နေအိမ်အကျယ်ချုပ် ထိန်းသိမ်းထားခံရသည့် နိုင်ငံတော် ၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် သည် “ ပြည်သူတွေရှိနေသရွေ့ အမျိုးသားဒီမိုကရေစီ အဖွဲ့ချုပ် ပါတီ” တည်ရှိနေမည် ဟု ယနေ့ (မေ ၂၄)ရက် တရားရုံးထုတ်စဉ် ပြောကြားခဲ့ကြောင်း သတင်းရရှိသည်။
စစ်ကောင်စီအုပ်စု မှ ဒေါ်အောင်ဆန်းစုကြည် ကို သဘာဝဘေး စီမံခန့်ခွဲမှု ဥပဒေ ပုဒ်မ ၂ခု၊ နိုင်ငံတော်အကြည်ညိုပျက်စေမှု ပုဒ်မ (၁)ခု၊ နိုင်ငံတော် လျှိုဝှက် အက်ဥပဒေ ပုဒ်မ ၁ခု အပြင် နေအိမ် တွင် စကားပြောစက် (Walkie Talkie) များကို တွေ့ရှိမှုကြောင့် ပို့ကုန်သွင်းကုန် ပုဒ်မ ဖြစ်သည်။
“အမေက ပြည်သူတွေကို အရင်ဆုံး အမေပြောတာက အားလုံးကျန်းမာစေဖို့အတွက် ဆုတောင်းပေးနေပါတယ်။ပြီးတော့ NLD ပါတီ ကိုထောင်ထားတာလည်း ပြည်သူတွေ အတွက် ထောင်ထားတာ ဖြစ်တဲ့အတွက်ကြောင့် ပြည်သူတွေ ရှိနေသရွေ့ ပါတီရှိနေမှာပါလို့ အမေက အဲ့လိုမှာပါတယ်ရှင့်” လို့ ဒေါ်အောင်ဆန်းစုကြည်၏့ရှေ့နေဖြစ်သူ ဒေါ်မင်းမင်းစိုးက မီဒီယာတွေကို ပြောကြားခဲ့သည်။
ယနေ့ (မေ ၂၄)ရက်သည် ဒေါ်အောင်ဆန်းစုကြည် ကို နေပြည်တော် စစ်ကောင်စီ နယ်မြေရှိ အိမ်တစ်အိမ်တွင် သီးသန့်တရားရုံးလုပ်ပြီး ပထမဆုံးအကြိမ်လူကိုယ်တိုင် ရုံးထုတ်စစ်ဆေးခဲ့ကြောင်း သိရသည်။
“ အခုရုံးချိန်း အတွင်းမှာ စစ်မေးမှုတွေ ပြုလုပ်ခဲ့ခြင်းမရှိဘူး အမှုသည်နဲ့ ရှေ့နေ သီးသန့်ညွှန်ကြားမှုတွေသာ ပြုလုပ်ခဲ့ ရတာဖြစ်တယ်လို့” ရှေ့နေ ဒေါ်မင်းမင်းစိုးက မီဒီယာများကို ပြောကြားသည်။
ပြီးခဲ့တဲ့ရက်ပိုင်းအတွင်း စစ်ကောင်စီ၏ ရွေးကောက်ပွဲကော်မရှင်ဥက္ကဋ္ဌ ဦးသိန်းစိုး က ကော်မရှင် နှင့် နိုင်ငံရေးပါတီပေါင်း (၆၂)ပါတီ တွေ့ဆုံပွဲတွင် NLD ပါတီကို ဖျက်သိမ်းသည့် အထိ ပြောဆိုခဲ့သည်။
ယနေ့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ သမ္မတ ဦးဝင်းမြင့်နှင့် နေပြည်တော်ကောင်စီ ဥက္ကဋ္ဌ ဒေါက်တာမျိုးညွန့်တို့ ၃ ဦး ကို ရုံးထုတ်စစ်ဆေးခဲ့ပြီး နောက်ထပ်ရုံးချိန်း ကို လာမည့် ဇွန်လ ၇ ရက်တွင် ပြုလုပ်သွားမည် ဟု သိရသည်။
Leave a Comments