သျှမ်းတောင် ကျေးသီးမြို့ အတွင်း တိုက်ပွဲငြိမ်ပြီဟုဆိုကာ နေရပ်ပြန်သွားသည့် စစ်ရှောင် (၃၀၀)ဝန်းကျင် ထပ်မံ စစ်ရှောင်လာရကြောင်း စုံစမ်းသိရသည်။
ယမန်နေ့ (ဇွန် ၈)ရက် မနက် (၉ )နာရီကျော်ဝန်းကျင်တွင် ကျေးသီးမြို့ရှိ စစ်ဘေးရှောင် (၁၀၀၀)ခန့် မှ (၃၀၀) ဝန်းကျင် သည် တိုက်ပွဲငြိမ်ပြီဟုဆိုကာ နေရပ်သို့ပြန်သွားကြသည်။
သို့သော် ကျေးသီးမြို့နယ်အတွင်း သျှမ်းတပ်(၂)တပ်ဖြစ်သည့် RCSS/SSA နှင့် SSPP/SSA တို့သည် ယမန်နေ့ အတွင်း တိုက်ပွဲပြန်ဖြစ်ပွားသဖြင့် စစ်ရှောင်စခန်းသို့ ည(၇)နာရီ ပြန်လည်ရောက်ရှိလာကြောင်း ကျေးသီးမြို့နယ် ဟော်ခမ်း ဘုန်းကြီးကျောင်း မှ ဦးဇင်းတစ်ပါး က သျှမ်းသံတော်ဆင့် ကို မိန့်ကြားသည်။
“ ပြည်သူတွေကတော့ အရမ်းငြိမ်းချမ်းချင်နေပြီ၊ မနေ့ မနက်ပိုင်းကတော့ ပစ်ခတ်သံတွေမကြားရလို့ စစ်ဘေးရှောင် တစ်ချို့ ကတော့ ပြန်သွားပါပြီ၊ ဒီကာလမှာ စိုက်ပျိုးရေးကာဆိုတော့လည်း ပူရတယ်ဆိုတော့ ပြန်သွားကြတာ၊ညနေပိုင်းမှာ သေနတ် သံတွေပြန် ကြားရင်တော့ ပြန်လာကြရတယ်” ဟု ဦးဇင်းက မိန့်သည်။
လက်ရှိတွင် ကျေးသီးမြို့ပေါ်ရှိ နေရပ်မပြန်ရသေးသည့် စစ်ဘေးရှာင်များသည် နောင်ဆွမ်းဘုန်းတော်ကြီး ကျောင်းမှ (၇၀၀) ကျော်၊ ကမ္မထမ်းကျောင်းမှ ( ၇၄ ) ဦး၊ ဘောင်အုတ်ဘုန်းတော်ကြီးကျောင်းမှ ( ၃၃) ဦး နှင့် သုဝန္နသီရိ ဘုန်းတော်ကြီး ကျောင်း မှ ( ၁၅၅) ဦး တို့ဖြစ်ကြောင်းသိရသည်။
“ကျန်နေသေးတဲ့ စစ်ဘေးရှောင်တွေကတော့ အခြေအနေကို ကြည့်ရအုံးမယ်၊ မနေ့က အစောပိုင်းမှာ ပစ်ခတ်သံတွေ မကြား ရလို့ ပြန်တဲ့သူတချို့ကတော့ ညနေပိုင်း ပစ်ခတ်သံတွေ ပြန်ကြားရလို့ ပြန်ရောက်လာကြတယ်၊ အခုထိ နှစ်ဖက်စလုံး စစ်ရေးတင်းမာမှုက ရှိနေသေးတယ်” ဟု စစ်ဘေးရှောင်တစ်ဦးက သျှမ်းသံတော်ဆင့်ကို ပြောသည်။
ကျေးသီးမြို့နယ် လွယ်ဟွန်းတောင် ကြောတွင် ဇွန်လ ၁ ရက်နေ့မှ စတင်ခဲ့သည့် RCSS နှင့် SSPP တို့သည် အပြန်အလှန် နယ်မြေကျူးကျော်သည် ဆိုသည့် အကြောင်းပြချက်ဖြင့် တိုက်ပွဲဖြစ်ပွားကာ စစ်ဘေးရှောင် (၁၀၀၀ )ဝန်းကျင် ထွက်ပြေး တိမ်းရှောင်ခဲ့ကြောင်း သိရသည်။
Leave a Comments