သျှမ်းပြည်တောင်ပိုင်း တောင်ကြီးမြို့တွင် ယနေ့(မတ် ၉ )ရက်၌ စစ်အာဏာရှင်ဆန့်ကျင် ဆန္ဒထုတ်ဖော်သည့် လူထုသပိတ်ကို စစ်တပ်နှင့် ရဲများက အကြမ်းဖက်ဖြိုခွင်းရာ အမျိုးသမီးတဦး ရာဘာကျည် ထိမှန်ကြောင်း စုံစမ်းသိရှိရသည်။
ရဲနှင့် စစ်တပ်သည် တောင်ကြီးမြို့ ကူညီကုန်းရပ်ကွက်တွင် ငြိမ်းချမ်းစွာ ဆန္ဒထုတ်ဖော်နေသည့် လူထုသပိတ်ကို မျက်ရည်ယိုဗုံး၊ အသံဗုံး နှင့် ရာဘာကျည်တို့ဖြင့် ဖြိုခွင်းခဲ့ရာ အမျိုးသမီး တဦး ရာဘာကျည်ထိမှန်ခဲ့ကြောင်း သိရသည်။
“ နေ့လည်ပိုင်းက ကျနော်တို့ နေရာကို မျက်ရည်ယိုဗုံးတွေ၊ ရာဘာကျည်တွေနဲ့ ပစ်တယ်။ မိန်းကလေး တယောက်တော့ ရာဘာကျည်ထိသွားတယ်။ စိုးရိမ်စရာတော့မရှိဘူး မျက်ရည်ယိုဗုံးဒဏ်ကြောင့် မူးလဲသွားတာရှိတယ်” ဟု ဆန္ဒထုတ်ဖော်ရာတွင် ပါဝင်သည့် လူငယ်အမျိုးသားတဦးက သျှမ်းသံတော်ဆင့်ကိုပြောသည်။
စစ်အာဏာရှင်ကျဆုံးရေးအတွက် တောင်ကြီးလူငယ်များသည် နေ့စဉ် ဆန္ဒထုတ်ဖော်မှုပြုလုပ်နေပြီး ရဲ၊စစ်တပ်မှလည်း သပိတ်ဖြိုခွင်းခြင်းကို နေ့စဉ်ဆက်တိုက်ပြုလုပ်ကာ ဆန္ဒုထုတ်ဖော်သူများကိုလည်း လိုက်လံ ဖမ်းဆီးနေကြောင်း ၎င်း အမျိုးသား က ပြောသည်။
ယနေ့ စစ်အာဏာရှင်ကို ဆန့်ကျင်ဆန္ဒပြသည့် လူငယ် (၁၀)ဦးကျော် ဖမ်းဆီးခံရကြောင်း၊ ထိုထဲတွင် အမျိုးသမီး ဦးရေ များကြောင်းလည်း သိရသည်။
“ ကျနော်သိရသလောက် ဒီနေ့ ဆန္ဒထုတ်ဖော်သူ ၁၀ဦး ဖမ်းခံရတယ်။ အမျိုးသမီးတွေများတယ်။ ထောင်ကို တန်းပို့မယ်ထင်တယ်” ဟု မျက်မြင် အမျိုးသား က ဆိုသည်။
ထို့အပြင် ရဲ၊စစ်တပ်များသည် တောင်ကြီးမြို့ပေါ် အတွင်း သွားလာနေကြသည့် ပြည်သူများကို တားဆီးကာ ဖုန်းများ၊ ဖေ့ဘွတ်အကောင့်များကို ဝင်ရောက်စစ်ဆေးမှုများပြုလုပ်နေကြောင်း သိရသည်။
“ အဓိကတော့ ဖုန်းဖွင့်ခိုင်းတယ်။ နောက်ဖေ့ဘွတ်တွေ ဘာတွေတင်လဲကြည့်တယ်။ ဒါက ကျနော်တို့ကို ခြောက်နေတာပဲ” ဟု အသက် ၃၀အရွယ် ကိုယ်တိုင်ကြုံတွေ့ခဲ့ရသည့် အမျိုးသား တဦးက ပြောသည်။
စစ်ကောင်စီ အာဏာသိမ်းယူမှု ၁လကျော်ကာလအတွင်း မှာ ပြည်သူများကို နည်းမျိုးစုံ ဖိနှိပ်နေကြောင်း၊ စစ်အာဏာရှင်လက်အောက်တွင် အမြန်ဆုံးလွှတ်မြောက်ရန် လိုအပ်ကြောင်းလည်း တောင်ကြီး လူငယ်များက ပြောဆိုလိုက်သည်။
“ဒီတိုင်းစစ်အာဏာရှင်အောက်ဆက်နေရမယ်ဆိုရင် ကျနော်တို့ ဘဝက ကျနော်တို့ မပိုင်တော့ဘူး။ အားလုံးလိုက်ချုပ်နှောင်နေတာ။ ကျနော်တို့အမြစ်ပြတ်အောင် တော်လှန်ရမယ်” ဟု အသက် ၃၀အရွယ် လူငယ်အမျိုးသား က ထပ်လောင်းပြောသည်။
စစ်အာဏာသိမ်းယူပြီး တလကျော်ကာလအတွင်း မြန်မာတဝှမ်း တွင် ဆန္ဒထုတ်ဖော်သူ စုစုပေါင်း (၆၀) ကျော် ကို စစ်ကောင်စီ၏ လက်နက်ကိုင်တပ်ဖွဲ့က သေနတ်ပစ်သတ်ခဲ့ကြောင်း AAPPစာရင်းအရသိရသည်။
Leave a Comments