သျှမ်းပြည်မြောက်ပိုင်း လားရှိုးခရိုင် တန့်ယန်းမြို့အခြေစိုက် မန်ပန်ပြည်သူ့စစ်သည် တန့်ယန်းမြို့ပေါ် ရပ်ကွက် လုံခြုံရေး အကြောင်းပြချက်ဖြင့် တပ်သားများစုဆောင်းနေကြောင်း စုံစမ်းသိရသည်။
မေ ၁၁ရက်တွင် မန်ပန်ပြည်သူ့စစ် က တန့်ယန်းမြို့ပေါ်ရှိ ရပ်ကွက်လူကြီးများကို အစည်းအဝေးခေါ်ယူပြီး တပ်သားစုဆောင်း ပေးရန် တောင်းဆိုခဲ့ကြောင်း၊ တပ်သားများ မပေးနိုင်ပါက တစ်ဦးလျှင် မြန်မာငွေကျပ် သိန်း (၂၀) ပေးဆောင်ရမည် ဟု တန့်ယန်းဒေသခံများ ပြောပြချက် အရသိရသည်။
တန့်ယန်မြို့ပေါ်တွင် ရပ်ကွက် (၆)ရပ်ကွက်တွင် ရာအိမ်မှူး (၁၂)ယောက်ရှိကာ မန်ပန်ပြည်သူ့စစ်ကို စစ်သားသစ် အယောက် (၁၄)ယောက်ပေးရမည်ဖြစ်ကြောင်းသိရသည်။
“ရပ်ကွက် (၆)မှာ ရာအိမ်မှူး ၁၂ယောက်ရှိတယ်။ (ဝိန်းလောင်းနဲ့ မန့်လွယ်အပါအဝင်) အဲ့ရာအိမ်မှူး (၁၂)ယောက် ကို စစ်သားသစ် တယောက်စီ ပေးဖို့တောင်တာပါ။ အဲ့ဝိန်းလောင်း နဲ့ မန့်လွယ်က (၂)ယောက်စီပေးရတယ်။မပေးနိုင်ရင်တော့ တယောက်ကို ကျပ်ငွေ သိန်း (၂၀)ပေးရမယ်” ဟု တန့်ယန်းဒေသခံ တစ်ဦး က ရှင်းပြသည်။
အဆိုပါ တန့်ယန်းမြို့ပေါ်ရပ်ကွက်အထိ တပ်သားစုဆောင်းတောင်းခံနေသည့် မန်ပန်ပြည်သူ့စစ်ခေါင်းဆောင် ဗိုလ်မွန်းဖြစ်ပြီး၊ ပြီးခဲ့သည့် ၂၀၂၀ အထွေထွေရွေးကောက်ပွဲကာလတွင် ရွေးကောက်ပွဲ အနိုင်ရရှိခဲ့လျှင် ၎င်း၏နယ်မြေအတွင်းစစ်သားစုဆောင်းကောက်ခံမှုများ မရှိ အောင်လုပ် ဆောင်သွားမည်ဟု ကတိကဝတ်ပေးခဲ့သည်။
“ မန်ပန်ပြည်သူ့စစ်က တပ်သားကောက်ခံ စုဆောင်းတယ် ဆိုတာ အမှန်ပါ၊ သူတို့ပြောပြချက်အရ တော့ ရပ်ကွက်လုံခြုံရေးအတွက် တစ်ရပ်ကွက် တစ်ယောက်နှုန်းနဲ့ စစ်သင်တန်းလာတက်ပါ၊ သင်တန်းပြီးရင် လည်း သက်ဆိုင်ရာ ရပ်ကွက်မှာပဲ လုံခြုံရေးပြန်လုပ်ရမှာ ဖြစ်ပါတယ်” ဟု ရပ်ကွက်အုပ်ချုပ်ရေးမှူး တစ်ဦးက သျှမ်းသံတော်ဆင့် ကို ပြောသည်။
လက်ရှိမှာ တန့်ယန်းမြို့ပေါ်တွင် ခိုးမှု၊လုယက်မှုများရှိနေသဖြင့် လုံခြုံရေး အတွက် ကြောင့် စစ်သင်တန်းပေးရခြင်း ဖြစ်ကြောင်းလည်း ၎င်း က ပြောသည်။
မန်ပန်ပြည်သူ့စစ်အဖွဲ့သည် တန့်ယန်းမြို့ပေါ်ရှိ ရပ်ကွက်အုပ်ချုပ်ရေးမှူးများကို သတ်မှတ်ထားသည့် တပ်သား သို့မဟုတ် တပ်သားတစ်ဦးအစားငွေကျပ် သိန်း ၂၀ ကို ၁၅ ရက်နောက်ဆုံးထားပြီး လာရောက်အပ်နှံရန် အမိန့်ပေးထား ကြောင်းသိရသည်။
အဆိုပါဒေသအတွင်းတွင် သျှမ်းပြည်တိုးတက်ရေးပါတီ (SSPP/SSA)၊ တအာင်း (ပလောင်)အမျိုးသားလွတ်မြောက်ရေးတပ်မတော် (TNLA)၊ ကိုးကန့်တပ်မတော် (MNDAA) နှင့် မန်ပန်ပြည်သူ့စစ်တို့ လှုပ်ရှားသည့်နေရာဖြစ်သည်။
Leave a Comments