သျှမ်းပြည်မြောက်ပိုင်း ကျောက်မဲခရိုင် သီပေါမြို့နယ် နမ့်လန်အုပ်စုတွင် မိုးသည်းထန်စွာရွာသွန်းမှုကြောင့် တောင်ကျရေများမြို့တွင်းဝင်ကာ နေအိမ်၊ ခြံစည်းရိုးများပျက်စီးဆုံးရှုံးမှုများရှိခဲ့ကြောင်းသိရသည်။
ဇွန်လ ၅ ရက်ညနှင့် ၆ ရက်နေ့မနက်ပိုင်းတို့တွင် မိုးသည်းထန်စွာရွာသွန်းသဖြင့် လူနေအိမ်များအတွင်း ရေများ စီးဝင်ကုန်ကြောင်း၊ အုတ်နံရံများ၊ အုတ်ခြံစည်းရိုးများ ပြိုလဲကြောင်း နမ့်လန်ဒေသခံလည်းဖြစ်၊ သျှမ်းလူငယ် ကွန်ယက် TYN ပြောရေးဆိုခွင့်လည်းဖြစ်သည့် စိုင်းနော်ဆိုင် ကပြောသည်။
“နမ့်လန်အုပ်စုမှာရှိတဲ့ ရွာတိုင်းနီးပါး ရေကြီးမှုဒဏ်ခံရတယ်။ နမ့်လန်မြောက်ဘက် ၄-၅ မိုင်အကွာက တောင် ပေါ် ကနေ တောင်ကျရေတွေ ရွာတွေထဲဝင်လာတာဖြစ်တယ်။ အိမ်ခြေ ၃၀ လောက် ခြံစည်းရိုးတွေ ပြိုလဲ တယ်။ အိမ်မွေးကြက်ဝက်တွေ ရေနဲ့မျောပါတာတွေရှိခဲ့တယ်။ ခုထိတော့လမ်းတွေမှာ အိုင်ထွန်းနေတုန်းဘဲ။ သွားရေးလာရေးခက်ခဲတာပေါ့” – ဟုစိုင်းနော်ဆိုင်က သျှမ်းသံတော်ဆင့်အားပြောသည်။
Photo: NSJ
နမ့်လန်အုပ်စုအထက်ပိုင်းရှိ တောင်ပေါ်တွင် သစ်ပင်သစ်တောနည်းပါးလာမှုကြောင့် မိုးရွာသွန်းပါက တောင် ကျရေများမှာ နမ့်နောင်နင်းမ်ကန်အတွင်း စီးဝင်ပြီး ကန်ရေလျှံကာ ရပ်ရွာများအတွင်း ရေများစီး ၀င်ခြင်းဖြစ် ကြောင်း ဒေသခံများကပြောသည်။
“ကျနော်တို့လေ့လာကြည့်သလောက်ဆိုရင် ၂၀၀၇ ခုနှစ်ကစပြီး နမ့်လန်မှာ အကြီးမားဆုံးရေကြီးမှု စတင်ဖြစ်ပွါးခဲ့တယ်။ ဘာလို့လဲဆိုတော့ အဲဒီမတိုင်ခင်က တောင်ပေါ်မှာ ယာခုတ်ပြီး ပြောင်းခြံ လုပ်ကြတယ်လေ။ သစ်ပင်တွေမရှိတော့ တောင်ကျရေထိန်းပေးမယ့်ဟာမရှိတော့ ရေတွေက လူနေရပ်ရွာတွေထဲဝင်လာတာ ။ အဲဒီကစပြီးနှစ်တိုင်း နမ့်လန်မှာရေကြီးပါတယ်။ ဒီနှစ်လည်း စံချိန်တင်ရေကြီးမှုကြုံရတယ်။” – ဟု စိုင်းနော်ဆိုင်က ပြောသည်။
ယမန်နှစ်က အချိန်အခါမဟုတ်မိုးရွာသွန်းမှုကြောင့် နမ့်လန်တွင် ရေကြီးမှုဖြစ်ပွါးခဲ့သေးသည်။ ထိုစဉ်က စာသင်ကျောင်းများပါ ပိတ်ထားရသည်အထိဖြစ်ခဲ့ဖူးသည်။
Leave a Comments