သျှမ်းပြည် အခြေစိုက် မန်ပန်ပြည်သူ့ စစ်တပ်ဖွဲ့ဝင်များက တိုင်းရင်းသား လက်နက်ကိုင် တပ်ဖွဲ့ထံ ဝင်ရောက်ခိုလှုံမှု ရှိနေကြောင်း စုံစမ်းသိရသည်။

သျှမ်းပြည် မြောက်ပိုင်းတွင် နိုဝင်ဘာ ၂၇မှစတင်သည့် “1027” စစ်ဆင်းရေးကြောင့် စစ်ကောင်စီတပ်ဖွဲ့နှင့် မြောက်ပိုင်းမဟာမိတ်(၃)ဖွဲ့တို့ကြာ စစ်ရေးတင်းမာလာပြီး၊ ညီနောင်မဟာမိတ်တပ်ဖွဲ့ (၃)ဖွဲ့သည် စစ်ကောင်စီ၏ တပ်စခန်း (၃၀၀)ကျော် သိမ်းပိုက်ခဲ့ပြီး စစ်ကောင်စီတပ်သား (၄၀၀၀)ကျော်သည် လက်နက်ချ အညံ့ခံခဲ့သည်။

ထိုထဲတွင် စစ်ကောင်စီလက်အောက်ခံ မန်ပန်ပြည်သူ့စစ်တပ်ဖွဲ့သည်လည်း နီးစပ်ရာ တိုင်းရင်းသား လက်နက်ကိုင် တပ်ဖွဲ့များသို့ လက်နက်ချ ခိုလှုံမှု ရှိနေကြောင်း သိရသည်။

ပြီးခဲ့သည့် ဇန်နဝါရီလ ၇ နှင့် ၈ ရက်နေ့တို့တွင် လားရှိုးမြို့နယ် အတွင်း သွားလာလှုပ်ရှားသည့် မန်ပန်ပြည်သူ့ စစ်တပ်ဖွဲ့ဝင်တချို့က တိုင်းရင်းသား လက်နက်ကိုင် တပ်ဖွဲ့ဖြစ်သည့် ရှမ်းပြည်တိုးတက်ရေးပါတီ၊ ရှမ်းပြည် တပ်မတော် (SSPP/SSA) နှင့် တအာင်း (ပလောင်) အမျိုးသား လွတ်မြောက်ရေး တပ်မတော် TNLA ထံသို့ ဝင်ရောက်ခိုလှုံမှု ရှိနေကြောင်း ဖြစ်စဥ်ကို သိရှိသည့် အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

“လောက်ကိုင်တို့၊ ကွန်လုံတို့ ကျသွားပြီးတဲ့နောက် တန့်ယန်းတို့၊ လားရှိုးတို့ကိုလည်း ဝင်သိမ်းမယ်ဆိုပြီး သတင်း တွေ ထွက်ခဲ့တာလေ။ အဲ့တာကြောင့် ပြည်သူ့စစ် (မန်ပန်ပြည်သူ့စစ်)ကလည်း သူတို့ကို လာတိုက်မှာ ကြောက်လို့ ထင်တယ်။ အဲ့လို နီးစပ်ရာ၊ အဆင်ပြေရာကို လက်နက်ချပြီး ဝင်ရောက်ခိုလှုံကြတာ။ အင်အား အတိအကျတော့ မသိရသေးဘူး” ဟု ဖြစ်စဥ်ကို သိရှိသည့် အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

ထို့အပြင် စစ်ကောင်စီ လက်အောက်ခံ တခြားပြည်သူ့စစ် တပ်ဖွဲ့ဝင်များကလည်း နီးစပ်ရာ ၊ အဆင်ပြေရာ တိုင်းရင်း သားလက်နက်ကိုင်တပ်ဖွဲ့ထံသို့ ခိုလှုံဝင်ရောက်မှု ရှိနေကြောင်းလည်း အထက်ပါ အမျိုးသား က သျှမ်းသံတော်ဆင့်ကို ဆက်ပြောသည်။
အထက်ပါ ကိစ္စ ဖြစ်စဥ် နှင့် ပတ်သက်ပြီး (SSPP/SSA) နှင့် (TNLA) တို့၏ ပြောရေးဆိုခွင့်များထံသို့ ဆက်သွယ်မေးမြန်းခဲ့သော်လည်း ဖုန်းလက်ခံ ဖြေကြားခြင်း မရှိပေ။

အာဏာသိမ်း စစ်ကောင်စီတပ်နှင့် မဟာမိတ် ပူးပေါင်းတပ်ဖွဲ့တို့၏ ၁၀၂၇ စစ်ဆင်ရေးကြောင့် သျှမ်းပြည် မြောက်ပိုင်းရှိ မြို့နယ်တော်တော်များများ၌ နှစ်ဖက်စစ်ရေး ပြင်းထန်နေလျက်ရှိပြီး နေအိမ် အဆောက်အအုံများ ထိခိုက်ပျက်စီးခြင်း၊ အရပ်သား ထိခိုက်သေဆုံးခြင်းများလည်း ရှိနေသည်။