သျှမ်းပြည်မြောက်ပိုင်း ရွှေလီမြစ်ဝှမ်းဒေသ(ထုန့်မောဝ်) အတွင်း နေထိုင်သည့် ပြည်သူများသည် သျှမ်းတပ်(၂)တပ် ကြား စိုးရိမ်စိတ်များစွာဖြင့် နေထိုင်နေရကြောင်း စုံစမ်းသိရသည်။

ရွှေလီမြစ်ဝှမ်း ဒေသ (ထုန့်မောဝ်) ရှိ မန့်ဟီးရိုးကျေးရွာအုပ်စုမှ ကျေးရွာ (၁၉ )ရွာတွင် လှုပ်ရှားနေသည့် သျှမ်းတပ်(၂)တပ်သည် ဒေသခံ ပြည်သူများကို အပြန်အလှန်ဖမ်းဆီးခြင်း ရှိပြီး၊ ထိုသျှမ်းတပ်(၂)တပ် တိုက်ပွဲဖြစ်ပွားမည်ကို လည်း ပြည်သူများက စိုးရိမ်စိတ်ဖြင့် နေထိုင်နေရကြောင်း သတင်းရရှိသည်။

“ သျှမ်းတပ်(၂)တပ်က ပြည်သူတွေကို ဖမ်းဆီးခေါ်ဆောင်တာ စစ်ဆေးတာတွေရှိတယ်။ ဒီလိုဖမ်းဆီးတာတွေ မပြုလုပ်စေချင်ဘူး” ဟု ထုန့်မောဝ် ပြည်သူ့ကိုယ်စားပြု ကော်မတီ အဖွဲ့ဝင် တစ်ဦးက သျှမ်းသံတော်ဆင့် ကို ပြောသည်။

မေ (၃၁)ရက် တွင် ထုန့်မောဝ်ဒေသ နမ့်ခမ်းမြို့နယ် မန်းဆွယ်ကျေးရွာရှိ ရှမ်းလူငယ်အဖွဲ့အစည်း ( TYO) မှ အဖွဲ့ဝင် တစ်ဦး အပါအဝင် ဒေသခံ ၄ဦးကို သျှမ်းပြည်တိုးတက်ရေးပါတီ (SSPP/SSA) မှ ဖမ်းဆီးခဲ့သည်။

ထိုဖမ်းဆီးခဲ့ထဲမှ ဒေသခံ(၃)ဦးကို ယမန်နေ့(ဇွန် ၃)ရက်တွင် ပြန်လည်လွှတ်ပေးခဲ့ပြီး၊ လက်ရှိမှာ TYO အဖွဲ့ဝင် တစ်ဦ ဆက်လက်ဖမ်းဆီးခံထားရကြောင်းသိရသည်။

“ မနေ့က ၃ ယောက်ပြန်လွှတ်လာပေးတယ်။ ကျန်တစ်ယောက်ကိုတော့ တရားရုံးမှာ စစ်ဆေးအုံးမယ်တဲ့။ သူတို့က RCSS အတွက် ဆက်ကြေးကောက်ပေးတယ်ဆိုပြီးတော့ ဖမ်းဆီးသွားတယ်လို့ပြောတယ်” ဟု ထုန့်မောဝ် ပြည်သူ့ကိုယ်စားပြု ကော်မတီဝင် တစ်ဦးက သျှမ်းသံတော်ဆင့် ကို ပြောသည်။

သို့သော် ဖမ်းဆီးခံရသည့် မန်းဆွမ်း ကျေးရွာပြည်သူများသည် RCSS/SSA အတွက် ဆက်ကြေးကောက်ပေးခြင်း မရှိကြောင်း ဒေသခံများပြောပြချက် အရသိရသည်။

