သျှမ်းပြည်မြောက်ပိုင်း ကွတ်ခိုင်မြို့ တွင် စစ်ကောင်စီ နှင့် တိုင်းရင်သားလက်နက်ကိုင်တပ်ပေါင်းစုတို့ စစ်ရေးလှုပ်ရှားမှု သည် ယနေ့ မေ (၅) ရက် ညနေပိုင်း အချိန်ထိ လက်နက်ကြီး ဆက်တိုက်ပစ်ခတ်ကာ စစ်ရေး ပြင်းထန်နေဆဲ ဟု စုံစမ်းသိရသည်။
ကွတ်ခိုင်မြို့ အနီးတဝှိက် တွင် ယမန်နေ့ (မေ ၄)ရက်မှ ညနေ ၃နာရီမှ စတင်ကာ ယနေ့ (မေ ၅)ရက် အထိ စစ်ကောင်စီ တပ်ဖွဲ့ နှင့် ကိုးကန့် (MNDAA)၊ တအာင်း (ပလောင်) TNLA တို့ ပူးပေါင်းတပ်ဖွဲ့ တို့စစ်ရေးပြင်းထန်းနေဆဲဖြစ်ပြီး၊ ကွတ်ခိုင်ပြည်သူများဗုံးခိုကျင်း တွင် ရှောင်တိမ်းနေရပြီး၊ တချို့မှာ နီးစပ်ရာဘုန်းကြီးကျောင်းတွင် ထွက်ပြေးတိမ်းရှောင်နေရကြောင်း ဒေသခံများ ပြောပြချက် အရသိရသည်။
“လက်ရှိတိုက်ပွဲကတော့ ဖြစ်နေဆဲပဲ။ လောလောဆယ်တော့ ကျနော်တို့ဆီ ဗုံးခိုကျင်းတွေ တူးထားတယ်။ အတတ်နိုင်ဆုံး တော့ ဗုံးခိုကျင်းနဲ့ နေကြတယ်။ လက်နက်ကြီးသံတွေ တိုက်ပွဲသံတွေ အရမ်းပြင်းထန်လာရင် ဗုံးခိုကျင်းထဲ ဝင်နေကြတယ်။ ” ဟု မန်ဘန်ဒေသခံ အမျိုးသား တစ်ဦး က သျှမ်းသံတော်ဆင့် ကိုပြောသည်။
တပ်မတော်ဘက်မှ ပစ်ခတ်သည့် ကျည်သည် ကျေးရွာထဲတွင် ကျရောက်သဖြင့် နေအိမ် (၅) လုံး နှင့် ကျွဲ တစ်ကောင် သေဆုံးခဲ့ရကြောင်း ၎င်းကဆက်ပြောသည်။
“တိုက်ပွဲ ပိုပြင်းထန်လာမှာပဲ စိုးရိမ်ရတယ်။တိုက်ပွဲပိုပြင်းထန်လာရင် ဒီမှာဆက်နေလို့မရတော့ဘူး ရှောင်ရမှာပေါ့။ မြို့ထဲလည်း လောလောဆယ် မလုံခြုံဘူးပေါ့ ဘာလို့လဲဆိုတော့ မြို့နားမှာလည်း တိုက်ပွဲဖြစ်လို့။” ဟု မန်ဘန်ဒေသခံ တစ်ဦး ကပြောသည်။
ယခုလက်ရှိချိန်ထိကွတ်ခိုင်မြို့ အနီးတဝှက် လက်နက်ကြီး၊ လက်နက်ငယ်များဖြင့် ပစ်ခတ်နေသေးကြောင်း ကွတ်ခိုင် ဒေသခံများ ပြောပြချက် အရသိရသည်။
“တိုက်ပွဲပြင်းထန်လာရင် ဗုံးခိုကျင်းထဲ ဝင်လိုက်တယ်။ တိုက်ပွဲအခြေနေကတော့ အခုထိတော့ လက်နက်ကြီးတွေ ပစ်နေကြတုန်း။ ထိခိုက် ဒဏ်ရာ ရတဲ့သူလည်း ရှိတယ်လို့တော့ကြားတယ်။ ဘယ်လောက်ရှိလဲတော့ မသိရသေးဘူး ” ကွတ်ခိုင် ဒေသခံ အမျိုးသမီး တစ်ဦး က သျှမ်းသံတော်ဆင့် ကိုပြောသည်။
ယမန်နေ့ တွင် ဖြစ်ပွားသည့် တိုက်ပွဲကြောင်း အရပ်သား (၅)ဦး ဒဏ်ရာရရှိပြီး၊ ထိုထဲမှ (၄)ဦးသည် ဒဏ်ရာပြင်းထန်သဖြင့် လားရှိုးမြို့ သို့ပို့ဆောင်ခဲ့ပြီး၊ နေအိမ် (၅)အိမ် လက်နက်ကြီး ထိမှန်ခဲ့ကြောင်း သိရသည်။
ကွတ်ခိုင်မြို့ အနီး တိုက်ပွဲ ဆက်လက်ပြင်းထန်းနေပြီး မြို့ အဝင် တိုးဂိတ် အနီးရှိ ပြည်လုံးချမ်းသာ ကျောင်းတိုက်တွင် စစ်ရှောင် (၂၀၀)ကျော်ရောက်ရှိနေကြောင်း သတင်းရရှိသည်။
“ဒီနေ့ တိုက်ပွဲသတင်းတက်လာတာတော့ မရှိဘူး။ မနေ့ကတော့ မန်လုံနားမှာ တစ်နေရာဖြစ်တယ်။ မန်ဘန်ရွာနားမှာ တစ်နေရာဖြစ်တယ်။ စစ်တပ်ဘက်က ထိုးစစ်ဆင်လာတာရှိတယ်။” ဟု TNLA မှ သတင်းပြန်ကြားရေး တာဝန်ခံ ဗိုလ်မှူး မိုင်းအိုက်ကျော်က သျှမ်းသံတော်ဆင့် ကို ပြောသည်။
MNDAA နှင့် TNLA တပ်ဖွဲ့ ၂ဖွဲ့ ပူးတွဲရှိနေသည့် အချိန် စစ်ကောင်စီ ၏ တပ်ဘက်က လာရောက်ပစ်ခတ်သည့် အတွက် တိုက်ပွဲဖြစ်ရကြောင်း၊ စစ်ရေး တင်းမာမှုသည်လည်း စစ်ကောင်စီပေါ်မူတည်ကြောင်း မိုင်းအိုက်ကျော် က ဆိုသည်။
သျှမ်းပြည်မြောက်ပိုင်းတွင် စစ်ကောင်စီ နှင့်တိုင်းရင်းသား လက်နက်ကိုင် များကြား တိုက်ပွဲဖြစ်ပွားခြင်း၊ လက်နက်ကိုင် တိုင်းရင်းသား အချင်းချင်း တိုက်ပွဲဖြစ်ပွားမှုများ ကြောင့် ဒေသခံ နေအိမ်များ မီးလောင်ပျက်စီးဆုံးရှုံးခြင်း၊ စစ်ဘေးရှောင်များ ထွက်ပြေးတိမ်းရှောင်နေရခြင်းများ ရှိသည်။
Leave a Comments