ကာတွန်းသည် အခြေအနေတရပ်၏  အနေအထားကို သက်၀င်အောင်ပုံဖော်ခဲ့သည့်အနုပညာတရပ်ဖြစ်လေရာ လက်ရှိနိုင်ငံရေးအခြေအနေကို ပုံဖော်နိုင်သည့်ကာတွန်းမှာ လွန်စွာမလွယ်ကူသည့် အနုပညာတရပ်ဖြစ်ပါသည်။ နိုင်ငံတခုတွင် ထိုသို့သော နိုင်ငံရေးသရော်သည့်ကာတွန်းဆရာမှာ လက်ချိုးရေလို့ပင်ရပါသည်။ နိုင်ငံရေးတွင်စိတ်ပါ၀င်စားမှုနည်းပါးသည့် သျှမ်းပြည်တွင်လည်း ရှားပါးသည့်နိုင်ငံရေးသရော် ကာတွန်းဆရာများအနက် ကာတွန်းဝေယံ၏ လက်ရာကို ကနေ့လူမှုကွန်ယက်တွင်လူသိများခဲ့ပါသည်။ အာဏာသိမ်းစစ်အုပ်စုအား ထိမိသော ကာတွန်းလက်ကွက်ဖြင့် အဆက်မပြတ် တော်လှန်ရေးလှုပ်ရှားမှုပြုလာသည့် ကာတွန်းဝေယံသည် လက်ရှိတွင် ဘေးလွတ်ရာနေရာသို့ တိမ်းရှောင်နေကြောင်းသိရသည်။ ၄င်းအားသျှမ်းသံတော်ဆင့်မှ တွေ့ဆုံမေးမြန်းထားပါသည်။

မေး ။            ။ ကိုဝေယံ လတ်တလောဘာတွေ လှုပ်ရှားနေလဲ ။

ဖြေ ။            ။ ကျနော် ကတော့ လှုပ်ရှားလို့ရတာအကုန်လှုပ်ရှားနေတယ် အဓိက ကတော့ ကာတွန်းနဲ့တော်လှန်နေတာပေါ့ ။

မေး ။            ။ အာဏာသိမ်းစစ်ကောင်စီ နဲ့ပတ်သက်ပြီး ရေးဆွဲတဲ့ ကာတွန်းတွေအပေါ် ဘယ်လို ခံစားချက်တွေ ဘယ်လိုခံယူချက်တွေ ထည့်ထားလဲ ။

ဖြေ ။            ။ ခံစားချက်ကတော့ အဓိက ဒီကောင်တွေကို ကာတွန်းပညာနဲ့သရော်တာ ပေါ့ ၊ ခံယူချက်ကတော့ ဒီကောင်တွေကို ဝါဒမှိုင်းအရ၊  စိတ်ဓါတ်စစ်ဆင်ရေး အရ၊  စစ်အာဏာရှင်ကျဆုံးရေးအတွက်  အဲ့လိုမျိုး ခံယူချက်နဲ့ ကျနော်တို့ဆွဲနေတာပါ ။

မေး ။            ။ ခုလို စစ်အာဏာရှင် ဆန့်ကျင်တဲ့ကာတွန်းတွေရေးဆွဲနေတဲ့ အတွက်  ဒီစစ်အာဏာသိမ်း အုပ်စုဖက်က ကိုဝေယံကို ၀ရမ်းထုတ်ထားတာမျိုး ၊ နေအိမ်တွေ မှာလာရှာဖွေတာမျိုးတွေ ရှိခဲ့လား။

ဖြေ ။            ။ တလောကတော့ ကျနော့ကို မန်းလေးမှာ ဖမ်းမိပြီဆိုပြီး သူတို့ဖက်က တစ်ကောင်ကောင်က မဟုတ်မမှန်သတင်းလွှင့်တာပေါ့ ၊ ဖမ်း၀ရမ်းတွေ ဘာတွေလဲ မကြား မိသေးပါဘူး ၊ တိုးတိုး တိတ်တိတ် ထုတ်တာမျိုးတွေဘဲရှိမှာပေါ့ ၊  လောလော ဆယ်ကျနော်က လွတ်မြောက်နယ်မြေ ကို ရောက်ရှိ နေပြီဖြစ်တဲ့ အတွက် သူတို့ လာရှာလဲ ဘာမှမထူးပါဘူး ။

