သျှမ်းပြည်တောင်ပိုင်း လွိုင်လင်ခရိုင် နမ့်စန်မြို့နယ်တွင် အာဏာသိမ်းစစ်တပ်နှင့် RCSS/SSA တို့ ယမန်နေ့(ဧပြီ ၂၃)ရက် ညနေပိုင်းတွင် တိုက်ပွဲ (၂)ကြိမ် ဖြစ်ပွားခဲ့ကြောင်း သတင်းရရှိသည်။

သျှမ်းပြည်ပြန်လည် ထူထောင်ရေးကောင်စီ၊ သျှမ်းပြည်တပ်တော် (RCSS/SSA)နှင့် အာဏာသိမ်း စစ်တပ် တို့သည် ယမန်နေ့ ညနေ ၃နာရီခန်းတွင် နမ့်စန်မြို့နယ် ဟိုင်းဖက်ကျေးရွာအုပ်စု လွယ်ငင်းကျေးရွာတွင် တကြိမ်၊ ညနေ (၅)နာရီတွင် နမ့်စန်မြို့နယ် ခိုလမ်မြို့နယ်ခွဲလွယ်လ ကျေးရွာအုပ်စု ပါဆွမ့် ကျေးရွာအနီးတွင် တကြိမ်ဖြစ်ပွားခဲ့ကြောင်း RCSS/SSA ၏ သတင်းဌာန တခုဖြစ်သည့် Tai Freedom တွင်ရေးသားထားသည်။

အဆိုပါ တိုက်ပွဲနှင့်ပတ်သက်ပြီး RCSS/SSA ပြောရေးဆိုခွင့်ရှိသူ ဗိုလ်မှူးခမ်းစံ က “ မနေ့က လွိုင်လင်ခရိုင် နမ့်စန်မြို့နယ် မှာတိုက်ပွဲဖြစ်ပွားတယ်ဆိုတာ အတည်ပြုလို့ရပါတယ်။ အသေးစိတ်ကတော့ ကျနော်ဆီ မရောက်သေးဘူး။ထိတွေ့မှုတိုက်ပွဲပါပဲ” ဟု သျှမ်းသံတော်ဆင့်ကို ပြောသည်။

နမ့်စန်မြို့နယ် ဖြစ်ပွားသည့် တိုက်ပွဲတွင် အာဏာသိမ်း စစ်တပ် မှ တပ်သားများ ဒဏ်ရာပြင်းထန်စွာ ရရှိထားကြောင်း လည်း Tai Freedom တွင်ရေးသားထားသည်။

ထို့အပြင် နမ့်စန်မြို့နယ် ခိုလမ်မြို့နယ်ခွဲလွယ်လ ကျေးရွာအုပ်စု ပါဆွမ့် ကျေးရွာအနီးတွင် တိုက်ပွဲဖြစ်ပွားမှုကြောင့် ပါဆွမ့်ေကျေးရွား သွားလမ်းကို အကြမ်းဖက်စစ်ကောင်စီ ဘက်မှ ကန့်သတ်ခဲ့ပြီး ရွာသား (၆)ဦးကိုလည်း အကြမ်းဖက်စစ်ကောင်စီမှ ဖမ်းဆီးသွားကြောင်း သိရသည်။

ယနေ့ (ဧပြီ၂၄ ရက်)အထိ အာဏာသိမ်း စစ်တပ် နှင့် ဌာနေပြည်သူ့စစ် ပူးပေါင်းအဖွဲ့တို့သည် တိုက်ပွဲဖြစ်ပွားရာဒေသဘက်သို့ စစ်အင်အား ဖြည့်နေကြောင်းလည်း နမ့်စန်မြို့ ဒေသခံ တဦး က ပြောပြသည်။

ဧပြီလ ၂၂ ရက် နံနက်ပိုင်းတွင် သျှမ်းပြည်တောင်ပိုင်း လင်းခေးခရိုင် မိုးနဲမြို့နယ်အတွင်းတွင်လည်းကောင်း၊ လွိုင်လင်ခရိုင် နမ့်စန်မြို့နယ် အတွင်းနှင့် ကျေးသီးမြို့နယ် မိုင်းနောင်မြို့နယ်ခွဲ အတွင်းတို့တွင် (RCSS/SSA)နှင့် အာဏာသိမ်း စစ်တပ် တို့တိုက်ပွဲ ဖြစ်ပွားခဲ့သည်ဟုသိရသည်။

သျှမ်းပြည်တပ်မတော် RCSS/SSA သည် တစ်နိုင်ငံလုံးအပစ်အခတ် ရပ်စဲရေးစာချုပ် လက်မှတ်ရေးထိုးထားသော်လည်း တပ်မတော်မှ တိုင်းပြည်အာဏာ လုယူမှုအား ရှုပ်ချကြောင်း ဒါ့အပြင် ဆန္ဒပြလူထုနှင့်အတူ ရပ်တည်ကြောင်း နှစ်ကြိမ်ထက်မနည်း သဘောထားထုတ်ပြန်ကြေငြာထားသည်။