သျှမ်းပြည်မြောက်ပိုင်း နမ္မတူမြို့နယ် စစ်ရှောင်ပြည်သူများ (၂၀၀၀) ကျော် အတွက် စားနပ်ရိက္ခာ အခက်အခဲ ရှိနေကြောင်း စုံစမ်းသိရှိရသည်။
အဆိုပါ စစ်ရှောင်များသည် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် မြောက်ပိုင်းမဟာမိတ်တို့ ကြားတိုက်ပွဲ ပြင်ထန်းမှုကြောင့် နေရပ်စွန့်ခွာပြီး ထွက်ပြေး တိမ်းရှောင်လာသည့် သူများဖြစ်သည်။
“ စစ်ဘေးရှောင်တွေက (၂၀၀၀ )ကျော် ရှိတယ်။ အခက်အခဲကတော့ အစားသောက်တွေမလုံလောက်တော့ဘူး” ဟု စစ်ဘေးရှောင်း ကူညီပေးနေသည့် အမျိုးသား တဦး က သျှမ်းသံတော်ဆင့်ကိုပြောသည်။
နမ္မတူမြို့နယ်တွင် စစ်ဘေးရှောင်ပြည်သူသည် ရေအိုဘုန်းကြီးကျောင်း၊ မန်းစံ ဘုန်းကြီးကျောင်း၊ ပန်စံဘုန်းကြီးကျောင်း တို့တွင် လာရောက်ခိုးလှုံနေကြောင်းသိရသည်။
“ တချို့ကလည်း ပြန်သွားလိုက်ပြန်လာလိုက်ပါပဲ။ စစ်က မငြိမ်းသေးဘူး။ ဒီကိုလာရောက်ခိုလှုံနေတာက ကျေးရွာအုပ်စု (၄)ခု က ဒေသခံတွေ ဖြစ်တယ်” ဟု စစ်ရှောင်ကူညီပေးသူ တဦးက ဆိုသည်။
နမ္မတူမြို့နယ်တွင် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် မြောက်ပိုင်း မဟာမိတ်တို့ တိုက်ပွဲဖြစ်ပွားရာတွင် ၂ လ ကြာခဲ့ပြီဖြစ်ကြောင်း၊ ပြည်သူနေအိမ် တချို့ မီးလောင်းပျက်စီးသွားပြီး သေဆုံးသူများလည်း ရှိကြောင်းသိရသည်။
Leave a Comments