သျှမ်းလက်နက်ကိုင်တပ်ဖွဲ့ (၂) ဖွဲ့ တိုက်ပွဲဖြစ်ပွားမှုကြောင့် လဲချားမြို့နယ်အတွင်းရှိ ကျေးရွာဒေသခံများ ထွက်ပြေးတိမ်းရှောင်နေရသဖြင့် ရွာပျက်ဖြစ်နေရကြောင်း စုံစမ်းသိရသည်။

ပြီးခဲ့သည့် ဧပြီလဆန်းပိုင်းမှ စတင်ကာ သျှမ်းလက်နက်ကိုင် တပ်ဖွဲ့ (၂) ဖွဲ့ သည် တိုက်ပွဲဖြစ်ပွားကာ ယနေ့အချိန်ထိ စစ်ရေးတင်းမာနေကြောင်း၊ ထိုတိုက်ပွဲများကြောင့် ကျေးရွာပြည်သူများသည် လဲချားမြို့ပေါ် နှင့် ထိုင်းနိုင်ငံဘက်သို့ ထောင်ချီထွက်ပြေးတိမ်းရှောင်ကာ ရွာပျက်ဖြစ်ရသည့်အထိ ရှိလာကြောင်း စစ်ဘေးရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ထိုရွာပျက်ဖြစ်နေသည့် ရွာများမှာ ကုန်းယိမ်းရွာ (ဝၢၼ်ႈၵုင်းယိုဝ်း) ၊ ဟူးဟိုင်းရွာ (ဝၢၼ်ႈႁူ့ႁႆး) နှင့် ကျိကျော့ကျေးရွာ (ဝၢၼ်ႈၸီ့ၸေႃ့) တို့ ဖြစ်ကြောင်း သိရသည်။

“လက်ရှိမှာဆိုရင်တော့ ကုန်းယိမ်းရွာ (ဝၢၼ်ႈၵုင်းယိုဝ်း) ၊ ဟူးဟိုင်းရွာ (ဝၢၼ်ႈႁူ့ႁႆး) နှင့် ကျိကျော့ကျေးရွာ (ဝၢၼ်ႈၸီ့ၸေႃ့) တို့က ရွာတွေပျက်နေပြီ၊ လူနေလည်း မရှိဘူး၊ လယ်ယာတွေလည်း လုပ်သူမဲ့သွားပြီ။ ရွာသားတွေကလည်း ထိုင်းဘက်ရောက်တဲ့သူ၊ မြို့ပေါ်မှာပဲ အဆင်ပြေသလို နေတဲ့သူတွေနဲ့ ရွာတွေ ဘက်ကို ဘယ်သူမှ မပြန်ရဲဘူး” ဟု လဲချားစစ်ရှောင် တစ်ဦးက သျှမ်းသံတော်ဆင့်ကို ပြောသည်။

လက်နက်ကိုင် တပ်ဖွဲ့များမှ စစ်ဘေးရှောင်များ နေရပ်ပြန်ကြရန် ခေါ်ဆောင်နေကြသော်လည်း ရွာထဲ ပြန်လည်ရောက်ရှိချိန် ရွာပြင် ပြန်ထွက်ရန် မလွယ်ကူလှသည့်အတွက် ရွာသားများက မပြန်ရဲခြင်း ဖြစ်ကြောင်း ၎င်းက ဆက်ဆိုသည်။

လက်ရှိ ထိုင်းနိုင်ငံဘက် စစ်ရှောင်ထွက်ပြေး လာသည့် စစ်ရှောင်များသည် တရားမဝင် လမ်းကြောင်းမှ ဝင်လာကြသည့်အတွက် ထိုင်းရဲများ ဖမ်းဆီးခြင်းကို ခံရသူ ၄ ဦးထက် မနည်း ရှိနေကြောင်း လည်း အထက်ပါ ပုဂ္ဂိုလ်က ဆက်ဆိုသည်။

“ထိုင်းဘက်သွားတဲ့ တစ်ယောက်ကဆိုရင် ထိုင်းရဲဖမ်းတာခံရပြီးတော့ ၂ လ ထောင်ဒဏ်ကျခံရတယ်။ တခြား ၃ ယောက်လည်း ရှိသေးတယ်၊ ကျနော်တို့ မသိရဘဲနဲ့ ဖမ်းဆီးခံရတဲ့ သူတွေလည်း ရှိမှာပဲ။ ပြည်သူတွေက ဒီဘက်မှာတော့ မနေရဲကြတော့ဘူး” ဟု ၎င်းက ဆိုသည်။

ပြီးခဲ့သည့် မေလ ၂၀ ရက်နေ့တွင်လည်း ထိုင်းနိုင်ငံအတွင်း တရားမဝင် ဝင်ရောက်လာသည့် မြန်မာ ရွှေ့ပြောင်းလုပ်သား စုစုပေါင်း ၁၆ ယောက်ကို ထိုင်းရဲတပ်ဖွဲ့မှ မလိခရိုင်၊ မယ်အိုင်းမြို့နယ် အတွင်း ဖမ်းဆီးမိခဲ့ခြင်း ဖြစ်ကြောင်း ထိုင်းရဲသတင်းစာမျက်နှာ Add Fang Life က ထုတ်ပြန်ထားသည်။

လက်ရှိ လဲချားမြို့နယ်အတွင်း ကျန်ရှိနေသေးသည့် စစ်ရှောင်များ ဝါဆိုကျောင်းတိုက်တွင် ၈ ဦး နှင့် ဆွေမျိုးရှိရာ မှီခိုနေထိုင်ကြသည့် စစ်ရှောင်များကလည်း ၎င်းတို့ ကျေးရွာဘက်တွင် သေနတ်သံများ ကြားနေရသည့်အတွက် နေရပ်မပြန်ရဲသေးသည့် ပြည်သူများ အများအပြား ရှိနေကြောင်းလည်း သိရသည်။

စစ်ဘေးရှောင်နေရသေးသည့် ပြည်သူများသည် ဟဲဆိုင်ကျေးရွာအုပ်စု (ဢိူင်ႇဝၢၼ်ႈႁၢႆးသႅင်)၊ ဝမ်ထီကျေးရွာ အုပ်စု ၊ ပန်ဆန်းကျေးရွာအုပ်စု ၊ ဝမ်ဆန်းကျေးရွာ အုပ်စု၊ ဝမ်ကျယ် ကျေးရွာ အုပ်စု၊ နားပွဲ ကျေးရွာအုပ်စု နှင့် နောင်ကော်ကျေးရွာအုပ်စုတို့က စစ်ဘေးရှောင်များ ဖြစ်ကြောင်း သိရသည်။

လွန်ခဲ့သည့် ၂၀၁၉ ခုနစ်တွင်လည်း သျှမ်းပြည် ကျောက်မဲခရိုင်အတွင်း မြောက်ပိုင်းမဟာမိတ်တပ်ဖွဲ့ နှင့် RCSS တို့ကြား တိုက်ပွဲဖြစ်ပွားမှုကြောင့် ကျောက်မဲမြို့နယ်အတွင်း ရွာပျက်များရှိလာကြောင်း သိရသည်။