သျှမ်းပြည် မြောက်ပိုင်း နမ္မတူမြို့နယ် အရပ်သား (၅)ဦးကို သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော်(RCSS/SSA)မှ ဖမ်းဆီးသွားပြီး၊ ၂လကျော်ကြာထိ ပြန်မလွှတ်ပေးသေးကြောင်း စုံစမ်းသိရသည်။
RCSS/SSAဖမ်းဆီးခေါ်ဆောင်သွားသည့် အရပ်သား (၅)ဦးသည် နမ္မတူမြို့နယ် မန်ဆာဒေသခံ (၂ ) ဦးမှာ မိုင်းချစ်မောင်လေး၊ ဦးအိုက်ငင်း နှင့် ရေအိုးရွာဒေသခံ (၃) ဦးမှာ ရွာသူကြီး ဦးကြာယုံ နှင့် သားဖြစ်သူ နေလင်းစွာ၊ နေလင်းဦး ဖြစ်ကြောင်း ဒေသခံများ ပြောပြချက် အရသိရသည်။
ထိုထဲမှ ဖမ်းခံရသည့် ရေအိုးကျေးရွာ (၂)ဦးသည် အသက် (၁၂)နှစ်အရွယ်နှင့် အသက် (၁၅)နှစ် အရွယ်သာရှိသေး ကြောင်း သိရသည်။
“ ခုချိန်ထိတော့ ဘာသတင်းမှမကြားရသေးဘူး။ အဆက်သွယ်လဲမရဘူး။ သူတို့ဘယ်ချိန် ပြန်လွှတ်လာပေး မလဲမသိသေးဘူး။ ရွာသူကြီးသား (၂)ယောက်ဆိုရင် အသက်တောင်မပြည့်သေးဘူး။ သူတို့တွေကို စိုးရိမ်နေရတယ်” ဟု ရေအိုးကျေးရွာမှ ဖမ်းခံရသူများ နှင့် နီးစပ်သည့် အမျိုးသမီးတစ်ဦး က သျှမ်းသံတော်ဆင့် ကို ပြောသည်။
ရေအိုကျေးရွာ သူကြီးအိမ်တွင် လက်နက်များရှိသည်ဟုဆိုသတင်းကြောင်း ဝင်ရောက်ဖမ်းဆီးကာ ထိုအိမ်ထဲရှိ အမျိုးသားများကို စစ်ဆေးမည်ဆိုသည့်အကြောင်းပြချက်ဖြင့် ဖမ်းသွားကြောင်းလည်း ၎င်း အမျိုးသမီးက ပြောသည်။
“ ဦးကြာယုံ အိမ်မှာက လက်နက်ရှိထားလို့ဆိုပြီးတော့လာစစ်ဆေးပြီး ဖမ်းသွားတယ်။ သူသားလည်းဖမ်းသွားတယ်။ TNLA က ဦးကြာယုံအိမ်မှာလက်နက်ထားတယ်လို့ပြောတယ်။ သူတို့လာစစ်တာတော့ဘာမှ မတွေ့ရဘူး။ မန်ဆာရွာခံ ၂ဦးကတော့ အခွန်ကိစ္စနဲ့ ဖမ်းတယ်လို့ ကြားသိတယ်။” ဟု ရေအိုး ကျေးရွာဒေသခံက ပြောသည်။
ထို့ပြင် မန်ဆာကျေးရွာ ဒေသခံ (၂)ဦးသည် TNLA ကို ဆက်ကြေး(အခွန်ကောက်)ပေးနေသည့် သူဟုဆိုပြီး ဖမ်းဆီးသွားကြောင်း သိရသည်။
ထိုသို့ RCSS/SSA မှ ပြောရေးဆိုခွင့်ရှိသူ ဒုဗိုလ်မှူးကြီး စိုင်းခမ်းစံက “ ကျနော်တို့ အဲ့ဘက်က အသေးစိတ်မသိရသေးဘူး။ မြေပြင်ကိုမေးရင်ပိုပြီးသေချာတယ်” ဟု သျှမ်းသံတော်ဆင့် ကိုပြောသည်။
အလားတူ RCSS/SSA ၏ တပ်ချုပ်မှူးနယ်မြေခံ သျှမ်းသံတော်ဆင့်မှ အကြိမ်ကြိမ် ဆက်သွယ်မေးမြန်ခဲ့သော်လည်း ဖုန်းကိုင်ဖြေကြားခြင်းမရှိပါ။
နမ္မတူမြို့နယ် ပန်လုံ နှင့်ချောင်းဆာ ကျေးရွာအုပ်စုတွင် ရှမ်းပြည်ပြန်လည်ထူထောင်ရေးကောင်စီ၊ ရှမ်းပြည်တပ်မတော် RCSS/SSA နှင့် မြောက်ပိုင်းမဟာမိတ်တို့ မကြာခဏ တိုက်ပွဲဖြစ်ပွားသည့်နေရာဖြစ်သည်။
ထိုနေရာတွင် တိုင်းရင်းသားလက်နက်ကိုင်အချင်းချင်း တိုက်ပွဲပြင်းထန်းမှုကြောင့် ပြည်သူများ ၂ လကျော် တိုက်ပွဲထွက်ပြေးတိမ်ရှောင်းနေရပြီး နေအိမ် ၁၂၁ အိမ် မီးလောင်းဆုံးရှုံးခဲ့ရကြောင်း သိရသည်။
Leave a Comments