သျှမ်းပြည် မြောက်ပိုင်း လားရှိုးမြို့နယ် မိုင်းကျက်ကျေးရွာအုပ်စု နားယေးကျေးရွာခံ သျှမ်းပြည်သူ ( ၆) ဦးကို တအောင်း(ပလောင်း) အမျိုးသားလွတ်မြောက်ရေးတပ်မတော် (TNLA) က နေအိမ်ထိလာရောက် ဖမ်းဆီးသွားခဲ့ကြောင်း စုံစမ်းသိရှိရသည်။
နာယေးကျေးရွာခံပြည်သူ ၆ ဦးကို ဇွန်လ (၁၃) ညနေ ၈ နာရီအချိန်တွင် လမ်းပြပေးရန်အတွက် ဟု ဆိုကာ နေအိမ်ထိလာရောက်ဖမ်းဆီးခေါ်ဆောင်သွားပြီး ယနေ့ထိ ပြန်လည် လွှတ်မြောက်လာခြင်းမရှိသေးကြောင်း၊ ၎င်းတို့သည် မည်သည့် တပ်ဖွဲ့နှင့်မှ သက်ဆိုင်ထားခြင်းမရှိကြောင်း နားယေးကျေးရွာ ဒေသခံတစ်ဦးက သျှမ်းသံတော်ဆင့်ကိုပြောသည်။
“ သူတို့ ၆ ယောက်က ဘယ်တပ်ဖွဲ့နဲ့မှ မသက်ဆိုင်ဘူး။ သူတို့က သာမန်ပြည်သူတွေပဲ။ လာဖမ်းတုန်းက သူတို့ကို လာပြပေးဖို့ဆိုပြီးလာခေါ်သွားတာ။ အခုချိန်ထိ သူတို့ ၆ ယောက် ပြန်လာသေးတာမတွေ့ရသေးဘူး” ဟု ဖမ်းဆီးခံရသူများ နှင့် နီးစပ်သူတစ်ဦး က သျှမ်းသံတော်ဆင့်ကိုပြောသည်။
လက်ရှိအချိန်ထိ TNLA မှ ဖမ်းဆီးသွားသည့် အရပ်သား (၆)ဦးကို မည်သည့်နေရာခေါ်ဆောင်သွားသည်ကို မသိရှိရကြောင်း၊ မိသားစုဝင်များလည်း စိတ်ပူနေကြကြောင်းသိရသည်။
“ ဖမ်းသွားတဲ့လူတွေက (၅)ဦးကတော့ အသက် (၃၀)အောက်ပါ။ ကျန်တစ်ယောက်က အသက် (၅၅)ယောက်ပါ။ သူတို့ရဲ့ မိသားစုဝင်တွေက စိတ်ပူနေကြတယ်။ ဘယ်နေရာဆိုတာ သိရရင်တော့ စိတ်အေးတာပေါ့” နားယေး ပြည်သူ တစ်ဦးက ဆိုသည်။
ထို နားယေးကျေးရွာခံပြည်သူ ၆ ဦးဖမ်းဆီးခံရသည့် ကိစ္စနှင့်ပတ်သတ်ပြီး TNLA ပြောရေးဆိုခွင့်ရှိသူ မိုင်းအိုက်ကျော်ကို သျှမ်းသံတော်ဆင့်မှ ဖုန်းဆက်သွယ်ရာတွင် စက်ပိတ်ထားသည်။
အလားတူ နမ္မတူမြို့နယ် ရေအိုးကျေးရွာ အမျိုးသားတစ်ဦးကို မေလ ၃၀ရက်နေ့တွင် TNLA မှ ဖမ်းဆီးသွားပြီး လက်ရှိတွင် ကျန်းမားရေးအခြေနေ စိုးရိမ်နေရကြောင်းသိရသည်။
Leave a Comments