Sunday, May 26, 2024

သီပေါမြို့ စစ်ရှောင် (၂၅၀)ကျော်နေရပ်ပြန်

Must read

သျှမ်းပြည်မြောက်ပိုင်း သီပေါမြို့သို့ ထွက်ပြေးတိမ်းရှောင်လာသည့် စစ်ရှောင် (၂၅၀) ကျော် ယနေ့ ဇွန် (၁) ရက်တွင် နေရပ်သို့ ပြန်သွားကြောင်း စုံစမ်းသိရှိရသည်။

သျှမ်းပြည်မြောက်ပိုင်း နမ္မတူမြို့နယ်အတွင်း သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် မြောက်ပိုင်းမဟာမိတ်တို့ တိုက်ပွဲဖြစ်ပွားမှုကြောင့် စစ်ရှောင်ခဲ့ရသည့် မန်လီဒေသခံများ၊ ပန်လုံဒေသခံများ နှင့် တာပုလဲ ဒေသခံများ ယနေ့ (ဇွန် ၁)ရက် နေရပ်ပြန်သွားကြောင်း စုံစမ်းသိရှိရသည်။

“မန်လီက နေအိမ် (၄၄) အိမ် မီးလောင်သွားတဲ့ သူတွေတော့ မပြန်သေးဘူး။ ပြန်စရာ အိမ်လည်းမရှိတော့ ခုလက်ရှိချိန်ထိ စခန်းမှာပဲရှိသေးတယ်။ တိုက်ပွဲက မဖြစ်တော့ဘူးလားဆိုတာတော့ ပြောလို့မရဘူး။ ခုက ငြိမ်နေလို့ ဒေသခံတွေက ပြန်သွားကြတယ်။” ဟု သီပေါစစ်ရှောင်စခန်းမှာ ကူညီပေးသည့် ပရဟိတ တစ်ဦးက သျှမ်းသံတော်ဆင့် ကိုပြောသည်။

မေ (၂) ရက်နေ့တွင် နမ္မတူမြို့နယ်ရှိ မန်လီကျေးရွာ ဒေသခံ နေအိမ် (၄၄) အိမ် မီးရှိုှု့ခံရသည့်အတွက် လက်ရှိအချိန်ထိ သီပေါစစ်ရှောင်စခန်းသို့ နေထိုင်ခဲ့ရကြောင်း သတင်းရရှိသည်။

“စိုက်ပျိုးရာသီလည်းရောက်ပြီဆိုတော့ သူတို့ နောက်နှစ်အတွက် ပြန်စိုက်ကြတယ်။ တိုက်ပွဲဖြစ်မှာကို စိုးရိမ်ပေမယ့် ဝမ်းရေးအတွက် ပြန်သွားကြတာပေါ့။” ဟု စစ်ရှောင်စခန်းမှ ကူညီပေးသည့် လူငယ်တစ်ဦး ကပြောသည်။

လက်ရှိတွင် နှစ်ဖက်တပ် စစ်ရေးတင်းမာမှု မရှိသော်လည်း အချိန်မရွေး တိုက်ပွဲဖြစ်ပွားနိုင်ကြောင်း ဒေသခံများက ပြောဆိုကြသည်။

လက်ရှိ သီပေါမြို့ရှိ စစ်ရှောင်စခန်းမှာ စစ်ဘေးရှောင် (၃၀၀)ကျော် ကျန်ရှိနေပြီး ၎င်းတို့သည် တာပေ့ရွာ၊ မန်လီရွာ နှင့် မန့်ကောင်းရွာ တို့ဖြစ်ကြောင်း သိရသည်။

Leave a Comments

- Advertisement -spot_img

Latest article