လက်ရှိ ဖမ်းဆီးခံထားရသည့် TYO အဖွဲ့ဝင် တစ်ဦးကို အမြန်ဆုံး ပြန်လွှတ်ပေးရန် အတွက် TYO မှ ပြောရေးဆိုခွင့်ရှိသူ အမျျိုးသမီး တစ်ဦးက သျှမ်းသံတော်ဆင့် ကို ပြောသည်။

“ ကျမတို့ ဒီ TYO အဖွဲ့ဝင်တစ်ဦးဖမ်းခံသွားရတယ်။ အမြန်လွှတ်ပေးစေချင်တယ်။ ပြောတာကြားနေရတာကတော့ ၃ ယောက်လွတ်ပေးမယ်။ ကျန်တစ်ယောက်ကို စစ်ဆေးအုံးမယ်လို့တော့ပြောတယ်။ ကျန်တဲ့တစ်ယောက်ကလည်း TYO အဖွဲ့သားပါ။ သူတို့ ထက်စစ်ဆေးအုံးမယ်လို့ကြားထားတယ်။” ဟု TYO အဖွဲ့ဝင် အမျိုးသမီးတစ်ဦးက ပြောသည်။

SSPP/SSAအနေဖြင့် TYO အဖွဲ့ဝင်ကို မည်သည့်အကြောင်းပြချက်ဖြင့် ဖမ်းဆီးသွားသည်ကို မသိရှိကြောင်း၊ သျှမ်းတပ် (၂)တပ်ကြားနေထိုင်ရသည့် ပြည်သူအနေဖြင့် ပြဿနာ များမဖြစ်စေချင်ကြောင်းလည်း ၎င်း အမျိုးသမီး က ပြောသည်။

“ ကျနော်တို့ ကော်မတီဘက်ကနေပြီးတော့ လူကိုပြန်လွှတ်လာပေးဖို့တောင်းဆိုပါတယ်။ သူတို့ဘက်က ပြန်မလွှတ်လာပေးသေးရင် ကျနော်တို့လည်း အရမ်းစိတ်ပူရတယ်” ဟု မူဆယ်မြို့နေပြည်သူတစ်ဦးကပြောသည်။

SSPP/SSA မှ ရွှေလီမြစ်ဝှမ်း (ထုန့်မောဝ်ဒေသ) ရှိ TYO အဖွဲ့ဝင်တစ်ဦး အပါအဝင် ဒေသခံ (၄)ဦးကို ဖမ်းဆီးခေါ်ဆောင်သွားသည့် ကိစ္စ အသေးစိတ်မသိရှိရသေးကြောင်း SSPP/SSA မှပြောရေးဆိုခွင့်ရှိသူ ဗိုလ်မှူး စိုင်းဖုန်းဟန် က သျှမ်းသံတော်ဆင့် ကို ပြောသည်။

ထုန့်မောဝ်ဒေသ အတွင်း သျှမ်းတပ် (၂)တပ် စစ်ရေးတင်းမာမှုရှိနေသဖြင့် ဒေသခံသံဃာတော်များနှင့် ပြည်သူများကလည်း စစ်ရေး မဖြစ်ပွားရန် စာရေး တောင်းဆိုထားသော်လည်း လက်ရှိအချိန်ထိ စစ်ရေးတင်းမာနေသဖြင့် တိုက်ပွဲဖြစ်ပွားမည်ကို ဒေသခံပြည်သူများက စိုးရိမ်နေကြသည်။

“ ကျနော်တို့ကတော့ စစ်ဖြစ်မှာကိုကြောက်တယ်။ ခုတော့ မဖြစ်သေးဘူး။ နောက်ပြီးတော့ ဒီလူဖမ်းတာပေါ့နော်။ ဟိုဘက်ကလည်းဖမ်း၊ ဒီဘက်ကလည်းဖမ်းနေတာ။ ဒါတွေကို စိုးရိမ်းပြီးနေရတယ်” ဟု ထုန့်မောဝ် ဒေသခံတစ်ဦး က ပြောသည်။