သျှမ်းပြည်မြောက်ပိုင်း လားရှိုးမြို့တွင် ကိုဗစ်-၁၉ ရောဂါပိုးတွေ့ရှိသူ (၃၃)ဦးရှိလာသည့်အတွက် မြို့၊အဝင်၊အထွက်၌ ကျန်းမာရေး စစ်ဆေးရေးဂိတ် ပြန်လည်ဖွင့်လှစ်လိုက်ကြောင်း စုံစမ်းသိရသည်။
လားရှိုးမြို့တွင် ဇွန် (၈ )ရက်မှ စပြီး ဇွန် (၁၁) ရက်အထိ ကိုဗစ်-၁၉ ပိုးတွေ့ရှိသူ စုစုပေါင်း (၃၃) ဦးအထိမြင့်တက်လာသည့် အတွက် လားရှိုးမြို့ဝင်၊ထွက်တွင် ကျန်းမာရေး စစ်ဆေးရေးဂိတ်ကို ယနေ့ (ဇွန် ၁၂)ရက်မှ စကာ သက်ဆိုင်ရာ တာဝန်ရှိသူများနှင့် ကျန်းမာရေး ဝန်ထမ်းများပူးပေါင်းကာ စစ်ဆေးမှု ပြုလုပ်နေကြောင်း လားရှိုးဒေသခံများ က ပြောသည်။
“လားရှိုးမြို့အဝင်မှာ ကျန်းမာရေးစစ်တဲ့ ဂိတ်တွေအကုန်လုံးက ဒီနေ့ စစစ်နေပါပြီ။ အဓိကတော့မြို့ အဝင်၊အထွက် ခရီးသွားရာဇာဝင်ယူနေတာပါ။ Qတော့ မဝင်ခိုင်းသေးပါဘူး” ဟု လားရှိုးဒေသခံတဦးက ဆိုသည်။
လားရှိုးမြို့နယ် ကိုဗစ်-၁၉ ရောဂါကာကွယ် ထိန်းချုပ်ကုသရေးမြို့နယ်အဆင့် လုပ်ငန်းကော်မတီမှ လားရှိုး မြို့သို့ လာရောက်မည်ဆိုပါက ရောဂါကာကွယ် ဆေး ၁ ကြိမ် (သို့မဟုတ်) ၂ ကြိမ်ထိုးနှံပြီးကြောင်း ကျန်းမာ ရေးဌာနများမှ ထုတ်ပေးထားသောလက်မှတ်စာရွက်နှင့်အတူ (၂)ပတ်အတွင်း ကိုဗစ်-၁၉ ရောဂါပိုး ကင်းရှင်း ကြောင်း Swab တို့ဖတ်စစ်ဆေးထားသည့် လက်မှတ်စာရွက်တို့ ပါရှိရမည်ဖြစ်ကြောင်း လားရှိုး ကျန်းမာရေး ဌာန က ထုတ်ပြန်ထားသည်။
သျှမ်းတောင် ဟိုပုံးမြို့တွင်လည်း Non-CDM ဆရာမ (၂)ဦး ကိုဗစ်-၉ ပိုးတွေ့ရှိသူ၊ ၎င်းနှင့် နီးစပ်သည့် ဆွေမျိုး (၂)ဦးလည်း ကိုဗစ်-၁၉ ပိုးတွေ့ရှိထားကြောင်း သိရသည်။
စစ်တပ်မှ နိုင်ငံတော်အာဏာသိမ်းပြီးနောက်ပိုင်း ကိုဗစ်-၁၉ ရောဂါ စစ်ဆေးမှုကို ကောင်းမွန်စွာ မပြုလုပ်နိုင်ပေ။
ထို့ပြင် ကျန်းမာရေးဝန်ထမ်းများကလည်း စစ်အစိုးရ အုပ်ချုပ်မှု လက်အောက်တွင် တာဝန်မထမ်းဆောင်လိုသဖြင့် အာဏာဖီဆန်ရေး( CDM) ပြုလုပ်သူ များပြားသောကြောင့် တတိယလှိုင်း ကိုဗစ်-၁၉ ရောဂါပိုး ကူးစက်ပျံနှံ့မှု အခြေအနေသည် ပြည်သူများက နိုင်ငံရေးနှင့်အတူ သတိထား စိုးရိမ်နေရကြောင်းလည်း ပြည်သူတစ်ဦးက သျှမ်းသံတော်ဆင့် ကိုပြောသည်။
Leave a Comments