သျှမ်းပြည်မြောက်ပိုင်း မူဆယ်မြို့နယ် ဖိုင်ကျောင်းကျေးရွာ တွင် ယမန်နေ့( ဧပြီ ၅ ရက်) ည ၉ နာရီကျော်အချိန်တွင် ကားတစီးပေါ်မှ ဗုံးလာပစ်သွားသဖြင့် ဆိုင်ကယ်ပြင်ဆိုင် ကို ထိမှန်ပျက်စီးသွားကြောင်း စုံစမ်းသိရသည် ။
“ ည ၉ နာရီ ကျော်လောက်မှာ ရွာရဲ့ ဆိုင်ကယ်ပြင်ဆိုင်နားမှာ ဗုံးပေါက်ကွဲတာ။ ပြီးတော့ သေနတ်တွေနဲ့လည်းပစ်တယ်။ ထိခိုက်ဒဏ်ရာရရှိတဲ့သူတွေကတော့ မရှိဘူး” ဟု မူဆယ်မြို့ ဒေသခံတစ်ဦး ကပြောသည်။
ဖိုင်ကျောင်းကျေးရွာရှိ ဆိုင်ကယ်ဆိုင်ကို မည့်သည် အဖွဲ့စည်းမှ လာရောက်ပစ်ခတ်သည်ကို မသိရှိရသေးကြောင်း၊ ည ၈ နာရီ ကျော်ချိန်တွင် မူဆယ်မြို့တွင် ဗုံးပေါက်ကွဲမှုများနေ့စဉ်ဖြစ်ပွားနေလျက်ရှိကြောင်း ဒေသခံ တစ်ဦးကပြောသည်။
စစ်ကောင်စီမှ ဖေဖော်ဝါရီ ၁ ရက်နေ့ အာဏာသိမ်းယူပြီးနောက်ပိုင်း ည ၈ နာရီမထွက်ရ အမိန့်ုထုတ်ခဲ့သည်။
“ ဘယ်သူက လာပစ်သွားတယ်ဆိုတာကိုတော့ မသိရဘူး။ ည ၈ နာရီ ကျော်ရင် မူဆယ်မှက ဗုံးပေါက်ကွဲသံနေ့တိုင်းကြားနေရတယ်။ ၄ ရက်လောက်ရှိပြီး ဆက်တိုက်ကြားနေရတယ်။ တနေ့တနေ့ ပိုဆိုးလာတယ်။ သေနတ်နဲ့ပါပစ်လာပြီးဆိုတော့။ ပိုပြီးသတိထားနေရတယ်။” ဟု ဒေသခံတစ်ဦးက ပြောသည်။
တဖက်တွင်လည်း မူဆယ်မြို့တွင် အကြမ်းဖက်စစ်ကောင်စီ နှင့် KIA တပ်ဖွဲ့တို့နှင့် စစ်ရေးဖြစ်နေကြောင်းသိရသည်။
မူဆယ်မြို့တွင် နေ့စဉ်နဲ့အမျှ ဗုံးပေါက်ကွဲမှုများ၊ နေအိမ်များကို အကြမ်းဖက် စစ်ကောင်စီ အုပ်စုက သေနတ်ဖြင့် လိုက်လံပစ်ခတ်မှုများကြောင့် ဒေသခံများက စိုးရိမ်းမှုဖြင့်နေထိုင်နေရကြောင်းသိရသည်။
