Sunday, February 5, 2023

နမ္မတူမြို့နယ် အတွင်း တိုင်းရင်းသားလက်နက်ကိုင်တိုက်ပွဲ ပြင်းထန်နေဆဲ

Must read

သျှမ်းပြည်မြောက်ပိုင်း နမ္မတူမြို့နယ် မန်စံကျေးရွာအုပ်စု အနီး တိုင်းရင်းသားလက်နက်ကိုင်အချင်းချင်း တိုက်ပွဲ ဆက်တိုက်ဖြစ်ပွားနေကြောင်း စုံစမ်းသိရသည်။

နမ္မတူမြို့နယ်အတွင်း RCSS/SSA နှင့် မြောက်ပိုင်း မဟာမိတ် တပ်ဖွဲ့ဖြစ်သည့် TNLA ၊ SSPP/SSA တို့သည် ၂၀၂၀ ခုနစ် ဒီဇင်ဘာ လဆန်းပိုင်း မှ စကာ ယနေ့ မနက်ထိတိုင်း တိုက်ပွဲများ ဆက်တိုက်ဖြစ်ပွားနေကြောင်း မန်စံကျေးရွာတွင် နေထိုင်သူများက ပြောသည်။

ယမန်နေ့ (မတ် ၁၁)ရက် ညနေ ၄နာရီမှ စပြီး RCSS/SSAနှင့်မြောက်ပိုင်းမဟာမိတ် တပ်ဖွဲ့ တို့တိုက်ပွဲဖြစ်ပွားသဖြင့် မန်စံကျေးရွာ အနီး လက်နက်ကြီးကျကြောင်း၊ လူထိခိုက်မှုမရှိသော်လည်း မန်စံကျေးရွာတွင်နေထိုင်သူများက စိုးရိမ်စိတ်ဖြင့် တညလုံး အိပ်မပျော်ခဲ့ကြောင်းလည်း မန်စံဒေသခံ အသက် ၅၀ကျော် အမျိုးသား တဦး က သျှမ်းသံတော်ဆင့် ကို ပြောသည်။

“ ညနေ ၄နာရီက စလက်နက်ကြီး ၄၊ ၅လုံးလောက်ပစ်တယ်။ ကျတယ်။ ည ၁၁နာရီထိ သေနတ်သံတွေ က ဆက်တိုက်ပဲ။ ညဆိုတော့ အိမ်ပေါ်ကျမှာလည်း စိုးရိမ်တာပေါ့။ မန်စံကျေးရွာက အိမ်တချို့ လက်နက်ကြီး ကျတာ ခံရတယ်လေ” ဟု ၎င်း အမျိုးသား က ဆိုသည်။

ယမန်နေ့ ဖြစ်ပွားသည့် တိုင်းရင်းသားအချင်းချင်း တိုက်ပွဲကြောင့် လက်နက်ထိမှန်သည့် အရပ်သားမရှိကြောင်း မန်စံဒေသခံများက ပြောသည်။

“ မနေ့က ညနေ ၄နာရီကနေစဖြစ်တာ။ ဒီနေ့ ထပ်ဖြစ်တယ်။ အခုဖြစ်နေတဲ့နေရာက ၄၊ ၅ နေရာဖြစ်နေတယ်။ တိကျပြောဖို့ခက်တယ်။ ထိခိုက်မှုက မသိရသေးဘူး။ ဖြစ်တာက တိုက်ပွဲပြင်းထန်က မန်စံဘက်မှာပါ” ဟု RCSS/SSA မှ ပြောရေးဆိုခွင့်ရှိသူ ဗိုလ်မှူးခမ်းစံ က သျှမ်းသံတော်ဆင့်ကို ပြောသည်။

တိုင်းရင်းသားအချင်းချင်း ဖြစ်ပွားသည့် တိုက်ပွဲသည် လရှည်ကြာလာသော်လည်း လက်ရှိ အချိန်ထိ ၂ဖက် တပ် သည် တိုက်ပွဲနှင့် ပတ်သက်ပြီးဆွေးနွေးတိုင်ပင်မှု မရှိကြသေးကြောင်း နှစ်ဖက်တပ်က သျှမ်းသံတော်ဆင့်ကို ပြောသည်။

“ ကျနော်တို့ တွေ တိုက်ပွဲ ကိစ္စနဲ့ ပတ်သက်ပြီး ညှိနှိုင်းတာမရှိသေးဘူး” ဟု RCSS/SSA မှ ဗိုလ်မှူးခမ်းစံ က ပြောသည်။

ထိုနည်းတူ TNLA ဘက်မှလည်း ဗိုလ်မှူး တာအိုက်ကျော် က “ မနေ့ကတော့ တိုက်ပွဲဖြစ်တာ ဟုတ်ပါတယ်။ ညှိနှိုင်းမှုကတော့ ကျနော်တို့ ဘက်မှာတွေ့ဆုံဖို့က အဆင်သင့်ပါပဲ။ လက်ရှိတော့ ကျနော်တို့ ၂ဖက် ပြောဆိုတာတွေ မရှိသေးပါဘူး” ဟု သျှမ်းသံတော်ဆင့်ကို ပြောသည်။

တိုင်းရင်းသားအချင်းချင်းဖြစ်ပွားသည့် တိုက်ပွဲကြောင့် ဖေဖော်ဝါရီလ တွင် အရပ်သားကိုယ်ဝန်သည် အမျိုးသမီး တဦး နှင့် အမျိုးသားတဦးသေဆုံးခဲ့ကာ မတ်လ အတွင်းမှာ ကျည်စထိမှန်သည့်အမျိုးသမီး ၃ဦးရှိကြောင်း သိရသည်။

Leave a Comments

- Advertisement -spot_img

Latest article