သျှမ်းပြည်တောင်ပိုင်း တောင်ကြီးမြို့နယ် အေးသာယာမြို့တွင် ဒလန်ကြောင့် မိဘကို ပြုစုနေသည့် လူငယ်တစ်ဦးကို စစ်ကောင်စီမှ ဖမ်းဆီးသွားကြောင်း စုံစမ်းသိရှိရသည်။
ဖမ်းဆီးခံရသူ အောင်ပြည့်ဖြိုးက မေလ ၁၆ ရက်နေ့ ည ၁၁ နာရီဝန်းကျင်းတွင် စစ်ကောင်စီ အင်းအားအလုံးရင်းဖြင့် လာရောက်ဖမ်းဆီးကြောင်း၊ ပိုက်ဆံများကိုပါ စစ်ကောင်စီက ယူဆောင်သွားကြောင်းသိရသည်။
“ ဒီကလေးက ဘာလှုပ်ရှားမှုထဲလည်း မပါဘူး။ မိဘကိုလုပ်ကျွေးနေတာ။ ဒလန်တွေလုပ်ကြံမှုနဲ့ ဖမ်းခံရတာ။ သူ့အဖေအတွက် အိမ်ဆောက်ပေးဖို့ စုထားတဲ့ ငွေသား (၁၀) သိန်းနဲ့ ဖုန်းကိုပါ ယူသွားတယ်” ဟု အေးသာယာမြို့ ဒေသခံတစ်ဦးက သျှမ်းသံတော်ဆင့် ကို ပြောပြသည်။
အောင်ပြည့်ဖြိုးသည် အသက်ကြီးသော အဖေတစ်ဦး နှင့် စိတ်ကျန်းမာရေး မကောင်း အကိုတစ်ဦးရှိကြောင်း၊ လာရောက် ဖမ်းဆီးချိန်တွင် ၎င်း၏ အဖေကိုပါ ကျိန်းသွားသေကြောင်း သိရသည်။
“ လာဖမ်းတုန်းက အောင်ပြည့်ဖြိုးရှိလားမေးတော့ အဖေက မရှိဘူးလို့ပြောတယ်။ အဲ့ဒါကို အိပ်ယာထဲထိဝင်ဖမ်းတာ။ ပြီးတော့ သူအဖေကို “ အဖိုးကြီး အသက်ကြီးနေပြီး။ ပုတီးကိုင်ရမဲ့အရွယ် လိမ်နေရမဲ့အရွယ်မဟုတ်ဘူး။ ခေါင်းပွင့်သွားမယ် ဘာမှတ်နေလဲ” ဆိုပြီး ကျိန်းသွားသေးတယ်” ဟု မိသားစုဝင်နှင့် အဆက်အသွယ်ရသူ ပြောပြချက်အရသိရသည်။
၎င်း ၏ အဖေကို မေ (၁၇) ရက်တွင် အေးသာယာ ရဲစခန်းမှ လာရောက်ခေါ်ဆောင်ပြီး စစ်ဆေးမှုပြုလုပ်ခဲ့ရာ ပြန်လွှတ်ပေးခဲ့ကြောင်း၊ သို့သော် အောက်ပြည့်ဖြိုးကို အေးသာယာ ရဲစခန်းတွင် ထပ်မံ ချုပ်နှောင်ထားဆဲ ဟု သိရသည်။
ဖေဖော်ဝါရီ ၁ ရက်နေ့မှ စစ်အာဏာသိမ်းပြီးနောက် နာမည်ကြီးပုဂ္ဂိုလ်များ၊ စစ်အာဏာရှင်ဆန့်ကျင်သူများကို လိုက်လံ ဖမ်းဆီးနေပြီး ရာဇသတ်ပုဒ်မ ၅၀၅ က ဖြင့် အမှုဖွင့်အရေးယူ လျက်ရှိကြောင်းသိရသည်။
စစ်အာဏာသိမ်းပြီးနောက်ပိုင်း စစ်ကောင်စီမှ ပြည်သူ (၈၁၀) ဦးကိုသတ်ဖြတ်ထားပြီး (၅၃၀၈) ဦးကိုဖမ်းဆီးထားကြောင်း နိုင်ငံရေးအကျဉ်သားများကူညီစောင့်ရှောက်ရေး AAPP က ယမန့်နေ့ (မေ ၂၀ ) ရက် တွင် ထုတ်ပြန်ထားသည်။
