သျှမ်းပြည်မြောက်ပိုင်း သီပေါမြို့နယ် အတွင်း RCSS/SSA နှင့် SSPP/SSA တို့ စစ်ရေးတင်းမာနေလျက်ရှိကြောင်း စုံစမ်းသိရှိရသည်။

သီပေါမြို့နယ် နမ့်လန်တွင် ယမန့်နေ့ (မေ ၁၉) ရက်တွင် တိုင်းရင်းသားလက်နက်ကိုင်အချင်းချင်း တိုက်ပွဲဖြစ်ပွားခဲ့ပြီး ယနေ့ချိန်ထိ စစ်ရေးတင်းမာနေကြောင်း သျှမ်းလက်နက်ကိုင် တပ်ဖွဲ့(၂) ဖွဲ့မှ သျှမ်းသံတော်ဆင့် ကို အတည်ပြုပြောသည်။

“ မနေ့က SSPP အဖွဲ့ ကျနော်တို့ကို စစ်ရေးထိုးလာတာ။ အသေးစိတ်အချက်လက်ကိုတော့ ကျနော်တို့မရသေးဘူး။ တစ်ချို့နေရာမှာတွေတော့ စစ်ဖြစ်နေတယ်။ စစ်ရေးတင်းမာနေသေးတယ်” ဟု RCSS/SSA ပြေားရေးဆိုခွင့်ရှိသူ ဗိုလ်မှူးစိုင်းခမ်းခံက သျှမ်းသံတော်ဆင့်ကိုပြောသည်။

သီပေါမြို့နယ်တွင် စစ်ရေးအခြေအနေသည် တင်းမာနေသေးကာ တိုက်ပွဲ (၂၄ ) နာရီအတွင်း ဖြစ်ပွားနိုင်ကြောင်း လည်း SSPP/SSA ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန် က သျှမ်းသံတော်ဆင့် ကို ပြောသည်။

“ စစ်ရေးကတော့ ၂၄ နာရီအချိန်တွင်းမှာဖြစ်လာနိုင်တယ်။ ဒါ့ကြောင့်ပြည်သူတွေကတော့ မပြန်ရဲသေးဘူး။ စစ်ရေးက တင်းမာနေသေးတယ်” ဟု စိုင်းဖုန်းဟန်က ပြောသည်။

ထိုပြင် ယမန့်နေ့တွင် သီပေါမြို့နယ် နမ့်လန် ဝမ်းစိမ်းကျေးရွာအုပ်စုတွင် တိုက်ပွဲဖြစ်ပွားရာတွင် RCSS နှင့် SSPP တပ်ဖွဲ့ ၂ ဖွဲ့သာ စစ်ရေးဖြစ်ကြောင်း SSPP/SSA ပြောခွင့်ရ ဗိုလ်မှူးကြီး စိုင်းဆု ကလည်း သျှမ်းသံတော်ဆင့် ကို အတည်ပြုပြောသည်။

“ မနေ့က ဖြစ်တာက မြောက်ပိုင်းမဟာမိတ် တပ်ဖွဲ့ မဟုတ်ဘူး။ ကျနော်တို့ တပ်ဖွဲ့တစ်ခုတည်းနဲ့ RCSS ဖြစ်တာပါ။ ကျန်တဲ့တပ်ဖွဲ့ကမပါဘူး။ RCSS ကကျူးကျော်လာလို့ တိုက်ပွဲဖြစ်ရတာ” ဟု ဗိုလ်မှူးကြီး စိုင်းဆု က ပြောသည်။

သျှမ်းပြည်မြောက်ပိုင်း သီပေါမြို့နယ် နမ့်လန် အတွင်း ဖြစ်ပွားသည့် တိုက်ပွဲသည် သျှမ်း (၂)တပ် အပြန်အလှန် ငြင်းခုံကာ၊ တဖက်ကလည်း RCSS/SSA ကျူးလွန်မှု ပြောသလို တဖက်တပ်ကလည်း SSPP/SSA တပ်ကျူးလွန်တယ် ဟု ပြောဆိုကာ ငြင်းခုံနေကြသော်လည်း လက်ရှိမှာ တိုက်ပွဲကြောင်း စစ်ဘေးရှောင် (၁၀၀၀) ကျော် ထွက်ပြေးတိမ်းရှောင်နေရသည်။

“ သျှမ်းတပ် (၂)တပ် တိုက်ပွဲမဖြစ်ဖို့ကျနော်တို့ အကြိမ်ကြိမ် တောင်းဆိုခဲ့တယ်။ ဒါပေမယ့် သူတို့ (၂)တပ်က ကျနော်တို့ပြည်သူ့ စကားကို နားမထောင်ဘူး။ ပြည်သူတွေ ဒုက္ခရောက်အောင်လုပ်နေတာ။ ပြောလိုက်ရင် အပြန်အလှန် အပြစ်ပုံနေကြတာပဲ။ ကျနော်တို့ ဘဝတွေကို စာနာစေချင်တယ်” ဟု နမ့်လန်ကျေးရွာမှ စစ်ရှောင်နေသည့် ပြည်သူတဦးက ပြောသည်။

လက်ရှိ အချိန်သည် စိုက်ပျိုးရေး ရာသီ ပြုလုပ်ချိန်ဖြစ်သဖြင့် ပြည်သူများ၏ မျက်နှာကိုထောက်ထားက တိုက်ပွဲများ ရပ်တန့်ပေးစေချင်ကြောင်းလည်း ၎င်း က ပြောသည်။

တိုင်းရင်းသားလက်နက်ကိုင်အချင်းချင်းတိုက်ပွဲဖြစ်ပွားမှုကြောင့် ယမန့်နေ မေလ ၁၉ရက်နေ့တွင် ပြည်သူများ (၁၀၀၀ )ကျော် ထွက်ပြေးတိမ်းရှောင်နေရကြောင်းသိရသည်။

ရှမ်းပြည်ပြန်လည်ထူထောင်ရေးကောင်စီ၊ရှမ်းပြည်တပ်မတော် (RCSS/SSA) နှင့် မြောက်ပိုင်းမဟာမိတ်တို့ တိုက်ပွဲကြောင့် စစ်ဘေးရှောင် (၂၀၀၀)ကျော် ထွက်ပြေးတိမ်းရှောင်နေရပြီး၊ လက်ရှိမှာ နမ္မတူမြိုု့နယ်၊ သီပေါမြို့နယ်တွင် စစ်ဘေးရှောင်များ တွင် တိမ်းရှောင်နေကြသည်။