 မေး ။           ။ အာဏာရှင်ဆန့်ကျင်ရေးနဲ့ ပတ်သက်ပြီး ကိုယ်ဆွဲတဲ့ ကာတွန်းတွေ ဟာ ဒီတော်လှန်ရေးမှာ ဘယ်လောက်အတိုင်းအတာအထိ ထိရောက်လဲ လို့ မြင်လဲ ။

ဖြေ ။            ။ ထိရောက်တယ်ဆိုတာ အဲ့လိုမျိုးပေါ့ ပြည်သူတွေရဲ့ ကော်မန့်တွေကို ဖတ်ကြည့်ရင် တော့ ဒီကာတွန်းတွေကနေ ၊ စိတ်ဓါတ်ကျနေ တဲ့အချိန်မှာ ​motivate တစ်ခုပေးတယ်ပေါ့ ။ ကျနော်တို့က ဒီကောင်တွေကို သရော်တာကို ဘာပဲ ပြောပြော ပြည်သူတွေ စိတ်ညစ်နေတဲ့ အချိန် ဒီကာတွန်း လေးဖတ်လိုက်လို့ supporting  လေးတစ်ခုရလိုက်ရင် ပဲအတိုင်းအတာတစ်ခုအထိ ထိရောက်တယ်လို့ ထင်တာပဲ ။

မေး ။            ။ ဒီအရေးတော်ပုံ အောင်မြင်ဖို့ ဘယ်အရာ က အရေးကြီးဆုံးလို့ ထင်လဲ ။

ဖြေ ။            ။ အရေးတော်ပုံအောင်ဖို့ အဓိက unity ပဲ ပြည်သူတွေအားလုံး စည်းလုံးဖို့ နဲ့ စည်းစည်းလုံးလုံးနဲ့တော်လှန်ရင် ဒီကောင်တွေ ဘာလက်နက်ကြီးပဲ ရှိရှိ ဘာကောင်ပဲ ဖြစ်ဖြစ် ပြည်သူတွေ ဖက်က အောင်မှာပဲ ။ စည်းလုံးမှုက တစ် ၊ စည်းလုံးမှုက နှစ် ၊ စည်းလုံးမှုက ၃ လို့ပဲမြင် ပါတယ် ။

မေး ။            ။ G – Z တွေရဲ့တော်လှန်ရေးနဲ့ပတ်သက်ပြီး ဘယ်လိုမြင်လဲ ။

ဖြေ ။            ။ G – Z တွေရဲ့ လုပ်ရပ်တွေကို အားရတယ် ၊ မျိုးဆက်အားလုံး ကလဲ တတ်နိုင် တဲ့ ဘက်ကနေ သူ့နေရာနဲ့သူလုပ်နေကြတာဖြစ်တဲ့ အတွက်လဲအားရပါတယ် ။

မေး ။            ။ ကာတွန်းဝေယံရဲ့ ကာတွန်းဖတ်ပရိတ်သတ်တွေကို တော်လှန်ရေး နဲ့ပတ်သက်ပြီး ဘာ ပြောချင်သေးလဲ ။

ဖြေ ။            ။ စိတ်ဓါတ်မကျ ကြပါနဲ့ ၊ နှစ်ပေါင်းခြောက်ဆယ် ကျော် ကြာ ခိုင်ခိုင်မာမာ အင်စတီကျူးရှင်း တစ်ခုလုံးကို လုံး၀အမြစ်ကနေလှန်ရမှာ ဖြစ်တဲ့ အတွက် အချိန်ယူရမယ် ၊ စိတ်ဓါတ်မကျပဲ အမြဲတမ်း စက္ကန့်တိုင်း မိနစ်တိုင်း နာရီတိုင်း တော်လှန် နေဖို့ အရေးကြီးတယ် အဲ့ဒီအတွက် အားလုံး စည်းစည်းလုံးလုံးနဲ့ တော်လှန်ကြဖို့ လုံး၀ သွေးမအေး ကြဖို့အရေး ကြီးတယ်လို့ ကျနော်ပြောလိုပါတယ် ။

 ဟုတ်ကဲ့။ ကာတွန်းဝေယံကို ကျေးဇူးတင်ပါတယ်။