တိုင်းရင်းသား လက်နက်ကိုင် အချင်းချင်း တိုက်ပွဲကြောင့် ဒေသခံ ပြည်သူ နေအိမ် (၅၀) ကျော် မီးလောင်ပျက်စီး ဆုံးရှုံးခဲ့ရကြောင်း သတင်းရရှိသည်။
မတ်လ နောက်ဆုံးပတ်မှ စတင်ပြီး ယနေ့ချိန်ထိ သျှမ်းပြည်မြောက်ပိုင်း နမ္မတူမြို့နယ် နှင့် ကျောက်မဲမြို့နယ် အတွင်းရှိ ရှမ်းပြည်ပြန်လည်ထူထောင်ရေးကောင်စီ၊ ရှမ်းပြည်တပ်မတော် (RCSS/SSA) နှင့် မြောက်ပိုင်း မဟာမိတ်တို့ တိုက်ပွဲကြောင့် ဒေသခံ နေအိမ် (၅၀) ကျော် မီးလောင်ပျက်စီးဆုံးရှုံးခဲ့ရကြောင်း ဒေသခံများထံမှ စုံစမ်းသိရှိရသည်။
“ကျနော်တို့ စာရင်းကောက်ရကောက်ထားရသလောက်တော့ပန်လုံကျေးရွာမှာ (၄၅) အိမ် မီးလောင်တယ်။ဝမ်ဆာ (၄) အိမ်၊ ရေအိုး (၂) အိမ် နဲ့ ဝမ်လီ (၅) အိမ် မီးလောင်ပျက်စီးဆုံးရှုံးရတယ်” ဟု နမ္မတူမြို့နယ် စစ်ဘေးရှောင် ကူညီပေးသည့် စေတနာ့ ဝန်ထမ်း တစ်ဦးက သျှမ်းသံတော်ဆင့် ကိုပြောသည်။
နမ္မတူမြို့နယ်အတွင်း ၁ လနီးပါးခန့် တိုက်ပွဲဖြစ်ပွားခဲ့ပြီး ယနေ့ချိန်ထိ နှစ်ဖက်တပ် တိုက်ပွဲတင်းမာမှုကြောင့် စစ်ဘေးရှောင် (၂၀၀၀) ကျော် ရှိကြောင်း ဒေသခံများက ပြောဆိုကြသည်။
“နမ္မတူဘက်က စစ်ဘေးရှောင်တစ်ချို့တွေတော့ သီပေါမြို့နယ်ထဲမှာ ဝင်ရောက် ခိုလှုံနေကြတယ်။”ဟု ဒေသခံ တစ်ဦး ကပြောသည်။
ဧပြီ (၂၅) ရက်က ရှမ်ပြည်ပြန်လည်ထူထောင်ရေးကောင်စီ၊ရှမ်းပြည်တပ်မတော်(RCSS/SSA) နှင့် မြောက်ပိုင်း မဟာမိတ်တို့သည် နမတူမြို့နယ် ပန်လုံကျေးရွာအနီး တိုက်ပွဲပြင်းထန်မှုကြောင့် တာပူကျေးရွာ စစ်ရှောင်များသည် သီပေါမြို့နယ်အတွင်းသို့ ထပ်မံထွက်ပြေးတိမ်းရှောင်လာရကြောင်း စစ်ရှောင်ကူညီပေးနေသူများထံမှ သိရသည်။