သျှမ်းပြည်တောင်ပိုင်း မြို့ငယ်များတွင် စစ်အာဏာရှင်ဆန့်ကျင်ဆန္ဒထုတ်ဖော်ရန် အတွက် အတားအဆီးများနေ သော်လည်း စစ်အာဏာရှင် အလိုမရှိ စတေကာ ကမ်ပိန်းဖြင့် ဆက်လက် ဆန္ဒထုတ်ဖော်နေရကြောင်း စုံစမ်းသိရသည်။

သျှမ်းတောင် ကျေးသီး၊ လဲချားမြို့ ပတ်လည်တွင် စစ်တပ်စခန်းချထားသဖြင့် ပြည်သူများ စစ်အာဏာရှင်ကို ဆန့်ကျင်ဆန္ဒထုတ်ဖော်ရန် လမ်းပေါ်ထွက် ဆန္ဒပြရန် အဆင်မပြေသဖြင့် မြို့ အဝင်ဆိုင်ဘုတ်၊ အစိုးရ သက်ဆိုင်ရာ ဌာနများ၊၊ စာသင်ကျောင်းများနှင့် ဈေးများတွင် “We Want Democracy” “ စစ်တပ်အာဏာသိမ်းခြင်းကို လုံးဝလက်မခံပါ” စသည့် စတေကာများဖြင့် လိုက်လံ ကပ်နေကြောင်း သိရသည်။

အဆိုပါ ကမ်ပိန်းကို ယနေ့ (မတ်လ ၄ ရက်) မှစတင်လှုပ်ရှားခဲ့သည်။

“ ကျနော်တို့ မြို့ငယ်တွေက လမ်းပေါ်ထွက် ဆန္ဒပြတာက သိပ်ပြီးမလုံခြုံကြဘူး။ အဲကြောင့် ကျနော်တို့ ဒီလိုကမ်းပိန်းစလုပ်သွားတာပါ။ စာသားတွေထုတ်ပြီး သွားကပ်မယ်။ ကိုယ့်တွေအသံကို ကမ္ဘာကနေသိစေချင်တယ်” ဟု ကျေးသီးမြို့ စတေကာ ကမ်ပိန်းတွင် ပါဝင်သည့် လူငယ်တဦးက သျှမ်းသံတော်ဆင့် ကို ပြောသည်။

ကျေးသီးမြို့တွင် ပြုလုပ်ခဲ့သည့် “We Want Democracy” “ စစ်တပ် အာဏာသိမ်းခြင်း လုံးဝအလိုမရှိ” စသည့် စတေကာများကို ရဲ နှင့် စစ်တပ်များက ယနေ့ မနက်ပိုင်းတွင် လိုက်လံဖျက်လိုက်ပြီးဖြစ်ကြောင်းလည်း ၎င်းလူငယ်က ပြောသည်။

“ ကျတော်တို့ကတော့ ကပ်ထားတဲ့ဟာကို သူတို့ တွေ ဒီမနက်မှာ လာဖျက်သွားပါပြီ။ သူတို့ကြိုက်သလောက်ဖျက်ပါ။ ကျနော်တို့ ရင်ထဲရှိတာကိုတော့ သူတို့မဖျက်နိုင်ဘူး။” ဟု စတေကာလိုက်လံကပ်သည့် လူငယ်က ဆိုပါတယ်။

ထိုနည်းတူ လဲချားမြို့ တွင်းတွင်လည်း စစ်အာဏာရှင်ဆန့်ကျင်ရေး လူထုလှုပ်ရှားမှုအနေဖြင့် လမ်းပေါ်ထွက် ဆန္ဒထုတ်ဖော်မှုမျိုးမဟုတ်ဘဲ စတေကာ ကမ်ပိန်းဖြင့် စတင်ဆောင်ရွက်လာကြသည်။

လက်ရှိ သျှမ်းပြည် တောင်ပိုင်း မြို့ငယ်များရှိ လူငယ်များအနေဖြင့် တက်ကြွလှုပ်ရှားသူများကို ရဲ နှင့် စစ်တပ်များက ည အချိန်တွင် လိုက်ဖမ်းဆီးနေသဖြင့် ထွက်ပြေးတိမ်းရှောင်နေရကြောင်းလည်း သိရသည်။