သျှမ်းပြည်မြောက်ပိုင်း နမ္မတူမြို့နယ် ချောင်းဆာကျေးရွာအုပ်စု ရေအိုးကျေးရွာတွင် တအာင်း(ပလောင်)အမျိုးသားလွတ်မြောက်ရေး တပ်မတော် (TNLA )မှ ဖမ်းဆီးသွားသည့် အသက် (၅၃)အရွယ်ရှိ အမျိုးသားတစ်ဦး ကျန်းမာရေး အခြေအနေ စိုးရိမ်နေရကြောင်း စုံစမ်းသိရှိရသည်။
ထိုအသက်(၅၃)နှစ်အရွယ်ရှိ ဦးထွန်းအုပ်ကို မေ (၃၀)ရက် တွင် RCSS/SSA ၏ သတင်းပေးသူဟု စွတ်စွဲကာ TNLA မှ ဖမ်းဆီးခေါ်ဆောင်သွားခြင်းဖြစ်ကြောင်း ဦးထွန်းအုပ်၏ သမီးဖြစ်သူက သျှမ်းသံတော်ဆင့် ကို ပြောသည်။
လက်ရှိဦးထွန်းအုပ်သည် ဖမ်းဆီးခံထားရသည့် ရက်ပေါင်း (၁၀)ရက်အတွင်း မြေကြီးပေါ်တွင် အိပ်စက်ရပြီး၊ ခန္ဓာကိုယ်ကို ကြိုးဖြင့် တုတ်နှောင်ခံထားရကြောင်း သိရသည်။
“ ကျန်းမာရေးခြေနေမကောင်းဘူး။ သူ(TNLA )တို့က အဖေ့ကို မြေကြီးပေါ်မှာအိပ်ခိုင်းတယ်။ ပြီးတော့ လည်ပင်းနဲ့ ရင်ဘတ်ကို ကြိုးတုတ်ထားတယ်။ အပြင်တွေလည်းပေးမသွားဘူး။ သူတို့ စစ်ဆေးဖို့ဆိုပြီးဖမ်းသွားတယ်” ဟု ၎င်း ၏ သမီးဖြစ်သူက သျှမ်းသံတော်ဆင့်ကိုပြောသည်။
တိုင်းရင်းသားလက်နက်ကိုင် အချင်းချင်း တိုက်ပွဲဖြစ်ပွားမှုကြောင့် ရေအိုးကျေးရွာနေအိမ် တချို့ မီးလောင်ကျွမ်းခဲ့ရပြီး၊ ထိုထဲတွင် ဦးထွန်းအုပ်နေအိမ်အပါအဝင်ဖြစ်သည်။
ထို့ကြောင့် ဦးထွန်းအုပ်သည် မေ (၃၀)ရက် အိမ်သန့်ရှင်းရေး ပြန်လုပ်နေစဉ် TNLAမှ လာရောက်ဖမ်းဆီးသွားကြောင်း သိရသည်။
“ ကျမတို့အိမ်က မီးလောင်းဆုံးရှုံးသွားတယ်။ အိမ်သန့်ရှင်းရေးပြန်လုပ်ဖို့ဆိုပြီးရွာထဲပြန်သွားပြီး ဖမ်းခံရတာ။ ကျေးရွာဥက္ကဌ ဦးကြာယုံကို RCSS ကဖမ်းသွားတဲ့ ကိစ္စနဲ့ပတ်သတ်ပြီးတော့ ကျမရဲ့ အဖေကို လာဖမ်းသွားတယ် တကယ်တော့ ကျမအဖေက ဘာသတင်းထောက်မှလည်းမလုပ်ပေးရဘူး။” ဟု ၎င်းက ရှင်းပြသည်။
၎င်း၏ အဖေသည် မည်သည့်တပ်ဖွဲ့ကိုမှ သတင်းထောက်လုပ်ပေးခြင်းမရှိကြောင်း၊ ဦးထွန်းအုပ် ကျန်းမာရေးအခြေနေသည် အလွန်စိတ်ပူရသောကြောင့် အမြန်ဆုံးပြန်လွှတ်လာပေးရန်အတွက် သမီးဖြစ်သူက တောင်းဆိုလိုက်သည်။
TNLAမှ ဦးထွန်းအုပ်ကို ဖမ်းဆီးသွားသည့် ကိစ္စနှင့် ပတ်သက်ပြီး TNLA မှပြောရေးဆိုခွင့်ရှိသူ ဗိုလ်မှူး မိုင်းအိုက်ကျော်ကို သျှမ်းသံတော်ဆင့် ဆက်သွယ်ခဲ့သော်လည်း ဖုန်းစက်ပိတ်ထားသည်။
နမ္မတူမြို့နယ် ပန်လုံ နှင့်ချောင်းဆာ ကျေးရွာအုပ်စုတွင် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် RCSS/SSA နှင့် မြောက်ပိုင်းမဟာမိတ်တို့ မကြာခဏ တိုက်ပွဲဖြစ်ပွားသည့်နေရာဖြစ်ပြီး၊ ထိုဒေသတွင် ပြည်သူများကို လက်နက်ကိုင် တပ်ဖွဲ့ကအပြန်အလှန် ဖမ်းဆီးမှု မကြာခဏ ပြုလုပ်နေသည့် ဒေသတစ်ခုလည်းဖြစ်သည်။
ရေအိုးကျေးရွာ ဥက္ကဌ ဦးကြာယုံ နှင့် ၎င်း ၏ သား ၂ဦးကို လွန်ခဲ့သည့် ၂လတွင် RCSS/SSA က ဖမ်းဆီးခဲ့ကြောင်း သိရသည်။
ထိုနေရာတွင် တိုင်းရင်းသားလက်နက်ကိုင်အချင်းချင်း တိုက်ပွဲပြင်းထန်းမှုကြောင့် ပြည်သူများ ၂ လကျော် တိုက်ပွဲထွက်ပြေး တိမ်းရှောင်နေရပြီး နေအိမ် ၁၂၁ အိမ် မီးလောင်းဆုံးရှုံးခဲ့ရကြောင်း သိရသည်။
