သျှမ်းပြည်မြောက်ပိုင်း သီပေါမြို့နယ် နာမခေါ်ကျေးရွာတွင် ယနေ့ (မတ် ၂၄)ရက် မနက် ၅နာရီဝန်းကျင်တွင် သျှမ်းစစ်တပ် (၂) တပ် ပစ်ခတ်မှုကြောင့် အရပ်သားနေအိမ်ပေါ် လက်နက်ကြီးကျခဲ့ပြီး ဒေသခံများ ထွက်ပြေးတိမ်းရှောင် နေရကြောင်း သတင်းရရှိသည်။
သီပေါမြို့ နယ် နားမခေါ်ကျေးရွာတွင် သျှမ်းတပ် ၂တပ်ဖြစ်သည့် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA)နှင့် သျှမ်းပြည်ပြန်လည်ထူထောင်ရေးကောင်စီ။ သျှမ်းပြည်တပ်မတော် (RCSS/SSA)တို့ တိုက်ပွဲဖြစ်ပွားက အရပ်သားနေအိမ် ၂လုံးပေါ် လက်နက်ကြီး ကျပြီး၊ ဒေသခံများ သီပေါမြို့ ပေါ်သို့ ထွက်ပြေးတိမ်းရှောင်သွားရကြောင်း သီပေါမြို့ဒေသခံများ ပြောပြချက် အရသိရသည်။
“ ဒီနေ့မနက်မိုးတောင်မလင်းသေးဘူး။ လက်နက်ကြီးက အိမ်ပေါ်ကျတယ်။ ရွာသူရွာသားတွေက ဒီနေ့မနက်အစောကြီး ထွက်ပြေးနေရတယ်။ တချို့ဆိုရင် အဝတ်တွေ ဖုန်းတွေတောင်မယူလာနိုင်ခဲ့ဘူး။ တချို့က သူတို့အမျိုးအိမ်မှာ သွားနေကြတယ်” ဟု သီပေါမြို့ ဒေသခံအမျိုးသမီး တဦး က ကပြောသည်။
သျှမ်း တပ် (၂)တပ် ပစ်ခတ်မှုကြောင့် နားမခေါ်ကျေးရွာရှိ လုံးစိုင်းလိတ်အိမ်နှင့် လုံးအာရိယ နေအိမ်ပေါ် လက်နက်ကြီး ကျခဲ့ပြီး လူထိခိုက်မှု မရှိကြောင်းလည်း သိရသည်။
“ ဒီနေ့ မနက် ကျနော်တို့နဲ့ SSPP တိုက်ပွဲဖြစ်တာ ဟုတ်ပါတယ်။ နာမခေါ်ရွာက ဒေသခံအိမ်ကို လက်နက်ထိပါတယ်။ လူထိခိုက်မှုကတော့ မသိရသေးဘူး” ဟု RCSS/SSA ၏ ပြောရေးဆိုခွင့်ရှိသူ ဗိုလ်မှူးခမ်းစံ က သျှမ်းသံတော်ဆင့်ကို ပြောသည်။
တိုက်ပွဲဖြစ်ပွားမှုကြောင့် သီပေါမြို့နယ် အတွင်းရှိ ကျေးရွာတချို့ နေရပ်စွန့်ခွာထွက်ပြေးချင်သော်လည်း ရွာလမ်းထိပ်တွင် စစ်ကောင်စီ၏ တပ်သားများက စောင့်ဆိုင်းနေသဖြင့် ရွာမှ ထွက်ခွာခွင့်မပေးကြောင်း သိရသည်။
“ ဒီနေ့ပစ်တာ တစ်ချိုကျေးရွာတွေကို စစ်တပ်တွေက ရွာပြင်ကိုပေးမထွက်ဘူး။ စစ်တပ်တွေက ရွာပတ်ပတ်လည်လည် စောင့်ကြည့်နေကြတယ်။ လုံခြုံရေးအရ ရွာကိုပေးမထွက်ဘူးပြောတယ်။ တစ်ချို့ပြည်သူတွေက မလာနိုင်ဘူး လို့ကြားတယ်။” ဟု ၎င်းအမျိုးသမီးက ပြောသည်။
သျှမ်းတပ် (၂)တပ် သည် ယမန်နေ့ (မတ် ၂၃)ရက်တွင်လည်း သီပေါမြို့နယ် ကုန်းဆာကျေးရွာအုပ်စုအတွင်း တိုက်ပွဲဖြစ်ပွားမှုကြောင့် အရပ်သား (၁၀၀)ကျော်ထွက်ပြေးတိမ်းရှောင်ခဲ့ရသည်။
ထိုနည်းတူ ယမန်နေ့တွင် ကျောက်မဲမြို့နယ် တော့ဆန်မြို့နယ် ညောင်မောင်းကျေးရွာအတွင်း မြောက်ပိုင်းမဟာမိတ် တပ်ဖွဲ့ နှင့် RCSS တိုက်ပွဲကြောင့် အရပ်သားနေအိမ်ပေါ် လက်နက်ကြီးကျကာ အမျိုးသား တဦး ပွဲချင်းပြီးသေဆုံးကာ၊ အမျိုးသမီး (၃)ဦး ကျည်ထိမှန်ခဲ့ကြောင်း သိရသည်။
