သျှမ်းပြည်အတွင်း စစ်အာဏာရှင်ဆန့်ကျင်ဆန္ဒပြသူများနှင့်အတူ လက်နက်ဖြင့် တိုက်ရိုက်မပါသော်လည်း လူထုနှင့်အတူ အပြည့်အဝ ရပ်တည်သွားမည်ဖြစ်ကြော RCSS/SSA ကပြောကြားလိုက်သည်။

မြန်မာနိုင်ငံတွင် ဖေဖော်ဝါရီ ၁ ရက်မှ စတင်ကာ စစ်တပ်မှ နိုင်ငံတော်၏ အာဏကိုသိမ်းယူလိုက်ပြီးနောက် မြန်မာပြည်တဝှမ်းလုံးတွင် ယနေ့ထိတိုင် စစ်အာဏာရှင် ကျဆုံးရေးအတွက် အရှိန်မြင့် ဆန့်ကျင်မှုများပြု လုပ်လာကြသည်။

RCSS ပြောခွင့်ရ ဗိုလ်မှူး ခမ်းစံ က – “ခုလက်ရှိ ပြည်သူတွေ ဆန္ဒပြနေတာက ဘာလက်နက်မှ မရှိဘူး။ ဒါကို ကမ္ဘာတွေက စောင့်ကြည်နေ တယ်။ ဒီလို အခြေနေမှာ ကျနော်တို့ လက်နက်ကိုင် ဝင်ရောက်စွက်ဖက်ရင် စစ်တပ်ရဲ့ လှည့်ကွက်ထဲ ဝင်သွားမှာ စိုးရိမ်ရလို့ပါ။ ဒါတွေကို ပြည်သူတွေ နားလည်စေချင်ပါတယ်” – ဟု ဗိုလ်မှူး ခမ်းစံ ကပြောပါတယ်။

သို့သော် စစ်အာဏာရှင်ဆန့်ကျင်သည့် လက်နက်မဲ့ပြည်သူ များကို စစ်ကောင်စီ က အကြမ်းဖက်ဖြိုခွဲခြင်း၊ သေနတ်ပစ်ခတ်ခြင်းတို့ပြုလုပ်ကာ သေဆုံးမှုများလည်း ရှိလာသည်။

သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) မှလည်း ဖေဖော်ဝါရီ (၁) ရက်နေ့က စစ်တပ်အာဏာသိမ်းခြင်းနှင့် ပတ်သက်ပြီး ကန့်ကွက်ရှု တ်ချကြောင်း နှင့် ပြည်သူဘက်မှ အကူအညီလိုအပ်လျှင် တောင်းဆိုနိုင်ကြောင်း တရားဝင် ထုတ်ပြန်ထားသည်။

“ပြည်သူတွေ ကာကွယ်ဖို့အတွက် ကျနော်တို့ဘက်လည်း တရားဝင်ပြောထားတာရှိတယ်။ ဒါပေမယ့် ဆန္ဒပြတဲ့နေရာမှာ ကျနော်တို့ လိုက်ပြီး အကာအကွယ်ပေးရင် သူတို့ရဲ့ လှည့်ကွက်ထဲ ဝင်သွားနိုင်တဲ့ အခြေအနေဖြစ်နေတယ်။ လက်နက်ကိုင်တွေ ဝင်ရှုပ်လို့ တပ်မတော်ဝင်ဖြေရှင်းရတယ်ဆိုပြီး ဖြစ်လာမယ်။ ဒါဆိုရင် ပြည်သူတွေပါ ထိခိုက်ကုန်မယ်။ သတိထားနေရတယ်။ အခြေအနေက ” – ဟု RCSS/SSA ၏ပြောရေးဆိုခွင့်ရှိသူ ဗိုလ်မှူး ခမ်းစံ ကသျှမ်းသံတော်ဆင့် ကိုပြောသည်။

ကရင်ပြည်နယ် မြဝတီမြို့ တွင် ဒေသခံများ စစ်အာဏာဆန့်ကျင်ဆန္ဒပြအချိန်တွင် ရဲတပ်ဖွဲ့ နှင့် တပ်မတော်က အဟန့်အတားများပြုလုပ်မှုကြောင့် တိုင်းရင်းသားလက်နက်ကိုင် တပ်ဖွဲ့ဖြစ်သည့် (KNU) မှလုံခြုံရေး လိုက်ပါ ကူညီဆောင်ရွက်ပေးခဲ့ကြောင်း သိရသည်။

RCSS/SSA အဖွဲ့သည် အရပ်သားအစိုးရနှင့် အပစ်ခတ်ရပ်စဲရေး သဘောတူညီစာချုပ် လက်မှတ်ရေးထိုး ထားသည့် အဖွဲ့တစ်ဖွဲ့ဖြစ်သည်။

လက်ရှိ တပ်မတော်မှ နိုင်ငံတော်၏ အာဏာကို အတင်းအဓမ္မသိမ်းယူလိုက်မှုကြောင့် NCA လက်မှတ်ရေးထိုးထားသည့် အဖွဲ့ကလည်း စစ်ကောင်စီ နှင့် ငြိမ်းချမ်းရေး ဆွေးနွေးရန် ရပ်ဆိုင်းထားမည်ဖြစ်ကြောင်း ကြေညာချက်ထုတ်ခဲ့သည်။