အာဏာသိမ်းစစ်ကောင်စီ ဖွဲ့စည်းထားသည့် ပြည်ထောင်စု ရွေးကောက်ပွဲ ကော်မရှင်နှင့် ရှမ်းတိုင်းရင်းသားများ ဒီမိုကရက်တစ် ပါတီ SNDP အပါအဝင် နိုင်ငံရေးပါတီ ၅၃ပါတီတွေ့ဆုံကြောင်းသိသည်။

ယနေ့ ဖေဖော်ဝါရီ ၂၆ ရက် စစ်အာဏာသိမ်းကောင်စီ ဖွဲ့စည်းထားသည့် ပြည်ထောင်စု ရွေး/ကော် နှင့် နိုင်ငံရေးပါတီ ၅၃ ပါတီမှကိုယ်စားလှယ်များနှင့်တွေ့ဆုံခဲ့ရာ ထိုထဲတွင် SNDP ဟုလူသိများသည့် ကျားဖြူပါတီလည်း ပါဝင်ခဲ့သည်။ တက်ရောက်သူ စာရင်းအရ ကျားဖြူပါတီ မှ အထွေထွေအတွင်းရေးမှူး စိုင်းအုန်းကျော် တက်ရောက်ခဲ့ကြောင်းသိရသည်။

သျှမ်းအမျိုးသား အကျိုးအတွက် ရည်ရွယ်ပြီး သွားရောက်တွေ့ဆုံခြင်းဖြစ်ကြောင်း လည်း SNDP အဖွဲ့ဝင် တဦးက သူ၏ လူမှုကွန်ရက်စာမျက်နှာတွင်ရေးသားထားသည်။

ရွေးကောက်ပွဲ မသမာမှုကြောင့် ဟုဆိုကာ ဖေဖော်ဝါရီ ၁ ရက် မနက်က တပ်မတော် မှ နိုင်ငံတော် အာဏာကို သိမ်း(ထိန်း) ခဲ့ရကြောင်း ကြေညာချက်ထုတ်ခဲ့ပြီး ရွေးကောက်ပွဲပြန်ကျင်းပရန်လည်း ကြေညာခဲ့သည်။

ကမ္ဘာတဝှမ်းနှင့် မြန်မာပြည်သူများက ရွေးကောက်ပွဲ တခုတည်းနှင့် အာဏာသိမ်းယူရသည့်အဆင့်သည် တိကျသေချာသည့် အကြောင်းပြချက်ကောင်းမဟုတ်ကြောင်း ပြောဆိုကာ နေ့စဉ်နှင့်အမျှ ဆန္ဒထုတ်ဖော်နေကြသည်။

ထို့အပြင် ရွေးကောက်ပွဲ ပြန်ကျင်းပရန်အတွက်လည်း ပြည်သူများက လက်မခံကြောင်း၊ ပြည်သူရဲ့ မဲကို အသိအမှတ်ပြုရန် နှင့် ပြည်သူတင်မြောက်ထားသည့် လွှတ်တော်ကိုယ်စားလှယ်များကိုသာ အသိအမှတ်ပြုပေးရန် ယနေ့ထိတိုင် မြန်မာတဝှမ်းလုံးရှိပြည်သူများက တောင်းဆိုနေကြသည်။

၂၀၂၀ ရွေးကောက်ပွဲ ရလဒ်အရ သျှမ်းပြည်တွင် အမျိုးသား ဒီမိုကရေစီအဖွဲ့ချုပ် ( NLD) မဲအများဆုံးဖြင့် အနိုင်ရရှိပြီး၊ ရှမ်းတိုင်းရင်းသားများ ဒီမိုကရေစီ အဖွဲ့ချုပ်(SNLD)က ဒုတိယနေရာအများဆုံးအနိုင်ရရှိထားပြီး ပါတီဖြစ်သည်။ လက်ရှိ စစ်ကောင်စီ တင်မြှောက်ထားသည့် ပြည်ထောင်စု ရွေး/ကော်နှင့် သွားရောက်တွေ့ဆုံသည့် ကျားဖြူ (SNDP)သည် မဲတမဲဖြင့်သာ အနိုင်ရရှိထားသည့်ပါတီဖြစ်သည်။

ယနေ့ တွေ့ဆုံပွဲတွင် ၂၀၂၀ ရွေးကောက်ပွဲ ရလဒ် ပျက်ပြယ်သွားပြီးဖြစ်ောကာင်းလည်း စစ်အာဏာသိမ်းကောင်စီ ၏ ရွေး/ကော် ဥက္ကဌသစ် ဦးသိန်းစိုး က ပြောဆိုလိုက်သည်။

ထို့သို မြန်မာပြည်တဝှမ်းပြည်သူများအနေဖြင့် မိမိတို့မဲပေးခဲ့သည့် လွှတ်တော်ကိုယ်စားလှယ်ကိုသာ အသိအမှတ်ပြုကြပြီး၊ ၂၀၂၀ ရွေးကောက်ပွဲရလဒ်ကိုသာ အသိအမှတ်ပြုသွားမည်ဟု ပြောဆိုလိုက်သည်။ မြန်မာတဝှမ်းပြည်သူများကလည်း စစ်အာဏာရှင်ကို အရှိန်အဟုန် မြင့်တင်ကာ နည်းမျိုးစုံဖြင့် ငြိမ်းချမ်းစွာ ဆန္ဒထုတ်ဖော်နေသော်လည်း စစ်အာဏာသိမ်းကောင်စီရဲ့ ရဲ၊တပ်သားများက အကြမ်းဖက်ဖြိုးခွဲမှုများကို ပြုလုပ်နေသည်။