာ ( ၃)၊ (၄) လလောက်ရှိပြီး၊ ပြန်မလွှတ်လာသေးဘူး။ ဘာအကြောင်းမှမကြားရသေးဘူး။ အခွန်မဆောင်လို့ဆိုပြီးဖမ်းသွားတာပဲ” ဟု နီးစပ်သည့်သူတစ်ဦးက ဆိုသည်။
အဆိုပါ ထိုအမျိုးသမီးကို ဖမ်းဆီးသွားသည်ကို တအောင်း(ပလောင်း) အမျိုးသားလွတ်မြောက်ရေးတပ်မတော် TNLA ပြောခွင့်ရ ဗိုလ်မှူးကြီး မိုင်းအိုက်ကျော်ကို ဆက်သွယ်ရာတွင် “ ဒီသတင်းနဲ့ပတ်သတ်ပြီး ကျနော်တို့ ဘာမှမကြားရသေးဘူး” ဟု သျှမ်းသံတော်ဆင့်ကို ပြောဆိုသည်။
လားရှိုးမြို့နယ် နားယေးကျေးရွာနေထိုင်သည့် ပြည်သူ ( ၆ )ဦးကို ဇွန် (၁၃)ရက် တွင် TNLA မှ ဖမ်းဆီးသွားကြောင်း သတင်းရရှိသည်။
ထိုနည်းတူ ၂၀၂၀ ခုနစ် အောက်တိုဘာလ ၁၈ ရက်တွင်လည်း နမ့်ခမ်း အမျိုးသမီးတစ်ဦးကို TNLA မှ လူမှားပြီး ဖမ်းဆီးခေါ်ဆောင်သွား ခဲ့ကြောင်းသိရသည်။
နမ့်ခမ်းမြို့နယ်တွင် တိုင်းရင်းသားလက်နက်ကိုင် TNLA ။ SSPP/SSA နှင့် RCSS/SSA တို့ သွားလာလှုပ်ရှာနေသည့် အပြင် စစ်ကောင်စီ လက်အောက်ခံ ပန်ဆေးပြည်သူစစ်အပါဝင် သွားလာလှုပ်ရှာနေသည့် ဒေသဖြစ်သည်။
