နမ္မတူမြို့နယ် ပန်လုံးကျေးရွာ ပြည်သူတစ်ဦးကို SSPP/SSA မှ ဖမ်းခေါ်သွား

0

သျှမ်းမြောက် နမ္မတူမြို့နယ် ပန်လုံးကျေးရွာမှ ပြည်သူတစ်ဦးကို ရှမ်းပြည်တိုးတက်ရေးပါတီ (SSPP/SSA ) က လာရောက် ဖမ်းဆီးခေါ်ဆောင် သွားခဲ့ကြောင်း သတင်းရရှိသည်။

ပန်လုံးကျေးရွာ လုံးခေးလိန် ကို ယမန့်နေ့ ဇွန် (၇) ရက် ည ၉ နာရီတွင် နေအိမ်သို့ ကား (၂) စီးဖြင့် လာရောက် ဖမ်းဆီးခေါ်ဆောင် သွားကြောင်း၊ ၎င်းသည့် RCSS/SSA နှင့် စီးပွားပတ်သတ်မှုရှိသောကြောင့် လာရောက်ဖမ်းဆီးသွား ကြောင်းသိရသည်။

“ သူတို့မနေ့ညက လာခေါ်သွားတယ်။ ခေါ်ပြီး စစ်ဆေးမယ်လို့ပဲပြောပါတယ်။ စိတ်မပူနဲ့တဲ့။ ဒီတိုင်းဘဲ စစ်ဆေးဖို့ခေါ်တာဘဲရှိတယ်တဲ့။ ပြည်သူတွေအချင်းချင်းတိုင်းကြားလို့ လာဖမ်းသွားတယ်လို့ပဲ ထင်ပါတယ်။ ကျမလည်းသေချာမသိဘူး” ဟု နမ္မတူမြို့နယ် ဒေသခံတစ်ဦးက ပြောသည်။

လုံးခေးလိန်သည် လက်ရှိလုပ်နေသည့် စီးပွားရေးသည် ၎င်းကိုယ်ပိုင်အဖြစ်လုပ်ကိုင်နေသည်ဖြစ်ကြောင်း ဆရာတော် တစ်ပါးက မိန့်ကြားသည်။

“ သူက ခြံကိစ္စတွေနဲ့ ပတ်သတ်ပြီးတော့ ခေါ်သွားတယ်လို့ပြောတယ်။ အရင်က RCSS နဲ့ ပေါင်းပြီးခြံအတူ လုပ်တယ်လို့ ပြောတယ်။ သူလဲ RCSS ဖက်ကို အကြွေးဆက်ပြီးတော့ လက်ရှိတော့ သူပိုင်တဲ့ဟာဖြစ်သွားပြီးလို့ကြားတယ်။ ခြံက တော့ သူရဲ့ခြံ ဖြစ်တယ်။ ခြံထဲက စိုက်ပျိုးတဲ့ဟာတော့ RCSS ဟာ အဲလိုထင်တယ်” ဟု ကျောင်းထိုင်ဆရာတော်တစ်ပါးက မိန့်သည်။

အဆိုပါ လုံးခေးလိန် သည် RCSS/SSA နှင့် စီးပွားရေးအရ ပတ်သတ်ဆက်နွယ်မှုရှိနေသောကြောင့် ၎င်းကို စစ်ဆေးရန် အတွက် လာရောက်ခေါ်ဆောင်သွားခြင်းဖြစ်ကြောင်း ရ SSPP/SSA ပြောရေးဆိုခွင့်ရှိသူ ဗိုလ်မှူးစိုင်းသန်းအောင်က‌ ပြောသည်။

“ ဟုတ်ပါတယ်။ ကျနော်တို့ ကောင်းကောင်းဘဲခေါ်လာတာ။ ကျနော်တို့စစ်ဆေးပြီးတော့ ပြန်လွတ်ပေးမှာပါ။ သူတို့ သားဖက RCSS ရဲ့ စီးပွားရေးတာဝန်ခံဖြစ်တယ်။ ကျနော်တို့မေးတာတော့ မဖြေဘူး။ ပြည်သူတွေ သူတို့ရဲ့ ဒဏ်ကိုခံ နေရလို့ပြောပြတာ။ ပြည်သူပိုင်မြေယာကိုလည်း သူတို့က အတင်းဝယ်ယူပြီးတော့ စီးပွားရေးလုပ်တယ်” ဟု SSPP ပြောခွင့်ရ ဗိုလ်မှူးစိုင်းသန်းအောင် က ပြောသည်။
လက်ရှိတွင် နိုင်ငံရေးအခြေနေမတည်ငြိမ်ချိန်တွင် သျှမ်းစစ်တပ် ၂ တပ် ဆွေးနွေရန်အဆင်မပြေသေးကြောင်း SSPP ပြောခွင့်ရ ဗိုလ်မှူး စိုင်းသန်းအောင်က ပြောသည်။

သျှမ်းပြည် မြောက်ပိုင်း နမ္မတူမြို့နယ် အရပ်သား (၅)ဦးကို သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော်(RCSS/SSA)မှ ဖမ်းဆီးသွားပြီး၊ ၂လကျော်ကြာထိ ပြန်မလွှတ်ပေးသေးကြောင်း စုံစမ်းသိရသည်။

ထိုဒေသတွင် နေထိုင်သည့် ပြည်သူများ တိုင်းရင်းသားလက်နက်ကိုင်များဖမ်းဆီးမှု မကြာခဏရှိနေသဖြင့် စိုးရိမ်မှုများစွာဖြင့်နေထိုင်နေရကြောင်းသိရသည်။

Leave a Comments