ပြည်သူ့လုံခြုံရေး ကို တာဝန်ယူမည် ဟု ပြောဆိုပြီး သီပေါမြို့ပေါ်သို့ သျှမ်းပြည်မြောက်ပိုင်းမှာ သမိုင်းဝင် အထင်ကရ ပြည်သူ့စစ်တပ်ဖွဲ့တစ်ဖွဲ့ ရောက်ရှိ လာပြီး လူထု လုံခြုံရေးအတွက် အာဏာသိမ်းတပ်နှင့် ဆွေးနွေးခဲ့သည်။
သူတို့ရောက်ရှိလာတာ တစ်ပတ်နီးပါးရှိပါပြီ။
သီပေါမြို့ ဒေသခံအတွက် သူခိုး၊ ရန်သူများကို ကာကွယ်ပေးရန် လုံခြုံရေး အပြည့်အဝပေးရန် နှင့် ဆန္ဒပြ သည့် လူငယ်များကို စစ်ကောင်စီ မှ မဖြိုခွင်းနိုင်ရန် အတွက် ဟု ဆိုပြီး ရောက်ရှိ လာသည့် အဆိုပါ ပြည်သူ့စစ်တပ်က စိန်ကျော့ ပြည်သူ့စစ်တပ်ဖွဲ့ဖြစ်ပါသည်။
သို့သော် သီပေါ လူငယ်များအနေဖြင့် လုံခြုံရေး အတွက်ရောက်လာသည့် စိန်ကျော့ပြည်သူ့စစ်တပ်ဖွဲ့ဝင်များသည် အာဏာသိမ်းတပ် ဆင့်ခေါ်၍ ရောက်ရှိလာခြင်းဖြစ်ကြောင်း၊ ၎င်းတို့အားအယုံအကြည် မရှိကြောင်း၊ ပြည်သူ့စစ်များသည် စစ်ကောင်စီ တပ်ဖွဲ့ ၏ လက်အောက်ခံ တွင်တည်ရှိသည့်အတွက် စိုးရိမ်မှုရှိနေကြောင်း လည်း သီပေါ ဆန္ဒပြခေါင်းဆောင် လူငယ်တဦး က သျှမ်းသံတော်ဆင့် ကို ပြောသည်။
“ ယခင်ကတည်းက သူတို့က စစ်ကောင်စီနဲ့ မိတ်ဖက်တွေပါ။ သူတို့က ၁ ရက်နေ့က ဆန္ဒပြပြည်သူတွေကို ကာကွယ်ပေးမယ်။ စစ်တပ်ပစ်ရင် သူတို့ကာကွယ်ပေးမယ်ဆိုပြီး အယုံသွင်းပါတယ်။ တကယ်စစ်ကောင်စီက ပစ်ရော ပြည်သူစစ်က အလိုလိုရှောင်ထွက်သွားပါတယ်။” ဟု ဆန္ဒပြ ခေါင်းဆောင် လူငယ်တဦး က ဆိုသည်။
သီပေါမြို့ လူထု သပိတ်စစ်ကြောင်းကို အကြမ်းဖက် ဖြိုခွင်းမှုမပြုလုပ်ရန် အတွက် စိန်ကျော့ ပြည်သူ့စစ်မှ စစ်ကောင်စီ တပ်ဖွဲ့ကို သွားရောက်ညှိနှိုင်းပေးခဲ့သည်ဟု ပြောဆိုခဲ့သော်လည်း မေ(၂) ကမ္ဘာလုံးဆိုင်ရာ နွေဦးတော်လှန်ရေးနေ့တွင် လူထုသပိတ်ဖြိုခွင်းခံရပြီး လူငယ်တဦး ကျဆုံးခဲ့ရသည့်အတွက် ဆိုင်ကျော့ပြည်သူ့စစ်ကို အယုံအကြည်လုံးဝမရှိတော့ ကြောင်း အထက်ပါ လူငယ်က ပြောသည်။
“ တပ်နဲ့ ပြည်သူစစ်နဲ့ ဆွေးနွေးညှိနှိုင်းမှုတစ်ခုလုပ်ပါတယ်။ ပြည်သူတွေကို သေနတ်နဲ့ မပစ်ခတ်ဖို့ဆိုပြီး၊ ဒါပေ့မယ့် လည်း ထင်ထားတဲ့ အတိုင်းပါဘဲ ပစ်ပါတယ်။ ကမ္ဘာနွေဦးတော်လှန်ရေးနေ့မှာဘဲ ၁ ဦးကျသွားတယ်။” အသက် ၂၅နှစ်အရွယ် ဆန္ဒပြရာတွင် ပါဝင်သည့် အမျိုးသမီး တဦးကပြောသည်။
စိန်ကျော့ပြည်သူ့စစ် သည် သီပေါမြို့ပြည်သူများ၏ လုံခြုံရေး အရ တာဝန်ယူရန် လာရောက်စောင့်ကြည့်ပေးခြင်း၊ ပြည်သူများဆန္ဒပြလူထုများ အန္တရာယ်ကြုံလာပါက ပြည်သူဘက် ရပ်တည်ကာ ကာကွယ်ပေးမည်ဟု ကြွေးကြော်ကာ လာရောက်ကြခြင်းဖြစ်ကြောင်း သီပေါမြို့ ဒေသခံ အမျိုးသမီး တဦးက ပြောပြသည်။
