စစ်အာဏာသိမ်းဆန့်ကျင်မှုကြောင့် ဖမ်းဆီးခံ သျှမ်းပြည်သူများ မလွှတ်မြောက်သေး

0

သျှမ်းပြည်တွင် စစ်အာဏာသိမ်းမှုကို ဆန့်ကျင်ဆန္ဒပြမှုကြောင့် ပြည်သူ ၁၆ဦး ဖမ်းဆီးခံရပြီး လက်ရှိအချိန်ထိ ပြန်လည် လွှတ်မြောက်ပေးခြင်းမရှိသေးကြောင်း စုံစမ်းသိရသည်။

အဆိုပါ ဖမ်းဆီးရသူများမှာ မူဆယ်မြို့တွင် ၅ဦး၊ ကွန်းဟိန်းတွင် ၂ ဦး၊ ကာလိတွင် ၁ ဦး၊ လာရှိုးမြို့တွင် ၃ဦး၊ ကျိုင်းတုံမြို့တွင် ၄ဦး နှင့် မိုင်ပန်မြို့တွင် ၁ဦးတို့ရှိကြောင်း လက်ရှိ သျှမ်းသံတော်ဆင့် ကောက်ခံရယူထားသည့် ဦးရေများဖြစ်သည်။၊

ဖေဖော်ဝါရီ ၁ရက် မှ စတင်ကာ တပ်မတော် မှ နိုင်ငံတော် အာဏာကို အတင်းအဓမ္မသိမ်းယူပြီးနောက် မြန်မာပြည်သူများသည် နေရာအနှံ့ စစ်အာဏာသိမ်းယူမှုကို ဆန့်ကျင်ဆန္ဒပြခဲ့ကြသည်။

ထိုပြည်သူများဆန့်ကျင်ဆန္ဒပြသည့်အလျောက် စစ်အာဏာမှလည်း နေ့စဉ်ညတိုင်းနီးပါး ဆန္ဒပြပြည်သူများကို ဖမ်းဆီးချုပ်နှောင်မှုများပြုလုပ်သည်။

ဖမ်းဆီးခံရသည့် ပြည်သူများကို မည်သည့်နေရာတွင် ခေါ်ယူထိန်းသိမ်းထားသည်ကို မသိရှိရသကဲ့သို့ မည်သည့်အမှုဖွင့် ဖွင့်ဆို တရားစွဲထားသည်ကိုလည်း ကာယကံရှင် ၏ မိသားစုအသိုင်းအဝန်းကလည်း မသိရှိရသေးကြောင်း သျှမ်းသံတော်ဆင့်ကို ပြောသည်။

“ ကျနော်တို့ မူဆယ်မှာ ၅ ယောက်ဖမ်းသွားတယ်။ ခုချိန်ထိ ဘယ်နေရာမှာရှိနေလဲ မသိဘူး။ ဘာအမှုနဲလဲကောင်းကောင်း မသိဘူး။ ပြောနေတာတော့ သဘာဝဘေးအန္တရာယ်နဲ့ဘဲ သိတယ်” ဟူ မူဆယ်ဒေသခံ စိုင်းမြင့် က ပြောသည်။

ထိုသို့ဖမ်းဆီးသွားသော မူဆယ်မြို့တွင် ၅ ဦးမှာ NLD ၂ ဦး၊ အခွန်ကောက်ရုံးဝန်ထမ်း ၂ ဦး နှင့် ဆန္ဒပြသူ ၁ ဦးတို့ ဖြစ်ကြောင်း စိုင်းမြင့် က ပြောသည်။

အလားတူ ကွန်ဟိန်းမြို့တွင်ဖမ်းသွားသူ ၂ ဦးနှင့် ကာလိမြို့တွင် ၁ ဦးတို့ကို ၇ရက်ပြည့်ပြီးနောက် လွှတ်ပေးမည်ပြောသော်လည်း ပြန်လည်လွှတ်မြောက်လာခြင်းမရှိသေးကြောင်းသိရသည်။

“ ပြန်မလာသေးဘူး။ အဆက်သွယ်လည်း မရဘူး။ ပြောတာတော့ ၇ ရက်ပြည့်ရင်ပေါ့နော်။ ခုချိန်ထိတော့ ပြန်လာတာမတွေ့ရသေးဘူး။ ကျမတို့ကတော့ တော်တော် စိတ်ပူရတယ်” ဟု ကွန်ဟိန်းတွင် ဖမ်းဆီးခံရသူ၏ မိသားစုဝင်များက ပြောသည်။

ထိုနည်းတူ ကျိုင်းတုံမြို့တွင် ဖမ်းဆီးခံရသည့် ၄ဦးသည် လက်ရှိ အချိန်ထိ မလွှတ်မြောက်သေးကြောင်း သိရသည်။

ကျိုင်းတုံတွင် စစ်အာဏာသိမ်းမှုကို ဆန့်ကျင်ဆန္ဒပြပြီး ဖမ်းဆီးခံရသူများတွင် ကျောင်းဆရာမ တဦးနှင့် အမျိုးသမီးများလည်း ပါဝင်နေကြောင်း သိရသည်။

တပ်မှ ဆန္ဒပြသူများကို နေ့စဉ်ဆက်တိုက် ဖမ်းဆီးချုပ်နှောင်သော်လည်း ပြည်သူများအနေဖြင့် စစ်အာဏာကျရှုံးစေရန် အတွက် အရှိန်မြင့်ကာ နည်းမျိုးစုံဖြင့် ဆက်လက်တိုက်ပွဲဝင်နေကြသည်။

Leave a Comments