ရဲ၊စစ်တပ် အကြမ်းဖက် ဖြိုခွင်းမှုကြားက သျှမ်းပြည်လူထုတွေစစ်အာဏာရှင်စနစ်ကို ဆက်လက် ဆန့်ကျင် ဆန္ဒထုတ်ဖော် နေကြပါတယ်။
မြန်မာနိုင်ငံတွင် မတ် (၂၈)ရက် “ Milk Tea Alliance ” လှုပ်ရှားမှုအနေနဲ့ လူထုတရပ်လုံး စစ်အာဏာရှင်ဆန့်ကျင် ဆန္ဒထုတ်ဖော်မှုကို ပြုလုပ်ခဲ့ရာ ရဲ၊စစ်တပ်က ကျည်အစစ်ကို အသုံးပြုကာ သေနတ်ပစ်ခတ်ခြင်း၊ အသံဗုံး၊ မျက်ရည်ယိုဗုံး၊ ရေကား၊အသုံးပြုပြီး လူထုကို ဖြိုခွင်းမှုတွေ ပြုလုပ်ခဲ့ပါတယ်။
သျှမ်းပြည်မှာလည်း ယမန်နေ့ က စတင်ကာ သျှမ်းပြည်မြို့ကြီးတွေ ရေကားတွေ ၊မျက်ရည်ယိုဗုံးတွေ အသုံးပြီးပြီး စစ်အာဏာရှင်ဆန့်ကျင်နေတဲ့ လူထုကို ဖြိုးခွင်းမှု စတင်ခဲ့ပါတယ်။
တောင်ကြီးမြို့မှာ ယမန်နေ့ က မျက်ရည်ယိုဗုံးတွေ၊ အသံမိုင်းတွေ၊ သေနတ်တွေ စတင်ဖောက်ခဲ့ပြီး ကျည်ထိမှန်ဒဏ်ရာရရှိသူမရှိခဲ့ကြသော်လည်း မျက်ရည်ယိုဗုံးကြောင့် ထိခိုက်သူအများကြီး ရှိကြောင်းတောင်ကြီး ဆန္ဒပြသူတွေ ပြောပြချက် အရ သိရပါတယ်။
“ မနေ့က ကျည်အစစ်နဲ့ ဖောက်တယ်။ ဒဏ်ရာရတော့မရှိဘူး။ မျက်ရည်ယိုဗုံး ဒဏ်ကို အဓိက ခံရတယ်” လို့ ဆန္ဒထုတ်ဖော်ရာတွင် ပါဝင်သူ တဦးက ပြောပါတယ်။
ဆန္ဒထုတ်ဖော်တဲ့ လူအုပ်ကို ရဲ၊စစ်တပ်က အကြမ်းဖက်ဖြိုခွင်းခဲ့ပေမယ့် ယနေ့မှာလည်း တောင်ကြီး ပြည်သူတွေက ဆက်ပြီး ဆန္ဒထုတ်ဖော်မှုတွေ ပြုလုပ်ခဲ့ပြီး၊ ရဲ၊စစ်တပ်တွေ စောင့်ဆိုင်းနေရာယူတဲ့ လမ်းမကြီးပေါ် မသွားဘဲ တခြားလမ်းတွေကို အသုံးပြုပြီး ဆန္ဒထုတ်ဖော်ကြပါတယ်။
“ ဒီနေ့ တော့ ဆန္ဒထုတ်ဖော်နေတဲ့ သူတွေ ဟာ လမ်းမကြီးအတိုင်းမသွားကြဘူး။ ရပ်ကွက်ထဲပတ်ပြီး စစ်အာဏာရှင်ကိုဆန့်ကျင်ဆန္ဒထုတ်ကြတယ်။ ပြဿနာတော့ မဖြစ်ခဲ့ဘူး။ရပ်ကွက်ပြည်သူတွေလည်း ပူးပေါင်းပေးတယ်” လို့ ဆန္ဒထုတ်ဖော်မှုတွင် သတင်းလိုက်ယူနေတဲ့ သျှမ်းသံတော်ဆင့် သတင်းထောက် ပြောပြချက် အရသိရပါတယ်။
ဆန္ဒထုတ်ဖော်ရာ လမ်းတလျှောက်မှာ တောင်ကြီး ရပ်ကွက်သူ၊ ရပ်ကွက်သားတွေက လုံခြုံရေး ပြန်ယူပေးပြီး ပူးပေါင်းပါဝင်ပေးကြတာတွေ ရှိကြောင်း သိရပါတယ်။
