သျှမ်းပြည်အတွင်းရှိ မြို့များတွင် စစ်အာဏာဆန့်ကျင်ဆန္ဒပြမှုကို ပြောက်ကျားစနစ်၊ လူမဲ့သပိတ်၊ အာရုံဦးသပိတ် တို့ဖြင့်သာ အသုံးပြုပြီး ဆက်လက်ချီတက် ဆန္ဒပြနေကြကြောင်း စုံစမ်းသိရသည်။
သျှမ်းပြည် တောင်ကြီး၊ အောင်ပန်း၊ သီပေါ၊ ကျောက်မဲ၊ နောင်ချို စသည်မျိုးများတွင် စစ်အာဏာဆန့်ကျင် ဆန္ဒပြသည့် လူထုသပိတ်ကို စစ်ကောင်စီ လက်နက်ကိုင်တပ်ဖွဲ့ က အကြမ်းဖက် သေနတ်ပစ် ကာ နေ့စဉ် ဖြိုခွင်းနေသဖြင့် ပြောက်ကျားစနစ်၊လူမဲ့သပိတ်နှင့် အာရုံဦးသပိတ် ဖြင့် ဆန္ဒထုတ်ဖော်နေရကြောင်း ထိုဒေသခံများ ပြောပြချက် အရသိရသည်။
“ ကျနော်တို့ လုံးဝ ဆန္ဒပြလို့မရအောင် နေရာတိုင်း စောင့်တယ်။ မြို့က သေးတော့ လှုပ်ရှားရခက်တယ်။ ကျနော်တို့က လမ်းပေါ်မထွက်ရလဲ ရတဲ့နည်းတော့ ဆန္ဒပြနေကြတာပဲ။ နည်းမျိုးစုံထုတ်ပြီး ပြသွားမှာပဲ” ဟု သီပေါမြို့ ဆန္ဒထုတ်ဖော်ရာတွင် ပါဝင်သည့် လူငယ်တဦးကပြောသည်။
လက်ရှိမှာ သီပေါမြို့တွင် မနက်အစောကြီး ထကာ အာရုံဦး သပိတ်ကိုသာပြုလုပ်နေကြကြောင်း၊ ထိုနည်းပြုလုပ်ခဲ့သည့်မှာ ၃ရက်သာရှိပြီဖြစ်ကြောင်း၊ မကြာခင် ရဲ၊စစ်တပ်က သိလာနိုင်သဖြင့် နောက်နည်းဆက်ပြီး သုံးပြီးဆန္ဒပြသွားမည် ဟုလည်း ၎င်း လူငယ်က ပြောသည်။
ထိုနည်းတူ တချို့ မြို့များတွင်လည်း စစ်ကောင်စီ လက်နက်ကိုင်များအကြမ်းဖက်ဖြိုခွင်း သေနတ်ပစ်နေသဖြင့် လူမဲ့ သပိတ်ကို လည်း ပြုလုပ်လာကြသည်ကို တွေ့မြင်ရသည်။
“ ကျနော်တို့ မှာက လူမဲ့သပိတ်တွေပြုလုပ်ကြတယ်။ တချို့လည်း ပြောက်ကျား သပိတ်တော့လုပ်တယ်။ လူမဲ့သပိတ်ကို လုပ်လာတာကတော့ ၅ရက်လောက်ရှိပြီ၊ လူမဲ့သပိတ်မျိုးစုံ ဆက်လုပ်သွားမယ်” ဟုလည်း ညောင်ရွှေမြို့ခံ တဦး က သျှမ်းသံတော်ဆင့်ကိုေ ပြာသည်။
ညောင်ရွှေမြို့တွင် လူမဲ့သပိတ်၊ အမှိုက်ကောက်သပိတ်၊ လယ်တော စာခြောက်ရုပ်သပိတ်၊ ဈေးဝယ်သပိတ် ၊ ဆိုင်ကယ်သပိတ် စသည်မျိုးစုံ ပြုလုပ်နေသည့် မြို့လေး တမြို့ဖြစ်သည်။
သျှမ်းပြည်မြို့ များတွင် စစ်ကောင်စီ လက်နက်ကိုင် တပ် နည်းမျိုးစုံ ဖြိုခွင်းသည့်ကြားက စစ်အာဏာဆန့်ကျင်ဆန္ဒပြ လူထုသပိတ်လည်း နည်းမျိုးစုံ ပုံစံမျိုးစုံ ဆက်လက်ဆန္ဒထုတ်ဖော်နေဆဲ။
မြန်မာတဝှမ်း စစ်အာဏာရှင် အလိုမရှိ ဆန္ဒပြရာတွင် စစ်ကောင်စီ လက်နက်ကိုင်က ဆန္ဒပြသည့် ပြည်သူလူထုကို အကြမ်းဖက် သေနတ်ပစ်ခတ်ခဲ့ပြီး၊ ကျဆုံးသူ (၂၁၇)ဦးထိရှိလာကြောင်း သိရသည်။
