မူဆယ်မြို့နယ် KIA နှင့် မြန်မာ့တပ်မတော်တို့ တိုက်ပွဲ ဆက်တိုက်ဖြစ်ပွား

0

သျှမ်းပြည်မြောက်ပိုင်း မူဆယ်မြို့နယ် တီးမာ ကျေးရွာအနီးတွင် ကချင်လွတ်မြောက်ရေးတပ်မတော် (KIA)နှင့် မြန်မာ့တပ်မတော်တို့တိုက်ပွဲ ယနေ့ (ဖေဖော်ဝါရီ၂၂)ရက် မနက်ပိုင်းတွင် တိုက်ပွဲဖြစ်ပွားခဲ့ကြောင်း သတင်းရရှိသည်။

ထိုနေရာတွင် KIA တပ်မဟာ (၆) တပ်ရင်း (၉ )နယ်မြေဖြစ်ပြီး ယနေ့ မနက်ပိုင်းတွင် မြန်မာ့တပ်မတော်မှ KIA တပ်ဖွဲ့ ရှိသည့်နေရာကို လက်နက်ကြီးဖြင့် ပစ်ခတ်ခဲ့ကြောင်း သိရသည်။

“ မနက်က လက်နက်ကြီးသံတွေ သေနတ်သံတွေ တော်တော်ကျယ်တယ်။ ကျမတို့နေတဲ့နေရာနဲ့ အရမ်းနီးတယ်။ တိုက်ပွဲဖြစ်နေကြတာတော့ မနေ့ကတည်းကပါ” ဟု ထိုဒေသတွင် တာဝန်ကျနေသည့် ဆရာမ တဦး က သျှမ်းသံတော်ဆင့်ကို ပြောသည်။

ဖေဖော်ဝါရီ ၁ ရက် မနက်မှ စတင်ကာ တပ်မတော်သည် နိုင်ငံတော်၏အာဏာကို သိမ်းယူလိုက်ပြီး၊ ထို့နောက် ပြည်ထောင်စု တဝှမ်းလုံး စစ်အာဏာသိမ်းမှုကို ဆန့်ကျင်ဆန္ဒပြခဲ့ကြသည်။

ထိုနည်းတူ တိုင်းရင်းသားလက်နက်ကိုင်များကလည်း တပ်မတော် အာဏာသိမ်းယူမှုနှင့်ပတ်သက်ပြီး ပြင်းထန်စွာ ရှုံ့ချခဲ့ပြီး၊ ကန့်ကွက်ခဲ့ကြသည်။

ထို့နောက် သျှမ်းပြည်မြောက်ပိုင်းအတွင်း တပ်မတော်နှင့်တိုင်းရင်းသားလက်နက်ကိုင်များ နေရာအနှံ့ တိုက်ပွဲဖြစ်ပွား နေသည်။

ဖေဖော်ဝါရီ ၂၀ရက် မွန်းလွှဲ ၂နာရီဝန်းကျင်တွင် KIA နှင့် တပ်မတော် တို့သည် မူဆယ်မြို့နယ် တီးမာကျေးရွာအနီးတွင် တိုက်ပွဲဖြစ်ပွားခဲ့ပြီး ဒေသခံ ၁ ဦး ကျည်ထိမှန်သေဆုံးခဲ့ကြောင်း ထိုအနီးတွင်နေထိုင်သည့် ဒေသခံတဦးက ပြောသည်။

“မနေ့ကလည်း ရွာသားတွေ အလုပ်လုပ်နေချိန် လက်နက်ကြီးတွေနဲ့ ပစ်တော့ ရွာသားတဦး ကျည်ထိပြီးသေသွားတယ်” ဟု ၎င်းဒေသခံကပြောသည်။

သျှမ်းမြောက် ဒေသတွင် စစ်ရေး ပိုပြီး ပြင်းထန်လာမည်ကိုလည်း ဒေသခံများက စိုးရိမ်နေကြသည်။

“ တဖက်ကလည်း စစ်အာဏာကို ဆန့်ကျင်နေချိန် တဖက်မှာလည်း တိုက်ပွဲတွေကြီးလာမယ်။ ဒါက တပ်ကလုပ်နေကြ အလုပ်ပါ။ ပြည်သူတွေပဲပိုခံရတယ်” ဟု မူဆယ်မြို့ ဒေသခံစိုင်းလှက ပြောသည်။

KIA နှင့် မြန်မာ့တပ်မတော်သည် တိုက်ပွဲဖြစ်ပွားခဲ့သည်မှာ ၃ ရက်ရှိပြီဖြစ်ပြီး၊ လက်ရှိမှာ တပ်မတော်ဘက်က စစ်အင်အား တိုးချဲ့နေကြောင်းလည်း သတင်းရရှိသည်။

Leave a Comments