ကျေးသီးမြို့နယ် နောင်ဆွမ်း စစ်ရှောင် (၄၀၀)ကျော် ကျန်းမာရေးစောင့်ရှောက်မှုလိုအပ်

0

သျှမ်းပြည်တောင်ပိုင်း ကျေးသီးမြို့နယ်ရှိ နောင်ဆွမ်းဘုန်းကြီးကျောင်းရှိ စစ်ရှောင် (၄၀၀) ကျော်အတွက် ကျန်းမာရေးစောင့်ရှောက်မှု လိုအပ်ကြောင်း စုံစမ်းသိရှိရသည်။

သျှမ်းလက်နက်ကိုင်တပ်ဖွဲ့ (၂) ဖွဲ့ အချင်းချင်း ပစ်ခတ်မှုကြောင့် နောင်ဆွမ်းစစ်ရှောင် (၄၀၀) ကျော် စစ်ရှောင်နေရပြီး လက်ရှိတွင် မိုးရာသီရောက်သဖြင့် ကျန်းမာရေး စောင့်ရှောက်မှုလိုအပ်ကြောင်း စစ်ဘေးရှောင်တစ်ဦး က သျှမ်းသံတော်ဆင့် ကို ပြောသည်။

“ ကလေး နဲ့ မိခင်တွေ နေမကောင်းကြတာများတယ်။ ကျန်းမာရေး စောင့်ရှောက်မှုတွေ လိုအပ်နေတယ်။ ခြင်ထောင်တွေ စောင်တွေလည်း လိုအပ်နေတယ်” ဟု စစ်ရှောင်တစ်ဦး က သျှမ်းသံတော်ဆင့် ကိုပြောသည်။

ဇွန် (၁) ရက်နေ့မှစပြီး စစ်ရှောင်စခန်းမှာ လာရောက်ခိုလှုံနေပြီး တိုက်ပွဲရေရှည်ဖြစ်လျှင် စားသောက်ရေးပိုင်းလည်း အခက်ခဲဖြစ်လာနိုင်ကြောင်း စုံစမ်းသိရှိရသည်။

“အစားအသောက်ကတော့ ပြီးခဲ့တဲ့ ၂ ရက် ၃ ရက်လောက်ကအလှူရှင်တွေ ဆက်တိုက်လာလှူထားတာရှိတယ်။ ရေရှည်တော့ အခက်ခဲဖြစ်လာမယ်။ စောင် နဲ့ ခြင်ထောင်တော့ မရှိသေးဘူး။ မိုးတွင်းရောက်ပြီဆိုတော့ တုတ်ကွေးတွေ ဖြစ်လာမှာကို စိုးရိမ်တယ်” ဟု အသက် (၄၀) ဝန်းကျင်ခန့် စစ်ရှောင် အမျိုးသားတစ်ဦးကပြောသည်။

ယခုတွင် စိုက်ပျိုးရာသီဖြစ်သည့်အတွက် စိုက်ပျိုးရေး လုပ်ကိုင်ရမည့် အချိန်ဖြစ်သဖြင့် သျှမ်းတပ်(၂) တပ် တိုက်ပွဲမဖြစ်ရန် တောင်းဆိုချင်ကြောင်း စစ်ရှောင်များက ပြောဆိုကြသည်။

သျှမ်းတပ် (၂) တပ် တိုက်ပွဲ ဆက်လက်ဖြစ်ပွားနေသဖြင့် စစ်ရှောင် (၁၀၀၀)ကျော် အတွက် စားဝတ်နေရေး ခက်ခဲကြောင်းလည်း သတင်းရရှိသည်။

တိုက်ပွဲကြောင့် အနီးပတ်ဝန်းကျင်ရှိ မတ်ဝေါင်းရွာ၊ ဝမ်လတ်းရွာ၊ ဟိုနားရွာ၊ ဝမ်ဟိုဖိုင်ရွာ၊ ဖိုင်မုန်ရွာ၊ နားဟျိုးရွာ စတဲ့ ကျေးရွာတွေက ရွာသားတွေ ရွာလုံးကျွတ်နီးပါး ထွက်ပြေးတိမ်းရှောင်နေရကြောင်း သိရသည်။

ယနေ့ ဇွန် (၁၀) ရက်တွင်လည်း သျှမ်းတပ် (၂) တပ်တိုက်ပွဲများ ပြင်းထန်ကြောင်း စုံစမ်းသိရှိရသည်။

သျှမ်းလက်နက်ကိုင် (၂)ဖွဲ့ အပြန်အလှန် နယ်မြေကျုးလွန်မှုဟု ပြောဆိုကာ တိုက်ပွဲ ဆက်တိုက်ဖြစ်ပွားခဲ့ရကြောင်း စုံစမ်းသိရှိရသည်။

Leave a Comments