သျှမ်းမြောက် လားရှိုးမှာတော့ ယနေ့ (မတ် ၁)ရက် မနက် ၉ နာရီခွဲကျော်က စပြီး ရဲ၊စစ်တပ်တွေက မျက်ရည်ယိုဗုံးကို အသုံးပြုပြီး စစ်အာဏာရှင် အလိုမရှိ ဆန္ဒထုတ်ဖော်တဲ့ ပြည်သူလူထုတွေကို ဖြိုခွင်းမှုပြုလုပ်ခဲ့ပါတယ်။
“ ဒီနေ့ရေကားတော့ မသုံးဘူး။ ဒါပေမယ့် မျက်ရည်ယိုဗုံးကို အသုံးပြုတယ်။ ပြည်သူတွေ တားထားတဲ့ စည်းကို လည်း ရဲ၊စစ်သားတွေက ကျော်လာတယ်။ နောက်လူထုက နောက်ဆုတ်ပြီး အေးချမ်းနဲ့ ဆက်ဆန္ဒထုတ်တယ်။ ဒါလည်း မရဘူး မျက်ရည်ယိုဗုံးသုံးတယ်” လို့ လားရှိုးဆန္ဒထုတ်ဖော်ရာမှာ ပါဝင်တဲ့ အသက် ၂၇နှစ် အရွယ် အမျိုးသား က သျှမ်းသံတော်ဆင့် ကို ပြောပါတယ်။
စစ်အာဏာရှင် စနစ် မကျဆုံးသရွေ့ သျှမ်းပြည်သားတွေကတော့ ဆက်လက်ပြီး ငြိမ်းချမ်းစွာ ဆန္ဒထုတ်ဖော်သွားမှာပါ လို့လည်း သျှမ်းပြည်သားတွေ ပြောဆိုလိုက်ပါတယ်။
ယမန်နေ့ (ဖေဖော်ဝါရီ ၂၈)ရက်တွင် Milk Tea Alliance လူထုလှုပ်ရှားမှုကို လှုပ်ရှားကြပြီး ရဲ၊စစ်တပ်က ကျည်အစစ်ဖြင့် သေနတ်ပစ်ဖောက်ခြင်း၊ မျက်ရည်ယိုဗုံး၊ သံတုတ်၊ အသံဗုံးတွေကို အသုံးပြုပြီးလူထု ဖြိုခွင်းမှုကို ပြုလုပ်ခဲ့ပြီး မြန်မာတနိုင်ငံလုံးအတိုင်းအတာ အရ တရက်တည်းမှာ လူအယောက်ပေါင်း (၂၀)ဝန်းကျင် သေဆုံးခဲ့ပြီး ထိခိုက်ဒဏ်ရာရရှိသူပေါင်း (၂၀၀) ဝန်းကျင် ရှိပြီး၊ မြန်မာနိုင်ငံ နိုင်ငံရေး အကျဉ်းသားများ ကူညီစောင့်ရှောက်ရေး အသင်း (AAPP) ကောက်ယူထားတဲ့စာရင်း အရ သိရပါတယ်။
ယမန်နေ့ ရဲ၊စစ်တပ်မှ အကြမ်းဖက် ဖြိုခွင်းမှုကြောင့် သေဆုံးမှုတွင် သျှမ်းပြည် တဦးတယောက်မှ မပါရှိသေးကြောင်း၊ ဖမ်းဆီးခံရတဲ့ ဦးရေ ကတော့ လားရှိုးမြို့ တွင် (၈)ဦးရှိကာ ယနေ့ချိန်ထိမလွှတ်ပေးသေးကြောင်း လားရှိုးမြို့စစ်အာဏာရှင် ဆန့်ကျင်ဆန္ဒထုတ်ဖော်နေသည့် အသိုင်းအဝန်း မှ စုံစမ်းသိရပါတယ်။
စစ်အာဏာ ကျဆုံးရေး အတွက် နည်းမျိုးစုံသုံးပြီး ငြိမ်းချမ်းစွာ ဆန္ဒထုတ်ဖော်နေတဲ့ ပြည်သူတွေကို ရဲ၊စစ်တပ်က အကြမ်းဖက် ဖြိုးခွင်း ပစ်ခတ်မှုပြုလုပ်နေသော်လည်း ပြည်သူများကတော့ နောက်ဆုတ်မသွားဘဲ ဆက်လက်ပြီး ဆန္ဒထုတ်ဖော်နေပါတယ်။
