သီပေါ လူငယ်များနှင့် စစ်ရှောင်ပို့ရန် ရိက္ခာများကို စစ်ကောင်စီ ဖမ်းဆီး သိမ်းဆည်း

0

သျှမ်းပြည်မြောက်ပိုင်း သီပေါမြို့နယ်ရှိ စစ်ဘေးရှောင်စခန်းများကို ရိက္ခာပို့ရန်ပြင်ဆင်သည့် သူများကို စစ်ကောင်စီမှ ဖမ်းဆီးခေါ်ဆောင်သွားခဲ့ကြောင်း သတင်းရရှိသည်။

ယမန်နေ့ မေ (၁၉) ရက်နေ့တွင် ပန်သပြေရှိ စစ်ရှောင်စခန်းများအတွက် ရိက္ခာများ ပြင်ဆင်နေချိန် စစ်ကောင်စီအုပ်စု က ကား(၃) စီးပေါ် ရှိရိက္ခာကို မသင်္ကာသဖြင့် ရိက္ခာတင်ထားသည့်ကားနှင့် ကားဆရာ အပါအဝင် လူငယ်(၁၀)ဦးကို ဖမ်းဆီးခေါ်ဆောင်သွားကြောင် သိရသည်။

“သူတို့ စလာဖမ်းချိန်က မေးစရာလေးတွေရှိလို့ ကားပေါ်မှာဘာတွေဘာလဲ မသင်္ကာတဲ့ ပုံစံမျိုးနဲ့ ဖမ်းတယ်။ စစ်ပြီးတော့ ပြန်လွှတ်ပေးမယ်လို့တော့ ပြောပေါ့နော်။ မနေ့ညကတည်းက ကားပေါ်ကပါတဲ့ ပစ္စည်း အကုန်ချပြီးတော့ ပစ္စည်းတွေ စစ်တယ်”ဟု သီပေါဒေသခံ တစ်ဦး က သျှမ်းသံတော်ဆင့် ကိုပြောသည်။

အဆိုပါ (၁၀) ဦးကို သီပေါမြို့ရှိ နယ်မြေခံ (၂၃) တပ်မှာ စစ်ဆေးပြီး ယနေ့ မနက်တွင် သီပေါရဲစခန်းသို့ ရောက်ရှိပြီဖြစ်ကြောင်း စုံစမ်းသိရှိရသည်။

“ဒီနေ့ လွှတ်ဖို့တော့ ရှိတယ်။ တပ်ထဲကနေ အခု စခန်းရောက်နေပြီ အုပ်ထိန်းသူက လာထုတ်ပေးရင် ပြန်လွှတ်ပေးမယ်လို့ပြောတယ်။ ပြောတုန်း ကတော့ ရိက္ခာတွေ ပြန်ပေးမယ်လို့တော့ပြောတယ် ယူသွားတဲ့အတိုင်း ပါလား မပါလား တစ်ချက်ပြန်ကြည့်ရမယ်။” ဟု သီပေါဒေသခံ တစ်ဦး ကပြောသည်။

ပန်သပြေရွာတွင် ရှိသည့် စစ်ရှောင်စခန်းကို အလှူရှင်းများ လှူဒါန်းလာသည့် ပစ္စည်းများကို သွားရောက်ပို့ဆောင်ရန် ပြင်ဆင်နေချိန် စစ်ကောင်စီ က မသင်္ကာသဖြင့် ဖမ်းဆီးစစ်ဆေးခဲ့ ကြောင်း သိရသည်။

သီပေါမြို့တွင် ယခုရက်ပိုင်းတွင် ဆန္ဒပြလူငယ်များကို စစ်ဗျုဟာမှူးကိုယ်တိုင် လိုက်လံ ဖမ်းဆီးစစ်ဆေးမှု ပြုလုပ်နေကြောင်း တင်းကြပ်မှုရှိနေကြောင်း သီပေါဒေသခံများက ပြောသည်။

“ဘယ်သူ့ကိုဖမ်းမယ် ဘယ်ကိုသွားမယ်ဆိုတာ နယ်မြေခံရဲတွေ တပ်တွေကို အသိမပေးတော့ပဲနဲ့ ဗျုဟာမှူးကိုယ်တိုင် လှုပ်ရှားနေတယ်။ ပြည်သူတွေ တော်တော်များများကလည်း ဘယ်သူ့ကို လာဖမ်းမယ် ဘယ်ချိန်ဝင်ဖမ်းမယ်ဆိုတာ စိုးရိမ်စိတ်နဲ့ နေကြတယ်။” ဟု သီပေါလူငယ် တစ်ဦး ကပြောသည်။

တိုင်းရင်းသား လက်နက်ကိုင် အချင်းချင်းတိုက်ပွဲကြောင့် သီပေါမြို့နယ် တွင် နမ္မတူဘက်မှ ရောက်လာသည့် စစ်ဘေးရှောင်နှင့် နမ့်လန်ဘက်မှ ရောက်ရှိလာသည့် စစ်ဘေးရှောင် စုစုပေါင်း (၂၀၀၀) ခန့်ရှိကြောင်း သိရသည်။

ထိုစစ်ရှောင်များအတွက် စားနိပ်ရိက္ခာ၊ အမျိုးသမီး လစဉ်သုံးပစ္စည်းများ အထူးလိုအပ်နေကြောင်း သိရသည်။

Leave a Comments