“ သူတို့က (စိန်ကျော့ ပြည်သူ့စစ်) က ပြည်သူ့ဘက်လို့ ပြောနေပေမယ့် စစ်ကောင်စီတပ်ရဲ့ အလိုကျလုပ်ရတယ်။ စစ်ကောင်စီ ရဲ့ လက်အောက်မှာရှိတာဆိုတော့ စစ်ကောင်စီ အမိန့်ပေးရင်လုပ်ရမှာပဲလေ” ဟု ၎င်း အမျိုးသမီးက ပြောသည်။
စိန်ကျော့ပြည်သူ့စစ်တပ်ဖွဲ့ ခေါင်းဆောင် သည် ၁၉၈၉ ခုနှစ်က စစ်တပ်နှင့် အပစ်ရပ်ငြိမ်းချမ်းရေးယူထားသည့် သျှမ်းလက်နက်ကိုင်တပ်တစ်ခု၏ ဉက္ကဌ ဗိုလ်ချုပ်လွယ်မော ဆိုသူ ဖြစ်သည်။ ၂၀၀၉ ခု နှစ်က် တပ်မဟာ သုံးခု ဦးဆောင်ပြီး စစ်အစိုးရလက်အောက်ခံ ပြည်သူ့စစ်တပ် အဖြစ် အသွင်ပြောင်းထားသည်။
လူထုကို မပစ်ရန် စစ်တပ်ကို တားမရသော်လည်း ပြည်သူ့စစ်တပ်ဖွဲ့တဖွဲ့အနေဖြင့် တတ်နိုင်သည့် ဘက်က လူထု ဘက် ရပ်တည်ပေးကြောင်း အမည်မဖေါ်လိုသည့် စိန်ကျော့ ပြည်သူ့စစ်အရာရှိငယ် တဦးက သျှမ်းသံတော်ဆင့်အားပြောသည်။
“ကျနော်တို့က လူထုဘက်ရပ်တည်တယ် ဆိုပေမယ့် တပ်ကို ရန်ပြုလို့မရဘူးလေ။ ကျနော်တို့လုပ်နိုင်တဲ့အပိုင်းက ကျနော်တို့ လုပ်ပေးတယ်။ အဖမ်းခံ ရရင် ပြန်လွှတ်ပေးဖို့ ရဲ ကိုကော တပ်ကိုကော ကူပြောပေးတယ်။ တပ်က ဘယ်မှာရှိ လဲ ရဲက ဘယ်မှာ ရှိလဲ သူတို့လာရင် ဘယ်ကလာ နေပြီဆိုတာ ဆန္ဒပြတဲ့သူတွေနဲ့ ထိပ်တိုက်မဖြစ်အောင် ကျနော်တို့ ချိတ်ဆက်သတင်းပေးတာဘဲ၊ ကျနော်က လူထု ကို ဘယ်တော့မှ ရန်မပြုဘူး။ လူထု ကိုမပစ်နဲ့လို့ တပ်ကို ကျနော်တို့ တားလို့မရပေမယ့် လူထုကို ကူဖို့နည်းလမ်းတွေ အများကြီးရှိပါတယ်၊ ကူလည်းကူညီနေပါတယ် ” – ဟု အမည်မဖေါ်လိုသည့် စိန်ကျော့ ပြည်သူ့စစ်အရာရှိ တဦးကပြောသည်။
သီပေါဒေသခံများ ပြောပြချက် အရ မေ (၂) ကမ္ဘာ့လုံးဆိုင်ရာ နွေဦးတော်လှန်ရေး နေ့ တွင် ဆန္ဒပြရာ မှာ ဖမ်းဆီးခံရသည့် လူငယ်များကို ပြန်လွှတ်ပေးရန် စိန်ကျော့ ပြည်သူ့စစ် က အမှန်ကူညီပေးခဲ့ကြောင်းလည်း သိရသည်။
လက်ရှိ သီပေါမြို့ ပေါ်အတွင်း စစ်အာဏာရှင် အလိုမရှိကြောင်း ဆန္ဒပြမရအောင် စစ်ကောင်စီ အုပ်စု နှင့် ပြည်သူ့စစ်အုပ်စု ပူးပေါင်းကာ တပ်ဖြန့်ထားကြောင်း၊ အရပ်ဝတ်ဖြင့် သာ ဝတ်ဆင်ပြီး မြို့လည်ခေါင်တွင် သွားလာနေကြောင်း သိရသည်။
သီပေါမြို့တွင် အာဏာသိမ်းစစ်ကောင်စီဖက်မှ တင်းကြပ်စွာစောင့်ကြည့်နေသော်လည်း ပြည်သူများက ရရာနည်းလမ်းများဖြင့် စစ်အာဏာရှင်စနစ်ကို အလိုမရှိကြောင်း ဆန့်ကျင်ဆန္ဒပြလျက်ရှိနေသည်။
