သျှမ်းပြည်တောင်ပိုင်း ဟိုပုံးမြို့ စစ်အာဏာဖီဆန်ရေးလှုပ်ရှားနေသည့် CDM ပညာရေးဝန်ထမ်းများ၏ လစ်လပ်နေရာကောင်းများကို Non-CDM များက လုယက်ယူဆောင်နေကြောင်း စုံစမ်းသိရသည်။

ဖေဖော်ဝါရီ ၁ ရက်မှ စတင်ကာ စစ်အာဏာသိမ်းပြီးနောက် မြန်မာတဝှမ်း အစိုးရဝန်ထမ်းများ CDM ပြုလုပ်ကြပြီး၊ ထို CDM ပြုလုပ်သူများကို စစ်ကောင်စီ က ရာထူးမှ ထုတ်ပယ်ခဲ့သည်။

ထို CDM ပြုလုပ်သည့် နေရာကောင်းများကို စစ်ကောင်စီ လက်အောက်တွင်တာဝန်ထမ်းဆောင်နေသော Non-CDM ပညာရေးဝန်ထမ်းတစ်ချို့က လာဘ်ပေးကာ ရာထူးနေရာ လုယူနေကြောင်း ဟိုပုံးမြို့ CDM ပညာရေး ဝန်ထမ်းများက သျှမ်းသံတော်ဆင့်ကို ပြောသည်။

ဟိုပုံးမြို့နယ် ကျေးရွာဖက်တွင် တာဝန်ကျနေသည့် Non-CDM ပညာရေးဝန်ထမ်းများသည် မြို့ပေါ် အထက်တန်းကျောင်း နေရာပြောင်းရွှေ့ ရန် အတွက် စစ်ကောင်စီ အုပ်စုကို ပေးနေသည်ဟု CDM ပညာရေး ဝန်ထမ်းက ပြောသည်။

“ သူတို့က ပိုက်ဆံများများပေးနိုင်ရင် ရာထူးကောင်းကောင်းပိုရမယ်။ မြန်မြန်လာပေးနိုင်ရင် မြန်မြန်ရမယ်ပြောတယ်။ ပိုက်ဆံပိုပေးနိုင်တဲ့သူက ပိုရမယ်။ လာပေးတဲ့ဆရာမတွေလဲရှိတယ်။ မနေ့က ဆို လာကြတယ်။ ရွာဖက်ကနေဆရာမတွေ တော်တော်များများတက်လာကြတယ်” ဟု ၎င်းကဆိုသည်။

ဆက်လက်ပြီး ဟိုပုံးမြို့ CDM ပြုလုပ်သည့် အထက်တန်းကျောင်းဆရာမ တစ်ဦး က “ ကျမတို့CDM လုပ်ကတည်းကိုက အကုန်လုံးကို စွန်လွတ်ထားလိုက်ပြီး။ ဘာကိုမှ မနှမြောဘူး။ ရာထူးတွေလည်းမမက်ဘူး။ အာဏာသိမ်းပြီးကတည်းက ကျမတို့ CDM လုပ်ဖို့ဘဲသိတယ်။ ကျမတို့ အဆုံးထိတိုက်ပွဲဝင်သွားမှာပါ။” ဟုဟိုပုံးမြို့ CDM ဆရာမ တစ်ဦး ကပြောသည်။

ဟိုပုံးမြို့တွင်ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက် အာဏာဖီဆန်ရေး CDM ပညာရေးဝန်ထမ်း စုစုပေါင်း ၂၀၄ ဦးရှိကြောင်း သိရသည်။

ဟိုပုံးမြို့တွင် ပအိုဝ်းအမျိုးသားအဖွဲ့ချုပ် (PNO) တည်ရှိရာနေရာဖြစ်ပြီး၊ ဟိုပုံးမြို့ လူငယ်များသည် စစ်အာဏာရှင်ကို ဆန့်ကျင်ရာ တွင် လမ်းပေါ်ဆန္ဒပြရန် ခက်ခဲသည့် ဒေသတခုဖြစ်သည်။