သျှမ်းပြည်၊ လားရှိုးခရိုင် တန့်ယန်းမြို့နယ်အတွင်း လောင်းကစားဝိုင်း ရက်ရှည်ဖွင့်လှစ် ဆော့ကစားနေကြောင်း စုံစမ်းသိရသည်။
ပြီးခဲ့သည့် ဖေဖော်ဝါရီလ ဆန်းပိုင်းမှ စတင်ကာ တရုတ်နှစ်သစ်ကူးကို အကြောင်းပြပြီး တန့်ယန်းမြို့၊ အမှတ် (၆) ရပ်ကွက် အတွင်း၌ လောင်းကစားဝိုင်းများကို ဖွင့်လှစ်ဆော့ကစားခဲ့ကြကြောင်း အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“သူတို့ စစလာဖွင့်တုန်းက ဖဲဝိုင်း၊ လေးကေောင်ဂျင်၊ မၢၵ်ၵိင်ႈလွႆ တွေပါတယ်။ နောက်ပိုင်း တစ်ရက် နှစ်ရက် လောက်နေတော့ ငါးပစ်ဂိမ်းတွေပါ ဖွင့်လာကြတာ။ အဲ့လောင်းကစားဝိုင်းပတ်ပတ်လည်မှာ ပြည်သူ့စစ်တွေက လုံခြုံရေးယူပေးထားတယ်။ လာဆော့တဲ့သူတွေကလည်း နယ်ခံရော၊ မဟုတ်တာရော အများကြီးပဲ” ဟု လုံခြုံရေးအရ အမည်မဖော်လိုသည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ လောင်းကစားဝိုင်းဖွင့်လှစ်ခြင်း နှင့် ပတ်သက်ပြီး လောင်းကစားဒိုင်များက ဌာနေ ပြည်သူ့စစ် တပ်ဖွဲ့ နှင့် ပူးပေါင်းကာ ဖွင့်လှစ်ခြင်း ဖြစ်သည့်အတွက် ဒေသခံများက ကန့်ကွက်လိုကြသော်လည်း ကြောက်ရွံ့နေရ ကြောင်းလည်း သိရသည်။
အဆိုပါ လောင်းကစားဝိုင်း၌ ဒိုင်ပေါင်း ၁၀ ကျော် ရှိနေပြီး ၊ လာရောက်ဆော့ကစားသူများလည်း နေရော/ညပါ အလွန်များပြားသည့် အတွက် အနီးပတ်ဝန်းကျင်တွင် နေထိုင်သည့် ဒေသခံများအတွက် အနှောင့်အယှက် ဖြစ်ရကြောင်းလည်း ၎င်းဆိုသည်။
“တရုတ်နှစ်သစ်ကူး မတိုင်ခင် ကတည်းက ဖွင့်ပြီးဆော့ကြတာ နေ့တိုင်း အသံတွေ ဆူညံနေတာပဲ။ အဲ့လောင်းကစားဝိုင်းရှိတဲ့နေရာက လမ်းဘေး ၊ နတ်စင်လည်း ရှိနေတော့ တခါတလေ လမ်းတောင်ပိတ်တယ်။ ကျနော်တို့လို ဒေသခံတွေအတွက်တော့ အရမ်းစိတ်ဆင်းရဲရတယ်။” ဟု အထက်ပါ အမျိုးသားက ထပ်လောင်းပြောသည်။
တန့်ယန်းမြို့ ၊ အမှတ် (၆) ရပ်ကွက်အတွင်း ဖွင့်လှစ်ဆော့ကစားနေသည့် လောင်းကစားဝိုင်းကို လုံခြုံရေး ယူပေးနေသည့် ပြည်သူ့စစ် တပ်ဖွဲ့သည် မန်ပန်ပြည်သူ့စစ်တပ်ဖွဲ့ ဖြစ်ကြောင်း ဒေသခံများက ပြောဆိုသော်လည်း သျှမ်းသံတော်ဆင့် အနေဖြင့် သီးခြား အတည်ပြုချက် မရနိုင်သေးပေ။
ယနေ့ ဖေဖော်ဝါရီလ ၁၅ ရက်နေ့သည် လောင်းကစားဝိုင်းဖွင့်လှစ်ခွင့် နောက်ဆုံးနေ့ရက်ဖြစ်သော်လည်း တချို့ လောင်းကစားဝိုင်းက ဆက်လက်ဖွင့်လှစ်နေဆဲဖြစ်ကြောင်းလည်း ဒေသခံများက သျှမ်းသံတော်ဆင့်ကို ပြောသည်။
စစ်တပ်မှ နိုင်ငံတော် သိမ်းယူပြီး နောက်ပိုင်း သျှမ်းပြည် အတွင်း လောင်းကစားဝိုင်းဖွင့်လှစ် ဆော့ကစားမှု များပြားလာသည့် နည်းတူ ဒေသအတွင်း ခိုးဆိုးလုယက်မှုများ၊ ဓါးပြတိုက်မှုများ ရှိလာသည်။
