သျှမ်းပြည်မြောက်ပိုင်း နမ္မတူမြို့နယ် ပန်လုံကျေးရွာတွင် တိုက်ပွဲများ မဖြစ်သော်လည်း ပြည်သူများ မိမိနေရပ်ကို လက်ရှိအချိန်ထိ မပြန်နိုင်သေးကြောင်းစုံစမ်းသိရှိရသည်။
နမ္မတူမြို့နယ် ပန်လုံကျေးရွာတွင် မတ်လပိုင်းက သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် မြောက်ပိုင်း မဟာမိတ် တပ်ဖွဲ့တို့ တိုက်ပွဲဖြစ်ပွားမှုကြောင့် ပြည်သူများ ထွက်ပြေးတိမ်းရှောင်ခဲ့ရပြီး ယနေ့ထိ နေရပ်ကို မပြန်နိုင်သေးကြောင်းသိရသည်။
“တိုက်ပွဲမဖြစ်ပေ့မဲ့ ခုချိန်ထိမပြန်သေးဘူး။ သူတို့ကတော့ တိုက်ပွဲထပ်ဖြစ်မှာဆို့လိုဆိုပြီး မပြန်သေးဘူး” ဟု သီပေါမြို့က စစ်ဘေးရှောင်ကူညီးပေးနေသည့် အမျိုးသမီးကပြောသည်။
ပြည်သူများက ကျေးရွာကို မပြန်နိုင်သေးပါက စားဝတ်နေရေးအတွက် အခက်ခဲများ၊ လယ်ယာ လုပ်ငန်းများကို ရပ်ဆိုင်ထားရပြီး နောက်နှစ်များအတွက် ဆင်းရဲပြီး အကြွေးပိုများလာနိုင်ကြောင်း ပန်လုံကျေးရွာ ဒေသခံ အမျိုးသားတစ်ဦးက ပြောသည်။
“ အခြေနေစောင့်ကြည့်ရတာပေါ့။ စစ်ပြေးရှောင်းအားလုံးက ဒုက္ခရောက်နေပြီး ရွာလည်းအရမ်းပြန်ချင်နေကြပြီ။ လချီကြာတော့မတောင့်ခံနိုင်တော့ဘူး။ မိုးကျတော့ မြေလယ်ယာ လုပ်ချိန်ဆို တော့ ဒီနှစ်မလုပ်ဖြစ်ရင် နောက်နှစ်ကြရင် ဆင်းရဲမွဲသေ အကြွေးတွေတင်ပြီးနေရလိမ့်မယ်” ဟု ပန်လုံကျေးရွာ အမျိုးသား တဦး က ပြောသည်။
နမ္မတူမြို့နယ် ပန်လုံကျေးရွာအတွင်း ( RCSS/SSA) တပ်သားများ ကျေးရွာအတွင်းတည်ရှိနေကြောင်း၊ တပ်သားများ ကျေးရွာအတွင်း ရှိနေသမျှ တိုက်ပွဲထပ်မံဖြစ်လာနိုင်ကြောင်း လည်း ပန်လုံကျေးရွာ ပြည်သူများက ပြောသည်။
ယခုရက်ပိုင်း တိုက်ပွဲများ ငြိမ်နေသဖြင့် ဒေသခံများက ကျေးရွာသို့ ခေတ္တပြန်သွားချိန် RCSS/SSA က ကျေးရွာအတွင်းနေထိုင်ပြီး ရွာသားများကို ကျေးရွာအတွင်း မနေထိုင်ရန် တိမ်းရှောင်ရန် လာရောက် ပြောဆိုသဖြင့် ပန်လုံပြည်သူများက သီပေါမြို့ နှင့်လားရှုှိးမြို့သို့ ထပ်မံရှောင်တိမ်းလာရကြောင်း ပန်လုံကျေးရွာ တွင်နေထိုင်သည့် သျှမ်းလူငယ် တဦးက ပြောသည်။
“ ကျနော်တို့ရွာကိုပြန်သေးတယ်။ ရွာထဲမှာ RCSS တို့ကရောက်နေတာ။ သူတို့က ကျနော်တို့ကို ရွာထဲမနေနဲ့ တိမ်းရှောင်နေလို့ပြောတယ်။ ပြီးတော့ ဘုန်းကြီးတွေ၊ ဦးဇင်တွေကိုလည်း ရွာထဲမနေဖို့ပြောထားသေးတယ်။ ဘုန်ကြီးတွေလည်း လာရှိုးကျောင်းမှာသွားနေကြတယ်” အထက်ပါ သျှမ်းလူငယ်က ပြောပြသည်။
ပန်လုံကျေးရွာတွင် သျှမ်းလူမျိုးသာမက တအာင်း (ပလောင်) လူမျိုးများ နှစ်ပေါင်းများစွာ အတူယှဉ်တွဲနေထိုင်လာသည့် ကျေးရွာတခုဖြစ်သည်။
ပန်လုံကျေးရွာ RCSS/SSA နှင့် မြောက်ပိုင်းမဟာမိတ်တို့ တိုက်ပွဲပြင်းထန်းမှုကြောင့် ပြည်သူနေအိမ် ၄၅ အိမ် မီးလောင်ဆုံးရှုံးသွားခဲ့ရကြောင်း သိရသည်။
အလားတူ နမ္မတူမြို့နယ် မန်းလီကျေးရွာတွင် လည်း တရွာလုံးနီးပါး မီးရှို့ခံရပြီး ပြာကျခဲ့ရသည်။
ဖေဖော်ဝါရီ ၁ ရက်နေ့မှ စပြီး စစ်ကောင်စီမှ အာဏာလုယူပြီးနောက်ပိုင်း တိုင်းရင်းသားလက်နက်ကိုင် အချင်းချင်းတိုက်ပွဲများ မကြာခဏဖြစ်ပွားနေလျက်ရှိကြောင်းသိရသည်။
Leave a Comments