သျှမ်းပြည် တောင်ပိုင်း အောင်ပန်းမြို့ တွင် ယနေ့ (မတ် ၁၅)ရက် မနက် ၁၀နာရီတွင် စစ်ကောင်စီ လက်နက်ကိုင်တပ်ဖွဲ့ က ဆန္ဒပြသူများကို ကျည်အစစ်သုံးကာ ပစ်ခတ်ခဲ့သဖြင့် အမျိုးသားတဦး သေဆုံးခဲ့ပြီး၊ ၂ဦး ဒဏ်ရာရရှိထားကြောင်း သတင်းရရှိသည်။
ယနေ့ (မတ် ၁၅)ရက် မနက် ၁၀နာရီကျော်တွင် စစ်တပ်မှ အောင်မင်္ဂလာရပ် တွင် တားဆဆီးထားသည့် အကာအရံများကို ဖျက်ဆီးပြီး၊ ဆန္ဒပြသူများကို မျက်ရည်ယိုဗုံး၊ ကျည်အစစ်အသုံးပြုပြီး ပစ်ခတ်မှုပြုလုပ်ခဲ့ကာ အမျိုးသား ၁ဦး သေဆုံးကာ၊ ၂ဦး ဒဏ်ရာရရှိခဲ့သည်။
ထိုသေဆုံးသွားသူ၏ ရုပ်အလောင်းကို လက်ရှိအချိန်ထိ မည်သူမည်ဝါမသိရှိရသေးကြောင်း၊ ရုပ်အလောင်းကိုလည်း စစ်ကားပေါ်သို့တင်ဆောင်သွားကြောင်း မျက်မြင် တွေ့ရှိသည့်အမျိုးသား တဦးက ပြောသည်။
“ လောဆယ်တော့ သေတဲ့သူက ဘယ်သူဆိုတာ ကျနော်တို့စုံစမ်းနေတယ်။ ရွာတွေဘက်ကိုလည်း သတင်းတွေပို့ထားတယ်။ စစ်ကားပေါ်တင်လိုက်တယ်ဆိုပြီးတော့ မျက်မြင်ကပြောတယ်။ ဒါပေမယ့် ကျနော်တို့ ဆက်ပြီး သတင်းလိုက်နေဆဲပါ” ဟု အောင်ပန်း လူငယ်တဦး က သျှမ်းသံတော်ဆင့်ကို ပြောသည်။
ကျည်ထိမှန်သူ ၂ဦးသည် လူငယ်ပိုင်း အမျိုးသားများဖြစ်ပြီး၊ တဦးမှာ ခါးထိမှန်ခဲ့ပြီး၊ တဦးမှာ ခြေတလုံး ထိမှန်ခဲ့ကြောင်း လက်ရှိမှာ ကလော ဆေးခန်းသို့ ပို့ဆောင် ဆေးကုသခံယူနေကြောင်း သိရသည်။
ယနေ့ စစ်ကောင်စီ လက်နက်ကိုင်တပ်ဖွဲ့သည် အောင်ပန်းမြို့အတွင်း ကျည်အစစ်သေနတ်ဖြင့် ရမ်းပစ်မှုကြောင်း အရပ်သားနေအိမ်များလည်း ထိခိုက်ပျက်စီးမှုရှိကြောင်းသိရသည်။
ထို့ပြင် ယနေ့ မနက်ပိုင်းမှ စတင်ကာ မိုဘိုင်းဒေတာ အင်တာနက်ကို သျှမ်ပြည်အပါအဝင် မြန်မာပြည်တဝှမ်း ပြတ်တောက်လိုက်သည်။
ယခုရက်ပိုင်း သျှမ်းပြည်တောင်ပိုင်း အောင်ပန်းမြို့ လူထုသပိတ်ကို စစ်ကောင်စီ လက်နက်ကိုင်တပ်ဖွဲ့က အကြမ်းဖက် သေနတ်ပစ်ခတ်ပြီး၊ မတ် (၁၃)ရက်တွင် ဆန္ဒပြသူ (၁၁)ဦးဖမ်းဆီးခံခဲ့ရသည်။
ထိုဖမ်းဆီးခံရသူများကို သျှမ်းတောင် တောင်ကြီးခရိုင်အတွင်းရှိ တောင်လေးလုံးထောင်ကို ချက်ချင်းပို့ဆောင်ခဲ့ပြီး ပုဒ်မ ၅၀၅(က) ဖြင့် တရားစွဲဆိုထားကြောင်း သိရသည်။
Leave a Comments